Tebal agi menua di Kuching, Bau, Sebuyau, Serian endang entebung magang laban penusah ampuh bah sekali tu

KUCHING: Nengeri besai Kuching kemari balat bendar kena tinggang penanggul ampuh bah.

Ba Jalai Nanas, ai bah endang udah berengkah ngampuhka sekeda rumah ba Jalai Nanas kenyau ari pukul enam pagi beduduk ari hari ti nadai ngetu kenyau ari malam ensanus enggau dua tiga hari ke udah.

Siku orang penama Choo ke empu rumah ampuh laban bah nya madah ai ba parit menua sida dia endang semampai matung laban parit dia balat alit laban sampah, ka tambah ke enda diadu manah lalu alit laban rumput ti bauh endar.

“Kami suah bendar udah ngenataika kemplin ngagai opis kunsil pasal parit ti alit tang lalu apin bisi atur sida ngadu parit nya manah agi,” ku iya madah ngagai Utusan Borneo kemari.

Nyadi ba alai bukai, iya nya ba Taman Lovelyland tunga ngagai Jalai Kuching/Bau di Batu Kawa endang lama udah ampuh bah.

Bala sida menua dia balat bendar ngeransi laban reta tengkira sida ke rusak laban ai bah, tang laban sekeda projek pemansang menua udah ngujungka rumah sida baruh bendar bebanding enggau tanah ke alai projek baru nya digaga.

“Dua iti lot alai orang ngagai projek baru semak rumah kami endang udah ditambun enggau tanah ti jauh tinggi ari rumah kami.

“Nya alai maya ai bah, rumah kami sigi dulu ampuh, laban endur rumah kami tu jauh bendar baruh bebanding enggau projek baru nya,” ku siku apai tuai orang empu rumah ba Taman Lovelyland ke enda ngasuh nama iya ditulis ditu.

Ba sekeda alai bukai di bandaraya ditu mega balat ampuh bah baka ba Jalai Green, di Matang sereta mega di Pending nyengkaum ba jalai mua Hock Lee Centre enda jauh ari opis Utusan Borneo ditu.

Kelimpah ari di bandaraya ditu, jalai enggau menua tunga ke Bau mega mayuh tusah laban ampuh bah. Ambika banding sekeda rumah di Siniawan di Bau mimit da agi ngampuhka perabung.

Lalu pia mega di menua SK Batu Kitang di Batu Kitang ba serantu jalai lama ke Bau, balat endar ga menua dia ampuh lalu ngenusahka bala mensia mayuh ke diau di menua nya.

Nyadi di Sebuyau, Mesjid Darul Iman di Kampung Sawmill, Sebuyau, dalam Sitak Samarahan enda ulih enda ditutup laban takutka tanah tusur laban ujan ti nadai ngetu ke mega ngebahka menua nya kenyau ari kemari.

Pemesai Bilik Operasi Ampuh Bah Sitak Samarahan, Ali Abdullah lebuh ditalipaun Utusan Borneo ngalih hari kemari madah, urung pukul 2.15 lemai, tanah tusur nya bisi ngerusakka dinding mesjid nya.

Ali mega madah, sekeda rumah kampung di Sebuyau mega ampuh laban bah. Sekeda bala orang kampung ke ampuh nya mega udah dipindah ngagai alai ti tinggi agi.

Menua bukai ke balat ampuh bah sehari kemari nya baka di Serian ke endang semampai kena tinggang penanggul ampuh bah ngelamatu. Ambika banding kampung Melayu baka Kampung Hulu, Serian endang mina endang genap taun kena penanggul ampuh bah. Taun tu mega sida nya kena tinggang penanggul ti sama.

“Ngagai jam pukul 3 lemai kemari bisi 75 pintu bilik dalam Sitak Samarahan udah dipindah ngagai palan alai numpang bala sida ke tasah nya ba sebelah menua dalam sitak tu,” ku Ali madah.

Ku iya nambah, bala sida ke mayuh dipindah nya bala sida ba Kampung Lintang, di Serian ke alai 45 pintu bilik udah dipindah ngagai Mesjid Serian.

Kena nyerita enggau terang agi pasal sekeda penanggul ampuh bah ke ninggang bala rayat di Kuching, Bau enggau Serian sehari kemari, kami mantai mayuh gambar ba lambar tu.