Sistem Dwi Latihan nya ila dikarap ulih ngurangka menua tu ngambi orang landik gawa ari menua luar

KUCHING: Sistem Dwi Latihan ba pengawa ngemansangka industri di menua Jerman dipelaba ulih mantu nambah orang gawa ke landik ari menua tu empu lalu tu ulih ngurangka menua tu ngambi orang ari menua luar ke bisi pengelandik.

Kepala Menteri Pehin Sri Abdul Taib Mahmud madah, orang ari menua tu patut bisi pengelandik nitih peminta ari mayuh macham industri ke dibantaika ila nengah atur Koridor Kuasa Tau Kena Baru Sarawak (SCORE).

“Kitai beminat deka ngerembaika atur sistem tu di Sarawak beratika nyerakup atur teknikal, latih enggau pengelandik sosial,” ku iya madah maya muka pameran poster beserimbai enggau Hari Jerman ba Dewan Tun Abdul Razak, ditu, kemari. Kelimpah ari ngurangka menua tu bekenaka orang ari menua luar gawa ditu, iya madah sistem tu ulih ngurangka kualiti merabab enggau kuantiti orang ke bisi pengelandik.

Iya madah, sistem tu deka ngenyemakka agi takah teknologi entara industri enggau institusi pengawa latih.

“Kitai mega deka mindahka teknologi ngagai orang gawa ke bisi pengelandik enggau institut pengawa latih,” ku iya lalu nambah pemisi orang gawa ke bekualiti ba siti-siti menua ulih ngemansangka penama pelabur ari menua luar.

Score ke dibuka bekau Perdana Menteri Tun Abdullah Ahmad Badawi bulan Februari taun siti nyin tadi, deka ngemantaika mayuh macham bansa dagang ke narit ati kelebih agi industri ke bekait enggau kuasa.

Ba aum media, Taib temegah ati laban menua Jerman bisi ngemantaika empat bansa biasiswa diberi ngagai nembiak ari Sarawak.

Sida ke udah kena pilih tu ila, iya ngarapka sida tu ulih nyukung pengerembai teknologi enggau industri berat ke deka dikemantaika nengah SCORE.

“Kitai begunaka pakar ke amat-amat kering ari aspek teori enggau praktikal,” ku iya.

Sambil madah biasiswa ke bisi diberi nya siti inisiatif menua Jerman empu ba pengawa mindah pengelandik enggau teknologi, iya ngarapka menua ke udah mansang nya deka meri mayuh agi biasiswa.

“Tu atur pugu ke manah amat lalu aku ngarapka biasiswa tu ulih tambah baru ila,” ku iya.

Kelimpah ari nya, Taib madah entara taun 1998 enggau 2008, pemayuh nembiak Malaysia ke belajar di menua Jerman udah nambah lebih 1000 peratus. Kediatu kitai bisi 900 iku nembiak Malaysia ke benung belajar ba menua Jerman.

“Tu nyendiaka peluang ngagai kompeni menua tu ngiga enggau neritka kerejasama enggau kompeni Jerman awakka ulih nyendiaka pengawa ke nitihka stindit dunya enggau kos ke kompetitif,” ku iya.

Ba atur pengawa ke sama nya mega, Taib madah ba taun siti nyin tadi, Jerman nyadi menua nanam mudal di Malaysia ke pengabis besai ari Eropah.

Ngena RM4.4 biliun, bala pelabur ari menua nya ngerembaika pengawa sida iya ba industri kuasa tau kena baru enggau elektronik.

“Ba taun 2008, Jerman entara 10 iti menua ke nyadi raban dagang Malaysia enggau penyampau dagang RM37.83 biliun lalu iya entara menua 10 ke ba atas sekali ba gerempung menua pengekspot ngagai Malaysia enggau penyampau dagang RM22.47 biliun,” ku iya.