Rayat pupu bansa begunaka penyerakup ngambi perintah senang gawa sereta ngatur pemansang

SRI AMAN: Penyiru enggau pemintar perintah ke meri awak ngagai rayat numbuhka mayuh bengkah gerempung sigi manah kena nyaup negutka agi kaul sereta penyerakup entara raban bansa menua Malaysia tu.

Menteri Muda Pemansang Tanah Datuk Francis Harden Hollis madah, pelasar pemansang siti-siti menua nya penyerakup rayat ari mayuh pupu raban bansa ke mudah bechampur, berakup ngereja pengawa sereta bekaul manah enggau pangan diri.

“Pemaik sereta pengentap politik ngujungka perintah senang agi merambu mayuh bengkah projek pemansang ungkup semua rayat mayuh di Menua tu,” ku iya lebuh bejaku bejadi Aum Besai Genap Taun (AGM) Serakup Bansa Dayak Sarawak (SDNU) Pampang Sri Aman ba Dewan Rumah Dayak ditu ngalih hari kemari.

Ku Harden, semua gerempung tauka serakup mesti bisi tanggung pengawa negutka penyerakup rayat mayuh ngambika semampai diau lantang, harmoni enggau pengelikun laban tu tanggungjawab semua.

“Aku ngarapka semua gerempung ba menua tu, enda ngira gerempung sida bansa China, Melayu tuaka Iban, anang enda berakup sereta bekerejasama enggau pangan diri ngicha rayat ari mayuh pupu raban bansa di menua tu terus diau lantang senang dalam pengelikun enggau pemaik,” ku iya.

Ku iya nambah, perintah mega begunaka sukung bala ketuai raban bansa dalam pengawa bejalaika pengawa pemansang ngambika maju dalam pelajar sekula,

sosioekonomi, main enggau adat asal, lumba enggau mayuh agi utai bukai.

“Laban nemu pasal peneka enggau peminta tu, nya alai perintah ngemendarka mayuh bengkah serakup tauka gerempung ditumbuhka di menua kitai ditu,” ku iya.

Sama bisi datai ba pengerami Pemancha Samuel Lawen, chermin SDNU ditu Roland Demong Radin sereta enggau bala kaban serakup nya ke bukai.