KUCHING: Bala Bidayuh kelebih agi sida ke diau di menua pesisir ditangkan ngambika enda mendingka jaku orang luar ke nguji ngachau pelin perintah ngemansangka rayat menua tu.

Sapit Kepala Menteri Datuk Patinggi Tan Sri Alfred Jabu madahka orang luar nya semina chemburu lalu deka ngachau projek perintah nengah atur pengawa ke negatif.

“Sekeda atur sida nuju adab nya baka ngasut rayat lalu aku minta ngagai bala Bidayuh awakka kita enda ningaka janji sida iya tang patut terus bekaul terit enggau perintah,” ku iya madah maya bejaku ba atur pengawa nyuaka chek ngagai Persatuan Kebangsaan Dayak Bidayuh (DBNA) ditu malam hari Empat tu tadi.

Iya madah, nadai chunto udah ngayanka orang ke nyukung orang ari luar tu mujur ba pendiau sida iya kelimpah ari bekerejasama enggau perintah.

“Kitai lalu bedau meda sapa-sapa ke udah mujur udah sida iya nyukung orang luar. Utai ke ditemu aku, semua pemujur ke diasai kitai diatu semua pengawa dikereja perintah,” ku iya.

Iya nambah suku kaum Bidayuh mega patut nemu pengelantang ke diasai sida diatu asil pengawa perintah nengah agensi baka Salcra.

“Tiap taun Salcra magi dividen ngagai sida ke besereta dalam projek pemansang tanah kena bekebun sawit. Kelimpah ari meri penguntung ngagai rayat, iya mega mantu sida iya ngemunaska meskin seranta,” ku iya.

Enggau nya, Jabu ngasuh bala Bidayuh terus meri sukung sida iya ngagai agensi nya kena ngangkatka tikas pendiau sida iya.

Kelimpah ari nya, ba pengawa nya, Jabu mega bisi nyuaka cek dalam penyampau RM50,000 ngagai DBNA kelimpah ari bejanji deka meri geran projek mit menua pesisir (MRP) RM25,000 ngagai gerempung tu taun baru tu ila.