MIRI: Kuli ladang sawit bansa Indonesia ke ngamuk kena 24 Mei 2006, lalu munuh pangan semenua enggau ngeluntang bangkai iya sembilan lumpung, kemari dilepas ari dawa enggau pechara laban Court Tinggi nemu iya enda manah untak.

Saspek diperintah dipasuk ngagai sepital orang tuyu untak baruh peneka ati enggau penyiru Agong.

Akim Dato Zulkifli Bakar ngeletak perintah nya kemari udah ninga semua pechara enggau kes ari sepiak penawa enggau luya pengetan.

Iya madah, saspek amat munuh tudah ke parai nya, tang pengayan tauka bukti ngayanka saspek ba maya iya ke didawa munuh nya endang enda betul untak, lalu enda nemu nama ulah ke digaga iya (munuh), ka tambah enda nemu pengawa nya salah sereta ngelanggar adat.

Dulu ari nya, luya ngetan William Ding minta Consultant Psychiatrist, bekau Pengarah Sepital, Sepital Sentosa, Kuching Dr Abd Kadir Abu Bakar meri pemadah netapka iya amat enda betul untak.

Abdul Kadir netapka saspek amat bisi dipasuk ke Sepital Sentosa Kuching 6 Jun 2006 udah perintah ari court 29 Mei 2006.

Iya bisi interbiu Kamaruddin 30 ngagai 45 minit lalu ngemataka ulah iya. Saspek nya lebuh dibai ngagai Sepital Sentosa, enggai bejaku lalu ngayanka ulah enda menuku sereta ukai utai patut dikereja mensia menyana.

Lutur madah, siti interbiu ke diatur lebuh saspek diberi bius ngayanka saspek bisi penanggul semampai ninga jaku orang sereta bisi runding dipedis orang sereta ngasai diri semampai digiga laban bisi orang ka ngemedis iya.

Abd Kadir madah iya beguai ngubat saspek laban meda iya nadai tentu meruan, nyengkaum ngena therapi ‘electro-convulsive’.

Udah saspek bisi respons ngagai chara ngubat tu ke alai seduai mula berengkah bisi kaul enggau pangan diri.

Ku Kadir, Kamaruddin, hari nya ngayanka ulah enda tentu ngena, bala nantai jari iya nadai tentu pasal, bediri baka robot, dalam reti penemu tauka jaku psychiatry dikumbai ‘Catatonia’.

Kamaruddin madah ngagai iya (Dr Abd kadir) bisi nyelai runding maya nya. Iya madah nembiak ke dibunuh iya nya merening iya baka sitan lalu madah mua tudah ke mati nya betukar nyadi mua jelu.

Udah nya Akim nanya Dr Abd Kadir: “Lebuh ngubat iya, dalam penemu pakar, kati saspek nemu diri ngereja penyalah jenayah.”

Kadir nyaut: “Iya sigi nemu.”

Akim Zulkifli: “Kati saspek nemu sigi salah munuh orang?”

Kadir : “Saspek nemu sigi salah munuh orang, lalu iya bisi nyebut, ‘aku munuh, aku salah, aku patut digantung.”

Udah nya luya Willim madah sepiak penawa patut bepanggai ba bukti ari Dr Abd Kadir. Saspek bisi penyakit enda betul untak lalu penyalah ke dikereja iya nya munyi kes ke udah disebut Dr Abd Kadir, chukup relevan, betul sereta enda ulih dilaban. Saspek tinggang penanggul schizophrenia ngujungka iya enda nemu nama utai dikereja diri salah ba adat.

Sapit Penawa Besai Musli Abd Hamid mantai bukti ari Dr Abd Kadir ngayanka saspek enda manah untak, enda nemu utai dikereja diri lalu ngumbai tudah pangan ke dibunuh iya nya siku jelu.

Dalam kes tu, saspek didawa ngereja penyalah nya kena pukul 7.07 lemai kena 24 Mei, 2006, ba ladang sawit SOPB Lambir 1 di Bekenu. Iya didawa ngujungka pemarai Dahlan Senya, 29, ari Sulawesi Selatan. Dawa nya difail baruh Genteran 302 Tusun Ukum ke ngungkupka gantung sampai mati mandatori enti ditemu salah.

Konsul Besai Republik Indonesia Bambang Prionggo sama bisi datai ninga pechara nya ba court.