SARIKEI: Projek nyadung barang sabsidi ke enda tau nadai baka beras, minyak enggau utai bukai ke Sarawak dipejadi ba Kedai Stephen Arin in Sungai Brangan Saratok enda jauh ari tu. Timpuh pengelama projek tu diberi lama agi sereta ditambah siti agi barang dalam lis iya.

Menteri Dagang Dalam Menua enggau Pekara Meli Barang Datuk Shahrir Abdul Samad, ke bejadi projek nya madah, pengelama timpuh projek nya setaun bebanding enggau dua iti projek tu di Semenanjung Malaysia ke semina sebulan (ungkup Seberang Perai di Pulau Pinang) enggau sebulan setengah (ungkup siti di Pekan Pahang).

Barang baru ke deka dipasuk iya dalam lis ba projek keterubah ka Menua tu nya gis petroleum ‘liquefied’ (LPG), ku iya ke berupai kena napi isu rega barang nya ti kelalu tinggi ba menua ulu di Saratok bebanding enggau ba kandang nengeri munyi ke dulu ari tu udah dibantaika Menteri Muda Betanam Betupi Datuk Peter Nyarok Entrie lebuh ke bejaku dulu agi ari nya.

Ku Nyarok, kelimpah ari tepung gandum, nadai penanggul bekal bukai dalam lis nya. Empat iti barang enda tau nadai ke masuk dalam lis projek nya nyengkam gula, tepung gandum, minyak makai enggau beras 15%.

“Penanggul nya rega barang ke enda tau nadai nya ti kelalu balat mar ba menua ulu di Saratok bebandung enggau nengeri Sarikei, tauka Saratok empu. Ambika banding rega tepung gandum nya ba menua ulu di Saratok nya RM2 sekilo enggau siti tong gis (LPG) siti nya RM35 tang di nengeri rega barang nya mina RM1.45 sekilo enggau tong gis mina RM27 siti tong silinder,” ku Nyarok.

Shahrir nerang madah rega barang ti enda tau nadai nya berupai diginsit tinggi laban ngira rega minyak ungkus berangkut barang udah niki, ke lalu nyadi siti ari batang kebuah projek tu dipungkal.

Batang tuju projek nya endang kena nentuka bekal barang sabsidi nya semampai bisi sereta nadai pungkang, sereta mega dijual nitih rega ke dikontrol perintah ka tambah mega tetap datai ba rayat ke semua begunaka barang nya di menua pesisir.

“Semua barang ke enda tau nadai sereta bisi sabsidi nya endang ungkupka penyenang enggau penyamai semua rayat Malaysia. Enti nyema bala orang ke mekal barang nya enggau nganjung barang ngagai menua pesisir laban ungkus kena ngangkut barang nya tinggi, nya reti bala rayat menua ulu, ke mega rayat Malaysia dipulau tauka diseliah ari penyenang enggau penyamai ke sigi patut hak sida,” ku menteri nya.

Daud Tahir ke nyadi sapit Ketuai Sekiteri opis menteri nya, lebuh ke meri lansa pemadah pasal projek pilot nya di Saratok madah, bisi 71 premis dalam lima iti kandang menua udah ditetapka enggau masuk projek nya.

Ba Kandang Menua 1 bisi 14 iti premis, iya nya di Ulu Mudong, Brayang, Dabai, Lichok, Sebubu, Ulu Sebetan, Sungai Engkabang, Sungai Klampai, Sungai Ruan enggau menua Metong areas; 17 iti premis ba Kandang Menua 2 nya mungkur Sungai Brangan, Engkudu, Peligong, Sungai Anak, Itop, Disso, Malong, Kampung Melango, Kampung Hulu Saratok, makit Opis Kunsil Pelilih Saratok enggau Pasar Saratok; 13 iti premis ba Kandang Menua 3 mungkur Pasar Roban, Kampung Melayu Roban, Ulu Roban, Nyiar, Nyabor, Gerigat, Sessang, Perpat, Alit, Kabong, Kampung Melayu Kabong; 10 iti premis ba Kandang Menua 4 mungkur Nanga Assam, Mendas, Melupa, Bajau, Selambung, Entebu, Sungai Antu, Temudok Awik, Temudok Krian enggau Lubuk Renit; lalu 17 iti premis ba Kandan Menua 5 nya  mungkur Jalai Ulu Awik/Ulu Kabo, Jalai Ulu Krian/Kabo/Ulu Budu, Krangan/Tanduk, Jalai Kaki Wong, Nanga drau, Sebubu, Mapar enggau Babang.

Siku pemekal ari Sarikei udah dipadu empu tanggung pengawa nganjung barang nya nitih maya enggau jam ke ditetapka ulih Opis Dagang Dalam Menua enggau Pekara Meli Barang (MDTCA), ku iya sereta madah kompeni nya dipinta nganjung 20 tan metrik beras 15%, 500 kambut sekilogram minyak masak; 2,000 katun bungkus tepung gandum sekilogram sereta enggau 20 tan metrik gula genap bulan ngagai 71 iti premis tauka palan ke masuk dalam bungkur program nya.

Dalam projek tu, rega burung beras 15%   RM16.50 ungkup 10 kilo;  RM2.50 sekilo minyak makai ; RM1.40 sekilo tepung gandum sereta RM1.55 sekilo gula pasir. Lalu rega barang nya RM18, RM2.75, RM1.45 enggau RM1.70 nitih ripih iya.

Shahrir ke bejadi siti agi projek ti sebaka di Pasar Kabong lemai nya madah, projek nya bepalan di Saratok, lalu disadang deka dikerembai ngagai alai bukai ba Menua tu dudi hari ila.

“Aku nemu projek tu disukung bala mensia mayuh di pesisir laban nya endang kena nentuka sabsidi ungkup barang ke enda tau enda ti diberi perintah nya datai ba rayat. Projek dua ti sebaka enggau tu  ti udah dipejalaika dulu agi sigi udah berupai nyapai pemujur ti besai laban bala sida pemekal nya setuju nanggung kediri empu semua ungkus ngangkut barang, lalu nadai minta sebarang bantu ari perintah,” ku Shahrir.

Sama bisi enggau datai ba alai nya Sapit Menteri Dagang Dalam Menua enggau Pekara Meli Barang Jelaing Mersat, Pengari Kunsil Nengeri Kalaka  Abdul Wahab Aziz,  Sapit Ketuai Sekiteri MDTCA Daud Tahir, Ketuai Pelilih Saratok Daniel Supit enggau Pengarah Menua MDTCA Ahmad Nasir Kosri.