KUCHING: Bisi kebuah nembiak sekula indu enda kena ukum rutan enti sida iya ditemu ngelanggar atur sekula.

Menteri Muda ba Opis Kepala Menteri Datin Fatimah Abdullah ke mantai pekara tu madah, ukum rutan dipelaba deka meri penanggul ngagai sarang anak.

“Enti pelin nya deka diterima pan, bisi atur ke terang agi ti patut dibantaika, baka chunto ni bagi alai tubuh ti dikemendar kena alai ngelunsin nya,” ku iya madah lebuh ditemu udah abis Pengerami Muka Penggal Keempat Aum Kunsil Nengeri Sarawak Ke-16, ba Kompleks Kunsil Nengeri (KN), ditu, kemari.

Iya mansutka jaku nya lebuh ngenang pasal pelin Gerempung Pengajar Sarawak (STU) besangkut paut enggau ukum rutan ba sekula nyengkaum meri ukum rutan ka sida nembiak sekula indu.

Hari Satu tu tadi, Presiden STU William Ghani Bina dipadah bisi nyebut, naka kediatu atur nya semina ngemendarka nembiak sekula lelaki dirutan lalu nembiak sekula indu ke bisi ngaga penyalah kena ukum naka ke diatu mina diberi ukum ngereja pengawa baka nuchi agu enggau muai uras.

“Ukum rutan nya patut dikerembai ngagai bala nembiak sekula indu sekonderi lalu ukai ungkup indu sekula primari,” ku Ghani.

Ku Fatimah, ukum rutan enti nitih, patut dipejalaika kena nipak penyalah besai aja baka nginsap enggau belaya lalu ukai kena penyalah ke mit.

“Semina chigu ke diberi tanggungjawab aja ulih bejalaika ukum ngerutan lalu iya semina dikena ka penyalah besai aja.

“Nya alai, iya enda tau dikena seneka ati,” ku iya.