Kepala Menteri madah menua tu bisi bida ari menua bukai mai rayat mansang

KUCHING: Menua Sarawak bisi jalai kediri ngemansangka pengawa semua komuniti nengah pengelandik, pemagas gawa sereta selalu bisi ati deka ngulihka pemujur enggau tinggi agi ba semua pekara.

“Tu maya ke berat lebuh kitai beratika adat enggau main asal komuniti kitai ke ulih nyerakup semua bansa orang ke diau di menua tu.

“Di menua Sarawak, kitai bisi chara kitai empu. Kitai meri bida ari pangan diri baka anak sungai ke betemu ba nanga tang sama anyut, lalu kitai madah deka terus sama maju, beserakup lalu betulung enggau pangan diri. Kitai enda tau enda mansang ba komuniti kitai.

“Orang enda berubah semadi bisi penyungkak ba renggat orang mayuh. Orang mayuh ke enda engkebut laban nadai pransang ke tau ngasuh sida iya berubah, tang taja pia kitai ulih diau enggau pangan diri kelebih agi nengah konsep 1Malaysia ke deka terus ngemansangka kitai,” ku Kepala Menteri Pehin Sri Abdul Taib Mahmud madah maya bejadi Simposium Adat enggau Main Asal Sarawak Kelima, ba Dewan Santapan, Kompleks Dewan Undangan Negeri, ditu kemari.

Kelimpah ari nya Taib madah pemansang meri motivasi kena semua renggat orang mayuh bekerejasama laban tu ke ngubah orang mayuh ke meskin seranta ngagai orang ke bisi pemisi enda ngira bansa.

Iya madah, inspirasi ke tinggi patut ditanam ba runding rayat awakka ulih bejalai segembar enggau pemansang sereta ngangkatka tikas pendiau sida empu.

“Kitai nemu pemansang meri peransang kena kitai besaup, ngubah orang kitai ari meskin ngagai orang pemisi enda ngira bansa iya Iban ke diau ulu sungai, Bidayuh ke diau tebing sungai, pupu bansa Cina ke diau di nengeri tauka bansa Melayu ke diau di kampung.

“Semua madah macham pemansang ke diasai kitai diatu enggau pendiau kitai mega manah agi ari kelia.

“Tu meh tanda dalam siti serak kitai lalu iya beguna amat awakka ulih nyendiaka rayat menua tu ke ulih beserakup nitihka konsep bisi kaul trit enggau adat sereta main asal orang bukai ke diberi kelala lalu betunga enggau proses globalisasi kemaya hari tu,” ku iya.

Ba pun 1988, konsep tu ulih ngemansangka pengawa tu nirika siti konsep anak Sarawak,” ku iya.

Sama bisi datai ba pengawa nya, Spika Dewan Undangan Negeri, Dato Sri Asfia Awang Nassar, Menteri Kedua Langgur Penemu enggau Pengintu Pemisi Datuk Amar Awang Tengah Ali Hasan, Menteri Pemansang Sosial enggau Urbanisasi, Dato Sri William Mawan Ikom, Menteri Pemansang Tanah Dato Sri Dr James Masing, Menteri Pemansang Bandar enggau Pengawa Dagang Temuai Datuk Michael Manyin Jawong, Menteri Pengawa Rumah Datuk Amar Abang Johari Tun Abang Openg enggau Sekiteri Perintah Menua Datuk Amar Wilson Baya Dandot.

Taib ke mega Menteri Langgur Penemu enggau Pengintu Pemisi madah adat sereta main asal ke betemu nyadi kaul mayuh macham komuniti ke ulih beserakup.

“Mayuh macahm pupu bansa ba menua tu ulih beserakup lalu ulih mega betukar adat enggau main asal lalu enda ngelenyauka tanda pengelala sebarang etnik ba menua tu.

“Iya mai penyerakup sereta meri peluang belajar enggau bebasaka mayuh macham adat enggau pendiau kitai.

“Kitai enda ulih nyapai tu enti nadai juluk ati rayat ke bempu penyanggup, ulah ke ulih nerima pekara ke bendar lalu selalu besedia bekerejasama ba semua renggat orang mayuh,” ku Taib.

Kelimpah ari nya, Kepala Menteri kemari mega madah makin mayuh orang  bepelajar tinggi makin kitai deka belajar pasal adat enggau main asal ke manah agi.