MIRI: Mercy Malaysia (Mercy) Pampang Sarawak disadang deka meli sebuah rumah di Miri ditu lalu ngaga rumah nya nyadi alai ngengkah bala rayat seranta di Miri ke balat begunaka alai diau. Pekara tu engka deka nyadi nyata dalam dua tiga minggu ari diatu.

Sebuah rumah bungalow dua ringkat berega RM380,000 di Piasau Garden udah ditagaka nyadi alai ti ngena kena bejalaika perambu projek tu.

“Rumah tu agi manah, mina begunaka mimit ubah sereta deka diseruri mimit mega, lalu kami deka minta bantu sekeda bala injinia dalam pengawa nya,” ku ketuai Mercy di Sarawak Benjamin Chai kena 25 April tu tadi.

Chai madah sida (bala sukarela Mercy) udah bebendar nentuka alai ngengkah bala ke seranta pendiau nya nyadi nyata.

“Kandang enggau kelingi rumah nya enda tau enda ditebas sereta dikupas laban ngambika iya ulih digaga nyadi alai bala sida ke diau dia ila bejalaika pengawa rekreasi. Nya nentuka sida enda dikandang dalam bilik sida aja,” ku Chai madah ngagai Utusan Borneo ke bisi datai betemu enggau iya ba endur rumah nya di Piasau Garden, ditu kemari.

Nyadi rumah ke disuwa Mercy jam ke diatu nya kelalu mit bebanding enggau rumah bungalow ke baru deka dijual ngagai sida ke umbas kena alai ngengkah bala temuai dalam lima iti bilik sereta dua bilik ke bukai ti ditaga nyadi ka opis sida.

“Dudi ila, enti nyema endur ngenduh ke baru tu enda umbas agi laban sida ke seranta datai ari pesisir nya nyau majak nambah, Mercy engka deka minta kasih ari perintah ngagihka tanah alai ngaga rumah alai orang seranta ngenduh ti besai agi,” ku Chai sereta madah orang empu rumah bungalow nya chukup murah ati sereta siru laban meri penyampau RM80,000 ari jual rumah nya pulai ngagai Mercy.

Iya mega madah penanggul ngemai pulai ke rumah sida di entigis menua ulu ari sepital bangkai bala diri sebilik sida ke seranta nya.

“Kami enggau naka ulih mantu sida ngatur pengawa rabat sereta numbak bangkai baka nulung sida bejaku enggau gerija di Miri ditu, nyengkaum meli entubung ke pemanah iya,” ku iya sereta madah entubung nya dianggar berega urung RM800 sereta ungkus kena nyenggai dalam urung RM1,500.

Chai mega ngemai seraban bala sukarela merati gaya genturung rumah sida setinggan di Canada Hill. Bala sida sukarela nya nyengkaum siku nembiak ari Univerisiti Curtin ke ngaga video dokumentari pasal projek ngaga alai ngenduh ka bala rayat Miri ke seranta.

“Kami ngarapka ulih mantai penanggul bala Orang Ulu baka sida Penan, Kenyah enggau Kayan ngagai bala mayuh ke bejalai chukup penyauh ari entigis menua ulu nengah jalai babas ngagai Miri laban deka berubat ngagai sepital Miri tauka laban deka nemuai ngabas bala kaban belayan sida ke berubat di sepital nya.

Sekeda sida tu datai ari entigis menua ulu baka menua Long Kerong semak sempadan enggau Indonesia ka tambah mega ari menua ti sama jauh baka Long Iman, Long Liwed,” ku Chai maya ke nganjung sekeda pemakai enggau utai bukai diguna sida ke tinggang penusah rabat nya.

Iya serabana madah mayuh orang di Miri enda nemu pasal pemerinsa bala sida nya ke datai jauh nemuai ngagai bala kaban sida di Canada Hill sereta numpang diau dia ba endur ti sekut dua tiga hari, bepanggai ba pengelama sida ke berubat, tauka ba pengerai sida.

“Uji kitai ngira pemedis sida ke diau nyelepak diri ba endur ti sekut, lalu udah nya bejalai ari Canada Hill ngagai kaki bukit sereta udah nya bejalai kaki baru ngagai sepital Miri laban ke deka ngabas kaban sida ke sakit tauka nganjung diri empu berubat ke sepital nya.

“Semua tu balat ngasuh ati sinu,” ku iya nampung serabana.

Bisi ngagai lima iti pintu bilik bala sida besekut diau ba rumah ke ditinggalka orang ngapa nya, ke diatu diwuan sereta digaga siku lelaki bansa Orang Ulu ke dulu suba datai ke Miri laban ngabas kaban ke sakit, tang diatu udah bulih pengawa nyadi jaga ba bandaraya nya. Lalu beduduk ari nya, bala Orang Ulu ke ninga berita bisi endur ngenduh diau ba genturung setinggan, lalu berebut datai ke Miri – bejalai kaki.

“Kami ngarapka mayuh agi bala orang enggau ngemujurka projek tu laban kitai sama nemu bandaraya Miri tu endang siti endur ti penuh bepenyayau, bepenyiru,” ku Chai nambah.

Sebarang sapa ke deka nemu enggau silik agi pasal pekara tu, tau talipaun ngagai Chai ba lumur 019-8540383.