Ulah enchuri tau ngasuh kaya jampat tang siti jenayah, penanggul raban bansa

KUCHING: Amat tau nguntung mudah, enda kiruh kereja bebendar. Enda ibuh bisi pemandai sekula, enda ibuh bisi pengelandik asal meh enda ditangkap polis.

Pia ku gaya pendiau enggau pengidup orang ke enchuri. Asal meh agi bisi utai ulih churi sida, bala raban jai tu endang agi ulih idup, nyengkaum sekeda ke idup kaya raja, laban mayuh reta asil kereja jai sida. Tang kada ka sida senang lantang idup ari pengaya, pemisi nya?

Seraban bala sida rayat Indonesia ke mujur tama belalai ke Sarawak dalam taun 2007 suba lalu mujur enchuri tama ngagai sebuah rumah orang kaya di Kuching ditu bulih laba besai lebuh sida mujur enchuri duit enggau barang mas ungkus dipegulai bisi semak RM400,000. Lebuh datai ba menua sida din sida empat iku nya lalu terus  nyadi bos besai bejalaika dagang ti meruan laban udah bulih puko ari menua kitai tu. Tang taja pia, ukai semua orang tau nyadi kaya mudah bakanya lalu enda kena tinggang adat.

Di dunya tu, penchuri endang udah bisi kenyau ari dunya baru nyadi kelia. Kebuah iya bisi, laban mensia endang enda tau nadai penimpang, nadai pengurang ba senentang utai dikemisi. Nya alai laban tegal pengurang nya mensia ke jai runding, jai ati, lalu ngambi ari orang ke bisi kena ngelamun pengurang iya.

“Ulah penchuri tu beduduk ari pengingin ka utai ti dikemisi orang, lalu dikereja orang siku-siku (penchuri) laban enda bebasaka utai orang. Iya nadai ngira pengerugi orang nya, laban mina berundingka penadai diri empu tang ngelusu ngulihka utai nya, lalu ngujungka utai nya dichuri iya.

“Iya mega tau nyadi siti gian. Kekadang penchuri nya enda mengat begunaka barang nya, tang enchuri iya laban meda utai nya mudah dichuri. Ambika banding baka orang ke enchuri barang mit-mit ari kedai (shoplifting), kekadang utai ke dambi orang nya nadai tentu guna. Tang laban ngumbai orang nadai meda, iya lalu ngambi nya, taja nadai entu guna,” ku siku bekau pemesai tasat polis bepangkat Serjin ke enda ngasuh nama ditulis ditu.

Nunda statistik ke dikira ngena jalai anggar kasar ari penyampau kes ke ditangkap polis sereta dukum kut, ulah enchuri tu mayuh bagi.

Bisi nya enchuri ngena jalai terang, baka ngeruntun, nyamun tauka ngerumpak. Pengawa tu bisi mega dipejalaika orang siku-siku enggau bisi mega dipejalaika ngena jalai beraban. Sida tu, enti ditangkap ulih didawa baruh Genteran 392, 393, 394, 395, 397 Tusun Ukum. Bisi ga jalai sida tau didawa baruh Genteran 379, 379A, 381 enggau 380 Tusun Ukum.

Bala sekeda bisi mega enchuri tama belalai ngagai rumah tauka pechah masuk lalu naban belalai barang ari rumah nya. Dalam pekara tu, enti ditangkap sida ulih didawa ngena Genteran 457 Tusun Ukum ke tau dibacha begulai enggau Genteran 34 Tusun Ukum. Tang enti sida mina enchuri ba rumah, ukai pechah masuk, sida tau kena dawa ngena Genteran 380 enggau 381 Tusun Ukum.

Sekeda penchuri milih kerita ke bisi utai ulih ambi sida ba barang dalam kerita baka komputer rumpas (laptop), assesori bala pemain DVD tauka CD enggau utai bukai ke ulih dijual, ditukar nyadi liquid asset tauka mata duit. Bala sida tu enti ditangkap ulih didawa baruh Genteran 379A tauka 381 Tusun Ukum.

Bisi sekeda sida nya enchuri ba luar rumah utai ke ulih churi sida baka enchuri mutosikal, enchuri kerita tauka barang sepir kerita tauka mutosikal. Enti enchuri kerita sida tau ngadap dawa baruh Genteran 379 Tusun Ukum tang enti enchuri barang sepir tauka sebagi ari tubuh kerita nya, sida tau ngadap dawa baruh Genteran 379A. Kedua-dua genteran tu ngungkupka ukum jil enda ngeluie tujuh taun, sereta tau kena lunsin, enti sida udah suah ditangkap.  Tang dawa baruh Genteran 457 besai agi ukum diungkupka iya laban tau ngagai 10 taun tauka lebih, ka tambah ukum lunsin enggau tunggu.

“Sida ke enchuri nya ukai semua nyimpan barang ke dichuri sida, enti nya ukai mata duit, tang sigi endang mayuh ambika jual sida laban begunaka rega iya. Nya alai ujung iya, semua barang ke dichuri nya deka dijual awakka pulai ngagai mata duit.

“Ambika banding sida ke ngeruntun mas ari bala indu enggau lelaki nya endang ka jual sida. Pia mega sida ke ngeruntun talipaun binching, ngeruntun beg enggau barang bukai endang ungkupka jual magang  betukar nyadi duit. Bakanya mega penyadi kerita enggau mutosikal ke dichuri nya, laban endang ungkupka jual magang.

“Nya alai kitai suah ninga orang ditangkap ngembuan barang churi. Sida tu tau didawa baruh Genteran 411 Tusun Ukum laban ditemu enda lurus ati nerima sereta terus ngembuan barang churi. Dawa baruh genteran tu mega ngungkupka ukum jil enggau/tauka ditunggu,” ku bekau pemesai polis nya.

