Bala Rh Likong enda ngadang ngelama nya nganti pampas rumah ke taban tanah tusur

KAPIT: Penusah tanah tusur ke nyadi ba genturung rumah orang kaya ba Bukit Antarabangsa Ulu Klang, Kuala Lumpur apin lama nyaup kitai mulaika pengingat pasal siti penusah ke sama ke mimit da agi nabanka nyawa semua orang 20 pintu ke nguan siti rumah panjai, iya nya Rumah Likong, Tatai Sempaong, Jalai Lepong Baleh kena 28 Disember 2006, pukul 10.10 malam. Reti nya tu genap kedua taun insiden nya udah nyadi.

Insiden nya ukai mina siti pekara ke enda ulih lenyau ari pengingat sida serumah nya, tang mega mengkang nyadi mimpi jai ngasuh sida remban laban semaya danji ari kontraktor ke deka mayar pampas sida lalu nadai.

Maya penusah nya nyadi dalam 2006 suba, bisi 20 pintu rumah panjai nya abis taban tanah tusur ari bukit atas rumah sida beduduk ari pengawa kontraktor ngaga Jalai alun Fasa I Melekun-Nanga Gaat.

Ripot pasal insiden nya mayuh bendar udah digaga lalu nerima perati ari bala ketuai rayat mayuh di menua ditu, nyengkaum ketuai politik sereta mega raban ukai perintah (NGOs).

Tekala nya suba PPES Works Sdn Bhd enggau Shin Yang Sdn Bhd, kontraktor ke bem[u tanggungjawab lalu berengkah enggau pengawa ngupas sereta meresi kandang menua ke balat rusak laban tanah tusur nya baka muai reba enggau tanah tusur ke ngalitka menua nya.

Kontraktor nya mega udah ngaga dampa alai sida serumah nya ngendap dulu ba atas tanah enggi siku ari sida serumah nya tang diatu orang empu tanah nya udah ngasuh semua sida 20 pintu nya mindah.

Ka tambah nya, sida ari Kompeni PPES Work Sdn Bhd enggau Shin Yang Sdn Bhd mega besemaya deka mayar pampas ungkup semua pengerugi bala sida 20 pintu nya lalu udah dipada ngagai Opis JKR.

Siti kemplin tauka ripot polis mega udah dikenataika besengkut paut enggau insiden nya.

Kemari Tuai Rumah Likong Indang enggau bala kaban Komiti Pemansang enggau Pengelikun Pendiau (JKKK) dia mutuska runding deka mantai pekara tu (semaya danji apin nyadi nyata) ngagai media udah sida meda nadai tauka lalu apin bisi pemansang dalam penanggul sida ke patut diaduka ulih kompeni ngaga jalai alun (Fasa I, JalaiMelekun-Gaat).

“Kami minta kasih ari perintah masuk champur lalu ngansak sida kompeni nya (PPES Works enggau Sdn Bhd) tekalatu ngamatka danji sida,” ku TR Likong nerang.

Ku iya, taun dulu (2007) tukang kira ungkus (tauka assessor) ari siti kompeni insurans bisi datai mansik penyampau pengerugi reta tengkira laban tanah tusur nya.

Penanggul tu kala mega dianjung ngagai sida ba Opis Pelilih Menua, opis Residen sereta mega bala sida ba JKR. Tang ngagai seharitu, lalu apin bisi balas tauka saut ari sida nya. Reti nya penanggul nya lalu agi teputar.

“Utai ke ngasuh kami nangi sereta irau diatu nya laban rumah dampa alai kami diau sentara ke digaga Kompeni PPES Work Sdn Bhd enggau Shin Yang ke diatu atap sing iya nyau tuduh sereta dinding papan lapas (plywood) ke makin jai.

Serimbai enggau tu bala kaban JKKK Rh Likong udah bisi mantaika memorandum kena 9 Disember 2008 ngagai Injinia JKR Sitak Miri minta iya betatika penanggul tu enggau lengkas.