KUCHING: Rayat menua tu patut ngintu penatai ai enti sida iya deka ngulihka bekal ai ke udah diubat ke bisi kualiti enggau nitihka rega ke patut, ku Menteri Kedua Atur Penemu enggau Pengintu Pemisi Datuk Amar Awang Tengah Ali Hasan.

Iya bejaku maya bejadi Loji Perawatan Air Kampung Annah Rais, Padawan kemari, Awang Tengah madahka kos ke tinggi diguna kena ngubat penatai ai ke nadai kualiti dataika iya ngenusah rayat.

“Enti kualiti ai nya manah, kos ngubat pan murah. Barang kena kitai pan baik chara retikulasi tauka alternatif dikena mai ai ke udah diubat ngagai rayat, penatai ai patut dijaga enggau manah.

“Anang ngaga aktiviti tu tau ngerusak penatai ai nya nyadi kamah, enti enda kos ngubat kena tuju diguna tiap hari nya tinggi, ke rugi rayat empu ,” ku iya.

Kelimpah ari nya, Awang Tengah madahka sebarang aktiviti ngamahka penatai ai mata ba menua tu patut diripot ngagai sida ke bekuasa awakka bisi atur ulih diadu enggau jampat.

“Enti penatai ai mata nya diintu enggau manah, bekal ai beresi enggau diubat ulih diberi ngagai mayuh agi sitak menua pelilih ba ulu sungai enggai tebing sungai.

Bejaku pasal sistem bekal ai alternatif kena orang mayuh ke diau ba menua pesisir ba menua tu, Perintah Menua deka mansik teknologi bekal ai beresi lalu ngena chara ke patut awakka 70 peratus orang mayuh ke diau ba menua pesisir ulih ngena ai beresi ba ujung RMK-9.

“Kediatu semina 55 peratus orang mayuh ke diau ba menua pesisir bisi bekal ai beresi.

“Enda semua sistem bekal ai alternatif ulih kena ba semua menua pesisir ba menua tu laban tu ketegal penanggul geografi kelimpah ari kampung tauka menua pesisir ke enda sama rata lalu iya jauh ari pangan diri,” ku iya.

Ba jaku iya mega, Awang Tengah madah ngagai orang mayuh ke diau ba sitak menua pesisir enda ngasuh sida iya arapka propaganda sekeda orang ke semina bisi pemerat ba diri empu enggau politik.

Iya madahka propaganda nya betuju deka ngachau runding rayat ke kadang-kadang bisi musin iya empu lalu ke terang agi maya bepilih besai.

“Enti rayat arapka propaganda tu, sida iya rugi kelimpah ari ngasuh sida iya bepechah entara suku kaum ke pengujung iya tau ngerusakka politik ke stabil enggau ekonomi mega.

“Politik ke stabil, ekonomi enggau penyerakup ke kering siti kunchi pemujur enggau ubah ke positif,” ku iya.

Kelimpah ari nya, Awang Tengah madahka kerejasama ke trit entara perintah enggau rayat sigi berat awakka tu tau ngasuh semua atur pemansang ulih digaga baka ke udah dipelin.

Kelimpah ari nya, projek bekal ai ba Kampung Annah Rais nyadi loji ngubat ke terubah iya ngena chara napis membran ultra ke bisi kapasiti 5,000 liter sehari.

Iya digaga Group Engineers Sdn Bhd enggau kerejasama ERABA Corporation ari Jepun kena nganti bekal ai ari (tekanan) graviti ke dikena orang mayuh sebedau tu ke diau ba rumah panjai nya.

Projek ke sebaka nya mega udah digaga ba Stass Bau, Marudi enggau Limbang lalu pansik enggau silik agi kena tuju tu digaga manah agi deka diatur awakka orang mayuh ba menua pesisir bulih penguntung ari sistem alternatif tu.

Sama bisi datai Menteri Muda Pemansang Menua Pesisir enggau Menteri Muda Perengka Guna Mensia Mayuh Datuk Ambrose Blikau, Menteri Muda Bekal Ai Sylvester Entri, Kaban Kunsil Nengeri Tarat Roland Sagah, Residen Kuching Rodziah Mohd Morshidi enggau Pengarah Urusan Group Engineers Malaysia Sdn Bhd Kuek Eng Mong.