Ari semua ulah jenayah, pengawa enchuri meh lumur satu mayuh. Siang malam petang bala raban bansa serabana utai sida kena churi orang. Ukai di nengeri aja, tang di rumah panjai endang semampai bisi penchuri.

Di menua kitai tu, ulah ngenchuri tu nadai bida enggau menua bukai. Pemandai bala penchuri pan udah sejelan enggau dunya mansang. Ambika banding, datai ka mesin ATM ba dinding tebal bank pan tebabak laban pengeran penchuri ke deka ngulihka untung jampat. Bisi sekeda nya nerumpak kedai lalu mabak sereta naban cash register.

Bisi sida ke nemu agi seling jalai – nyangka bisi ‘inside info’ – tau tak berani ngasuh kerita kompeni ‘guard service’ ngetu laban deka nerumpak van nya ke bisi ngemai mata duit. Nyadi semua tu beduduk ari pengingin ka duit, pengingin deka kaya jampat.

Ka tambah nya, bisi mega bala perumpak ke untung jampat nerumpak kedai mas, nyengkaum sekeda ke enda manah nasit bisi kena timbak polis lalu parai. Tu lebuh maya polis jampat ngesah bekau nerima pemadah ari bala mayuh.

Nya alai bala sida ke nerumpak enggau enchuri nya endang sigi begadaika nyawa meh, tang laban ke keran deka kaya jampat, sida enda bedulika nya.

Sida tu endang orang ke nadai takut pedis tauka parai. Nyawa sida nadai rega agi (pelaba penulis). Engka tegal nya, sida endang enda ngasika ukum, tunggu enggau jalai tagang bukai. Bala sida tu nadai ngerunding bala orang bukai tang mina ngerunding penyenang sida empu aja. Lalu mayuh mega bala sida tu mega orang ke gian dadah, sereta teleba ngereja jenayah bukai.

Taja pan perintah Malaysia bisi undang-undang kena nagang ulah ngenchuri, tagang nya mina kena nyekat sereta jadi ka tangkan sida aja.

Ngelamatu Berita Iban endang semampai mai berita pasal kes churi, nyengkaum bala sida ke diletak ukum ulih kut. Semua nya endang kena meri ajar, ngiri pemereti ati ngagai pemacha surat berita tu.

Ambika banding  kena 27 Mei 2007 di Sibu, siku nembiak indu umur 25 taun madah lenyau mayuh bengkah dokumen lebuh beg ngundan semua dokumen nya diruntun ulih penchuri.

Pekara nya dipelaba nyadi kira jam pukul 2 pagi hari Lima sebedah  nya, lebuh tudah indu nya benung bejalai kediri ba belakang siti hotel di Jalai Wong Nai Siong ditu.

Nangkan tu di Sibu mega kena 28 Jun, siku lelaki asal menua ditu diperintah bejalaika ukum jil dua  bulan sepengudah iya ditemu salah dalam dawa enchuri (ngerampas) talipaun binching enggi siku indu ke ngena talipaun nya maya benung nganti bas ba palan bas.

Dulu ari tu, iya nya kena 15 Jun taun nya mega, siku nembiak umur kandang 30 taun ditu ditangkap tegal dipelaba nguji deka naban rari besi dipelaba dichuri.

Kena 27 Julai taun nya  mega, siku indu umur 25 taun  di Sibu madah lenyau mayuh bengkah dokumen lebuh beg ngundan semua dokumen nya diruntun ulih penchuri.

Pekara nya dipelaba nyadi kira jam pukul 2 pagi sehari nya lebuh tudah indu nya benung bejalai kediri ba belakang siti hotel di Jalai Wong Nai Siong ditu.

Ku tudah indu nya, siku lelaki ke enda dikelala bisi datai ngampir iya ngena sebuah mutosikal bansa skuter sebedau terus ngeruntun beg lengan ari pegai iya. Kes nya bisi diripot ngagai polis.

Kena pagi 23 Jan 2008, siku lelaki rugi RM1,000 lebuh kerepai iya dirampas ulih pengeruntun ba mua sebuah bank di Jalai Kampung Nyabor.

Dalam insiden kira pukul 8 pagi nya, tudah lelaki nya ke berasal ari Kampung Hilir munyi ke baru ngemansutka mata duit ari mesin ATM bank nya.

Tang taja pia, lebuh tudah lelaki nya baru deka nyimpan duit ke dalam kuchik iya, siku lelaki enda temu penatai ngenyit ngerampas kerepai nya ari jari iya.

Lelaki nya lalu ngerarika diri ngagai tunga kaban iya siku ke benung nganti ba sebuah mutosikal enda jauh ari nya.

Di Miri kena 7 April, 2008, siku orang ditunggu RM2,000 tauka ukum jil lima bulan lebuh iya ditemu salah ngenchuri besi. Ukum nya diletak ulih kut mejistret di Miri

atas akun salah saspek empu dalam dawa ke difail baruh Genteran 379 Tusun Ukum ke ngungkupka ukum jil ngagai tujuh taun, ukum tunggu enti ditemu salah.

Nyadi kes mayuh bengkah jalai enchuri tu endang amat mayuh. Ditu Berita Iban mina ngenang sekeda kes sama enggau ukum iya, enti kes nya udah datai ba kut, lalu udah diputarka.

Taja pia, utai ke enda tau enda dikingatka kitai ditu nya pasal pengujung pengeran deka bulih untung mudah enggau jampat. Nya alai nadai lebih ari kitai gawa bebendar ti ngemudahka agi jereki datai jampat.

Enchuri amat bulih tekalanya, tang pagila kada enda masuk jil.