KUCHING: Dunya majak begau enggau angka nyawa bebadi tegal renga babi global udah ngeluie 100 hari Tiga tu tadi ke alai siku orang baru ditemu parai tegal nya di Amerika Serikat (AS) sereta empat iku di Mexico, iya nya dua bengkah menua ke alai penyakit nya bepungkal apin lama, pia nitihka ripot ari AFP di Chicago ensanus.

Sebedau angka pemati pengabis baru nya di Amerika Utara, Gerempung Pengerai Sedunya (WHO) ngeripot madah penyampau taban nyawa global bisi 95 iku sereta enggau 13,398 iku orang dalam 48 bengkah menua serata dunya tu udah kena rampit virus A(H1N1) kenyau ari iya mula ditemu nyadi bulan dulu.

Di Chicago, orang kedua ditemu parai laban renga babi nya bisi diripot ulih pemesai dia lalu ngujungka penyampau orang bebadi nyawa ulih renga nya manggai ngagai 15 di AS.

Enggau empat iku orang ke baru ditemu parai tegal penyakit nya di Mexico, diatu pemati orang di menua nya tegal penyakit tu manggai ngagai 89 ka tambah 100 iku orang baru ditemu kena rampit, ke ngujungka semua penyampau orang di menua udah ditemu bisi kena laban penyakit nya manggai ngagai 4,821, nitih ripot ari opis menteri pengerai sida.

Di serata dunya, perintah ba siti-siti menua endang enggau naka ulih nagang penyakit nya ari berampit taja pan bisi mega kes baru ditemu nyadi.

Dua bengkah menua – Dominican Republic ba genturung Caribbean enggau Uruguay di Amerika Selatan – sama ngeripot dua iti kes orang kena rampit renga babi ba menua nya, lalu nambah penyampau menua di dunya tu ke bisi kes renga babi ngagai 50.

Menua Chile netapka bisi 119 kes hari Tiga, lalu ngujungka iya, naka ke diatu, menua di Amerika Selatan ke pengabis mayuh kes rampit penyakit nya. Argentina, Brazil, Colombia enggau Ecuador sama bisi ngeripot sekeda kes rampit nya.

Di Kanada, angka orang ke udah kena rampit renga babi nya udah ngeluie 1,000 nyengkaum 197 kes baru diripot nyadi hari Tiga, nitih padah ari bala pemesai pengerai menua nya.

Nya alai Kanada diatu bisi 1,118 kes A(H1N1) nyengkaum dua iku orang udah ditaban nyawa. Menua nya lumur tiga ba penyampau orang udah kena rampit virus nya nangkan Mexico enggau AS.

Ba endur bukai pengawa tauka servis terus lubah pulai baka selama.

Di Mexico, kapal ngemai dagang temuai enggau orang ke bejalai raun kulu kili (kapal cruise) berengkah sangkai baru ba Cozumel udah bekau sida ngetu kia pengelama sebulan (tegal takut kena rampit penyakit nya).

Nyadi di Australia, perintah menua nya udah ngeletak atur terit atas kapal cruise ke sangkai ba Sydney, kena sida keran agi nagang rampit penyakit nya.

Baruh atur baru nya, semua kapal cruise sangkai ba Sydney endang dikira bisi potensi ngemai virus A(H1N1) ke ngerampit renga babi nya. Nya alai semua pesinjir ditagang nurun ari kapal enti apin diperesa sereta ditetapka lepas ari virus nya.

Atur terit enggau tagang ari menua Australia nya beduduk ari virus A(H1N1) nya ke berampit di sekayu Asia.

Taja pia, ngagai diatu WHO agi apin setuju ngaga deklarasi netapka penyakit nya siti pandemik besai (balat berampit).

Kerekai rampit penyakit nya udah betambah di Asia ke alai menua Singapo udah netapka iya bisi siti kes, lalu Hong Kong – ke alai rampit keterubah ditemu di Asia lalu ngujungka bala 300 temuai enggau staf ba siti hotel dikuarantin pengelama seminggu – netapka iya bisi 10 iti kes baru.

Di menua Jipun, kes nya gaya ke majak betambah, laban kena hari Tiga tu tadi menua nya udah bisi lebih 350 iti kes.

Di menua Eropa, Romania madah iya bisi kes keterubah, iya nya siku indu ke baru pulai ari New York kena 23 Mei enggau anak agi mit dua iku.

Greece ngeripot madah udah bisi kes ketiga renga babi ke ngujungka bala pemesai pengerai menua lalu berumban baum, tang madah nya nadai ngawa laban agi mudah dikontrol sida.

