KUCHING: Projek injin turbin gis Pemansang Pemeresi enggau kena Ngurangka Kesuh Asap Berachun (CCGT/CDM) ke benung digaga di Bintulu ke ngena ungkus RM365 juta, deka dibuka dalam bulan Ogos taun baru tu ila, dipelaba ulih ngurangka karbon dioksida datai ngagai 600,000 tan setaun, kelimpah ari nambah kapasiti karan kena sitak nya ngagai 110 megawatt lalu kena ngulihka kapasiti penuh datai ngagai 330 megawatt.

Pengarah Sarawak Power Generation (SPG), Tan Sri Datuk Amar Abdul Aziz Dato Husain madah projek nya asil kerejasama Mistubishi Corporation, ke nyadi pengari lalu ngereja semua keretas kereja ke mega bisi peneleba minta pemendar ba renggat Perintah Menua enggau Jipun sereta Gerempung Bansa-Bansa Bersatu (UN).

Projek teknologi CCGT tu keterubah iya ba Sarawak kelimpah ari nyadi siti projek injin turbin gis Pemansang Pemeresi enggau kena Ngurangka Kesuh Asap Berachun (CCGT/CDM) ke pemadu besai ke udah dikemendarka Perintah Menua Malaysia.

“Projek di Bintulu tu siti projek rampa menua ke berat ba Sarawak Power Generation (SPG) laban iya ulih meri bekal karan kena ngemenuhka peminta ke makin mayuh ba Sarawak, lalu iya enda ngamahka angin,” ku iya madah ngagai sida pengarang berita udah bejadi atur pengawa Nyain Sempekat CCGT/CDM kena projek nya ba Bintulu sereta Sempekat Meli injin kena Ngurangka Kesuh Asap Berachun (ERPA) di Wisma Sesco, kemari.

Iya madah enggau projek (CCGT/CDM) ke ngena labur RM365 juta nya, iya mega deka ngangkatka pemanah sistem kena ngangatka loji nya ngagai 50 peratus bebanding enggau 30 peratus diatu.

“Laban tu nadai ngena sebarang bukai ba utai ke ditunu kena nambah kuasa, nya alai kitai deka masang dua iti jinarita ngaduka pengangat sereta mayuh macham perengka bukai kena ngulihka baru ngangatka pengamah ke dibuai ngagai 550 degri celcius ari dua turbin (iya nya 7 enggau sebedau ditukar ngagai bekal karan,” ku iya.

Abdul Aziz madah nitih enggau atur projek nya, penyerakup tu deka ngambi orang gawa enggau ngelatih 31 iku orang baru ari tiap renggat kena bejalai lalu terus ngangkatka tikas pengelandik orang ke gawa ba ditu.

“Aku arap enggau pemendar ke udah dikeluar ulih Perintah Menua Jipun enggau Perintah menua Malaysia, ke dikeluar kena 20 Jun enggau 13 November, projek tu enggau mujur deka direjista enggau Peraturan Rangka Kerja Mengenai Perubahan Iklim Pertubuhan Bangsa-Bangsa Bersatu (UNFCCC) tengan bulan Jun taun baru tu ila,” ku iya.

Sama datai ba atur pengawa Nyain Sempekat nya kemari, Presiden Mandal sereta Menijer Besai, Unit Pengurangan Pencemaran Perniagaan, Bahagian Perniagaan Tenaga Baru dan Alam Sekitar, Mitsubishi Corporation, Tokyo, Jipun Ichiro Keida, enggau Ketuai Eksekutif Mitsubishi Corporation di Malaysia Junichi Iseda.

Dalam berita bukai, Rayat menua tu patut ngintu penatai ai enti sida iya deka ngulihka bekal ai ke udah diubat ke bisi kualiti enggau nitihka rega ke patut, ku Menteri Kedua Atur Penemu enggau Pengintu Pemisi Datuk Amar Awang Tengah Ali Hasan.

Iya bejaku maya bejadi Loji Perawatan Air Kampung Annah Rais, Padawan kemari, