Pekara tu deka meransang mayuh agi sida milih pengawa dagang nyadi karier, ku Moggie

SIBU: Taja pan baru manggai enam taun udah ditumbuh, Dewan Dagang enggau Industri Dayak (DCCI) endang napi tanggung pengawa ti berat sereta besai guna ke ukai mina kena nempa sereta ngasilka mayuh bala orang bedagang bansa Dayak tang mega sida ke landik sereta sikar dalam pengawa dagang.

Presiden DCCI ke mega bekau Menteri Kuasa, Telekomunikasi enggau Pos Tan Sri Datuk Amar Leo Moggie Irok madah tanggung pengawa dewan nya chukup besai sereta mayuh panga enggau pampang.

“DCCI tu nyadi penyurai kena bekenjing nguji ngemudahka agi, nyukung sereta meransang bala raban bansa Dayak enggau orang sama begugut dalam dunya dagang,” ku Moggi.

Dewan dagang pengabis biak umur dalam Malaysia tu ditumbuhka kena 11 Jan 2003 ari sukung bekau Perdana Menteri Tun Dr Mahathir Mohamad udah sekeda bala ketuai Dayak enggau Kadazandusun datai betemu enggau iya.

Moggie madah, perening jauh enggau tuju ati dewan tu endang kena nyungkakka agi pemayuh enggau pengeregas bala raban bansa Dayak enggau orang nguji bedagang serimbai ngamat enggau ngasuh nyadi nyata batang tuju ati Wawasan 2020 Malaysia ke keran deka nyadi siti menua enggau bansa ngundan 26 juta rayat mayuh nyadi siti menua ngembuan status maju tauka dalam jaku ribai ‘developed nation’.

Dewan dagang enggau 454 iku kaban tu bisi 284 iku orang dagang ke enggau orang dagang kontrak rama, ngaga rumah, ngeripir, mekal barang rama, dagang ngemansangka tanah enggau sekeda pengawa rama enggau pengawa besangkut paut enggau pekara diguna sereta dikena rayat mayuh.

DCCI bisi 62 iku kaban profesional nyengkaum luya, akauntan, injinia, sekeda ke enggau dalam dagang insurans enggau pekara wang, lalu laluh nya enggau dalam dagang industri minyak enggau gis sereta sektor dagang temuai.

“Raban bansa Dayak terubah iya dipeda mina mimit aja bisi enggau orang dalam pengawa dagang tang kami nadai ngarapka ‘special treatment’ tauka dinah enggau chara spesial tauka enggau pechuma.

“Taja pia, kami ngarapka bala raban nembiak baru diatu, iya bala orang dagang bansa Dayak ke baru mansang, diberi awak kena sida ngayan sereta mandangka diri bisi penemu, pengelandik dalam pengawa dagang,” ku Moggie lebuh bejaku ngagai Bernama.

Ambika banding, bisi 20 iku kontraktor Dayak ke udah bulih status ‘Kelas A’.

“Kami ngarapka, nyangka manah agi enti perintah ulih berundingka atur ngungkup ‘bid’ tauka tender ka sekeda projek infrastruktur nyemetak ungkup bala kontraktor tu.

“Kami mereti, atur meri terus (ngagai sesapa) nya nadai agi diaduka dalam polisi perintah diatu,” ku iya.

Orang politik veteran nya madah, Koridor Kuasa Tau Dikena Baru Sarawak (Score) nya tau dikumbai ‘lombong emas’ tauka sarang mas ungkup bala orang dagang Dayak matau lalu ngidupka awak dagang sida.

Scora begunaka 1.5 bala orang gawa sereta bisi RM350 bilion penyampau belanja dibubuh dia kena beranakka puko sereta ngemansangka semua rengka enggau pekara infrastruktur diguna iya ngagai taun 2030 ila.

Ungkup bala kontraktor mit, Moggie madah, sida patut diberi mayuh awak dagang baka mekal set injin api tauka generator kena mekal karan enggau barang pemakai ungkup bala nembiak sekula bemalam ba buding di sekula menua pesisir.

“Siti ari pekara ke benung diberi kemeran ulih dewan tu diatu nya ngambika bala raban bansa Dayak regas enggau orang dalam homestay lalu mungkal pengawa betanam betupi moden.

Iya amat ngaku mudal tu endang siti ari penekul lumur satu, tang iya ngarapka perintah ulih ngemudahka agi chara enggau jalai ngena tanah pesaka tuai (NCR), enda ngira iya bisi kuasa ngempu tauka nadai, kena ngemujurka perambu pengawa dagang betanam betupi, iya nya ngambika tanah nya ulih kena nginjau lun enggau gran baka bansa tanah ke bukai.

“Jam ke diatu, tanah nya (NCR) nadai ulih kena ngelun, lalu nadai ulih kena nyadi ka jamin gran. Enti polisi tu nadai berubah, skop (guna) iya amat nadai endar, lalu nadai ngenatai penguntung ka orang empu tanah nya,” ku iya.

Moggie optimis pasal asil aum sida enggau Sapit Perdana Menetri maya nya suba,

Datuk Seri Najib Tun Razak di Kuching dalam bulan Februari. Najib diatu udah nganti penuduk Tun Abdullah Ahmad Badawi nyadi perdana menteri keenam, iya nya kena 3 April tu tadi.

Iya madah Najib ngaku bala orang dagang Dayak endang agi balat begunaka bantu enggau sukung ari perintah.

“Ba aum rumpas nya, kami bisi awak nerang ngagai iya (Najib) pasal penanggul enggau pemedis ti ditapi ulih raban bansa Dayak, bala orang dagang (Dayak) enggau bala kontraktor mit,” ku iya.

Moggie ke endang bekau menteri kabinet perintah besai mayuh peneleba, madah diri gaga bendar ati meda sekeda bala raban Dayak, kelebih agi sida ke bisi pelajar tinggi enggau profesional diatu udah enggau orang bedagang sereta udah nyapai pemujur dalam dagang sida, lalu sekeda ke bukai nya endang bisi prospek deka mujur tauka tengan mansang deka mujur.

Sapit Menteri Pemadah, Komunikasi, Penemu, Adat enggau Main Asal Datuk Joseph Salang Gandum madah, bala nembiak rebak baru ke tinggi pelajar sereta bala Dayak profesional patut nguji enggau orang pengawa dagang lalu ngemeranka dagang nyadi profesion sida.

“Diatu endang udah nyadi trend di Malaysia tu bala nembiak rebak baru enggau sida ke bepelajar tinggo sereta bala profesional ngemeranka pengawa dagang nyadi karier.

“Enti bala raban nembiak tu enggau bala Dayak ke regas enda keran sereta nadai ati enggau orang pengawa dagang, bala kitai patut ngerak sida ngasuh dani tinduk awakka sida mereti ati lalu ngenchelakka mata sida sereta nemu pengawa dagang nya karier ti ngenataika penguntung besai ngagai sida,” ku Salang ke mega siku ari kaban komiti DCCI.

— Bernama