Kelimpah ari penyampau orang ke udah ditaban nya, menua Mexico balat endar rusak ekonomi iya laban virus nya. Tukay sturan di Mexico madah bisi 6,500 endur orang makai agi tetap tutup empa pengerugi sida laban influenza nya, lalu ngujungka bisi 55,000 orang nadai agi alai gawa.

Kira nyau ka setengah bala sida ke enda ulih enda nutup sturan nya endang bandaraya indu nengeri nya, ke alai menua nya udah meri perintah nutup semua alai makai nya sentara ke nganti pekara nya udah pulai baka selama sereta likun , ku pemadah ari industri sturan menua nya, nitih ripot ari ajensi berita AFP di Chicago ensanus.

Nyadi di Malaysia, di Putrajaya apin lama menua tu ditetapka mengkang lepas ari kerekai rampit dalam menua tu empu virus Influenza A (H1N1), pengudah agi apin bisi orang ditemu udah bekau dua iti kes orang ditemu bisi buya virus nya kena 15 enggau 16 Mei tu tadi ngagai abis kandang timpuh inkubasi virus seminggu udah nya.

Ketuai Pengarah Pengerai Malaysia Tan Sri Dr Mohd Ismail Merican madah kandang timpuh inkubasi virus nya pengelama tujuh hari ari maya orang nya bisi kena buya betapi enggau virus nya, ke dikira ari 13 Mei tu tadi, iya nya haribulan dua iku orang kena sakit nya tama ngagai menua Malaysia tu.

Lebuh bejaku ngagai pemberita ditu, iya madah semua sida 222 iku ti udah dikuarantin ba rumah laban bisi buya besemak tauka betemu enggau dua iku seduai ke sakit nya sebedau nya, deka mega dilepaska magang (pansut ari kuarantin) sehari kemari enti sida nadai gaya bisi kena laban virus nya lalu tau dikumbai lepas ari rampit virus nya.

Penyampau sida kena kuarantin nya nyengkaum bala sida diri sebilik tudah ke kena sakit nya, bala pesinjir krew bilun penerebai lumur MH091 enggau AK5358, iya nya dua iti bilun ke ditepan seduai dua iku nya sereta mega bala semua orang raban medikal ke meresa seduai dua nya sebedau tu, ku iya.

Tang taja pia, iya madah 39 iku bala pesinjir ari dua iti bilun nya mengkang apin ulih sidi, lalu taja pan kandang timpuh kuarantin udah abis, sida patut bisi tanggungjawab sereta ngeripot diri ngambika status sida terang ditemu.

Seduai dua iku nya dibai berubah ba Sepital Sungai Buloh enggau Sepital Pulau Pinang lalu diatu udah stabil sereta nadai ngayanka gaya bisi kena rampit penyakit nya sereta mega deka dikemendarka pulai pagila tauka lusa, enti nadai agi ngayanka sebarang tanda tauka simptom penyakit nya, ku iya.

Nya alai Dr Mohd Ismail madah, opis menteri nya minta mensia mayuh awakka anang irau sereta nangi pasal Influenza A (H1N1) di menua Malaysia tu laban kes bisi ditemu buya nya dibai datai ari luar menua tu, ari menua tasik lalu ukai berampit dalam menua tu empu.

“Tang taja pia, aku enggai enda ngelalau bala mensia mayuh ngambika semampai betati serius pasal gaya penyakit tu baka jam ke diatu, lalu tau ngulihka pemadah ari laman web opis menteri nya ba www.moh.gov.my tauka ari gerah media massa,” ku iya.

Sehari sebedau nya, Palan Napi Krisis enggau Lengkas Nguang (CPRC) Nasional bisi nerima 156 kes ke dipasuk ngagai wad sepital laban deka meresa virus nya, nyengkaum 22 kes ke dirikot kemari, tang semua nya ditetapka negatif kelimpah ari dua kes ke udah dikenang dulu ari tu.

Ari 22 kes nya, 11 dipasuk ngagai Sepital Sungai Buloh, Selangor; dua kes ngagai Sepital Sultanah Aminah, Johor; lima kes ba Sepital Tengku Ampuan Afzan, Pahang; dua kes ba Sepital Tengku Ampuan Rahimah, Selangor; enggau dua kes siti siku ba Sepital Kuala Lumpur enggau Sepital Sultanah Bahiyah, Kedah.

Dua iku rayat Amerika Sarikat (AS) di Sabah ke dikuarantin laban nepan bilun Cathay Pacific CX831 ari AS ke Hong Kong begulai enggau rayat Hong Kong ke positif Influenza A(H1N1) mega nadai penanggul pengerai, ku iya.

