LUBOK ANTU: Gaya enggau adat Parti Keadilan Rakyat (PKR) ari Semenanjung Malaysia enda patut dibai tama ngagai menua tu kelebih agi ba Batang Ai maya bepilih mit kena 7 April tu ila.

Sapit Kepala Menteri Datuk Patinggi Tan Sri Alfred Jabu madah parti penyakal ke bepalan ba Semenanjung Malaysia nya enda patut sereta nadai bepengelandik ba adat bansa Iban ba sitak Lubok Antu.

Jaku Jabu tu disemaka iya ba cherita ke nyadi taun nyin tadi, ke alai siku ari raban PKR ke deka muka pampang parti nya ba Rumah Entirong, Tutong parai udah sida iya enda nitihka adat Iban ba rumah nya.

“Tu ngayanka sida tu (PKR) ngemaruhka adat bansa Iban ditu dataika iya ngasuh siku ari raban nya parai lebuh sida iya deka muka pampang parti nya ditu (Tutong),” ku iya ngelabuhka jaku, kemari.

Jabu Menteri Pemansang Menua Pesisir ke mega Menteri Pemansang Infrastruktur enggau Komunikasi madah baka nya lebuh bejaku ba pengawa Majlis Angkat Sumpah Ahli-ahli Majlis Daerah Lubok Antu ba dewan serba guna Lubok Antu ditu kemari.

Ba jaku iya madah enda nyamai ati meda pengawa sekeda orang Iban ke betanggungjawab mai tama gaya enggau adat PKR ngagai sitak Batang Ai, Lubok Antu sebedau tu.

“Sida udah nemu pengawa baka nya ngelanggar adat sida iya empu ke ditemu mai penyai kelebih agi lebuh iya bebalut enggau raban parti penyakal ke bepalan di Semenanjung Malaysia.

“Manah agi enti sida tu sama mantu BN ngintu pengering adat bansa ba menua tu,” ku iya.

Kelimpah ari nya, Jabu mega ngasuh semua parti komponen BN ba Batang Ai iya nya Parti Pesaka Bumiputera Bersatu (PBB), Parti Rakyat Bersatu Sarawak (SUPP), Parti Rakyat Sarawak (PRS) enggau Parti Demokratik Progresif Rakyat Sarawak (SPDP) beserakup ngulihka BN ba Batang Ai maya bepilih mit tu ila.

“Datai 18 Mac tu ila, perintah ke diarika aku empu deka nyuaka rebet ngagai sida ke bisi bulih rebet tu kelebih agi sida ke bisi injin sepit ba sitak Lubuk Antu tu.

“Sida ke bisi injin sepit 10 kuda ke baruh deka nerima rebet dalam RM350 lalu sida ke ngembuan 20 kuda ke baruh (RM500) enggau 20 kuda ke atas (RM750),” ku iya.

Sama bisi datai ba pengawa nya, Kaban Parlimen Lubok Antu William Nyalau Badak, ADUN Bukit Saban Robert Lawson Chuat, ADUN Engkilili Dr Johnnical Rayong Ngipa, Residen Sri Aman Abang Shamshuddin Abang Seruji, Pegawai Menua Pelilih Lubok Antu Nelson Mujah Girie, Walikota Sri Aman Piau Inggot enggau Sekiteri MDLA Lolita Jaimie Nicholas.

Bisi 25 iku raban opis kunsil MDLA ke alai sembilan iku kaunsilor ari PRS, enam iku PBB, enam SUPP enggau empat SPDP ngangkat sumpah nyadi raban Opis Kunsil MDLA kena penggal udah tu ila ba mua Datuk Patinggi Jabu ba pengabis pengawa nya.