KUCHING: Ba pengawa nagang nyamuk aedes betelu, pemaju beratika kontraktor patut ngintu pemeresi ba alai ngaga rumah ku presiden Gerempung Pemaju enggau Hartanah Sarawak (SHEDA) William Wei.

Iya madah, ketegal nyamuk aedes betelu ba alai ngaga rumah, iya deka mai ngenusah ukai semina ba orang ke diau sepiak-sepiak tang mega ba sida ke gawa ngaga rumah.

“Kami sigi setuju enggau jaku Sapit Kepala Menteri Datuk Patinggi Tan Sri George Chan, iya nya sida kontraktor patut ngemeratka pemeresi lalu enda ngelakka ai metung ba alai ngaga rumah,” ku iya lebuh ditalipaun kemari.

Iya madah baru, udah nyadi tanggungjawab pemaju betatika alai ngaga rumah nadai betunga enggau aedes betelu laban sida iya bisi orang ke gawa ke diau semak nya dia.

William nambah, gerempung mega bisi polisi ti patut dititih ba baruh bidang kuasa opis kunsil menua.

“Pemaju diatu udah diungkup enggau sistem kena muai uras kena pemeresi ngelingi alai nya enggau perengka ti diberi ulih opis kunsil menua.

Iya madah, tu ukai penanggul ba bandar tang penanggul ngagai alai luar ari bandar.

“Ba nengeri besai baka Kuching, Sibu, Miri enggau Bintulu nadai penanggul laban opis kunsil menua deka ngambi atur ke trit enggau saman ke sebarang penyalah nya tang pekara tu enda baka tu ba alai ke ba luar ari bandar.

“Kediatu nadai sebarang penanggul ke bisi diripot bekait enggau kes baka tu ba alai ngaga rumah ,”ku iya.

Ku iya baru, sida kontraktor deka diungkup enggau tong uras ba alai ngaga rumah enggau tong uras alai sida iya bebuaika uras ti dibai ulih kontraktor nya empu ngagai alai palan muai uras ti udah dikemendarka.

Iya mega madah kelimpah ari opis sida iya, opis kunsil enggau orang mayuh ke diau ba alai nya mega bekunsi tanggungjawab kena nagang nyamuk aedes ari betelu lalu ukai semina nganti perintah madah baru deka ngereja pengawa nya.

Kelimpah ari nya, Utusan Borneo hari Tiga tu tadi bisi ngaga berita pasal jaku Datuk Patinggi Tan Sri Dr George Chan, iya nya sida kontraktor diasuh betati enggau ngambi atur nagang penyakit denggi ke makin majak diatu ba Sarawak diatu.

“Sida kontarktor patut muai ulah ke “enda ngawa” lebuh ngintu pemeresi ngelingi alai ngaga rumah,” ku iya.

Iya madah baru, orang ke gawa tauka orang mayuh ke diau ba semak nya dia lebih berisiko tinggi dirampit denggi laban kualiti pemeresi ke enda entu berapa.