Dr Mohd Ismail madah, ngagai pagi nya penyampau dipegulai bala pesinjir ke diperesa enggau silik pengerai sida ba semua pintu penama ngagai menua tu nya bisi

121,185 iku enggau 111,246 ari penyampau nya diperesa pengerai silik ba pintu tama jalai langit, 6,262 di pintu masuk darat enggau 3,677 di pintu masuk jalai tasik.

Ditanya sekalika opis menteri deka neritka agi atur jaga enggau tagang sida, kelebih agi maya bala nembiak Malaysia datai kemisi musin panas ari AS enda lama da agi, Dr Mohd Ismail madah opis menteri nya ‘enggai ngasuh orang mayuh panik’.

“Kami deka nentuka sebarang sapa orang ke datai nya diperesa enggau silik dulu pengerai sida, tang utai ke besai bendar guna nya bala pesinjir bilun nya enda tau enda ngisi pom deklarasi pengerai enggau silik.

“Bisi orang madah ngagai aku, sekeda ba pesinjir nya nadai ulih kuntik laban alai diau enggau lumur talipaun enda diberi manah tauka betul, lalu ditu meh sida patut ngayanka tanggungjawab diri sida empu,” ku iya nitih ripot ari Bernama.

Nyadi sehari dulu ari nya, ajensi berita AFP di Geneva kemari madah penyampau orang parai ditaban ‘renga babi’ di Mexico betambah empat iku beserimbai enggau kerekai virus nya ke makin majak mungkur menua Amerika Latin sereta udah buya ngerekai ngagai Asia ke alai bisi ngeluie ari 200 iku rayat menua Jipun kena rampit penyakit nya hari kemari.

Ba menua AS, siku lelaki ka apin lama udah bisi bejalai ke menua Mexico nyadi orang kelapan iku ditaban nyawa ulih renga nya lebuh iya ditetapka parai kemari sepengudah iya ditemu kena rampit virus A(H1N1) nya, nitih ripot ari pemesai pengerai enggau ari surat berita asal menua nya.

Dulu ari tu Ketuai United Nations Ban Ki-moon ngansak bala mensia mayuh balat agi bebendar nyaga diri awakka ulih nyeliah virus nya laban iya dulu ari tu berampit mula iya nadai entu balat tang udah nya nyau majak balat sebalat.

“Nya meh kebuah bala mensia sedunya tu enda tau enda keran bejaga sereta penuh betati enggau lengkas naka ulih nyeliah diri ari kena rampit, enti udah bisi tanda penyakit nya deka nuntung,” ku Ban madah lebuh ke bejaku ba gelumu ninting taun WHO di Geneva.

Diatu penyakit nya udah ngerekai ngagai siti kandang menua di Jipun lalu bala pakar udah meri tangkan jaku, laban nangika virus nya ngerekai ngagai Tokyo ke diwuan bisi 36 juta mensia mayuh, lalu nengeri pemadu mayuh mensia di dunya, nitih ripot maya nya apin lama.

Sengkabung mua udah tebal agi dikena orang ke nepan bus, kerita api sereta mega ba mall bebeli barang enggau sekeda endur di menua Jipun ke alai bisi 228 iku mensia mayuh udah kena rampit penyakit renga nya maya nya – diatu udah ngeluie 350 iku.

Mayuh agi kes orang kena rampit nya bala nembiak sekula ke lalu ngujungka perintah udah ngasuh 4,400 buah sekula, kolej enggau tadika ditutup berengkah kemari ngagai ujung minggu tu kena nagang sereta ngelubahka agi kerekai virus nya.

Di Jipun,maya nya kandang menua hab komersil Kobe nya siti alai ti pengabis balat alai penyakit nya berampit, iya nya bisi 20 iku orang baru ditemu kena rampit virus A(H1N1) nya ari semua urung bisi lebih tiga lunsin ke udah ditetap kena rampit virus nya pagi kemari.

Alai bukai di Jipun ke udah alai penyakit nya ngerekai nyengkaum Shiga enggau Osaka ke tebal agi sida kena rampit nya bala nembiak sekula.

Munyi ke udah disebut datas tadi, WHO ngagai diatu apin tekuing deka ngerah madah pandemik (rampit jampat) penaka iya besai renga babi – tang penangi mensia mayuh ka virus nya udah datai ba renggat ti chukup balat sereta majak betambah – kelebih agi di Asia enggau di Amerika (Utara enggau Selatan).

Bisi 30 kompeni ngagai ubat tuchuk nya ari 19 iti menua industri enggau menua maju udah dikangau WHO sama datai ba aum bejuraika pekara nya sereta enggau jalai menua suntuk tauka menua baru mansang di dunya ulih dibekal enggau ubat tuchuk nya ku ripot ari Bernama.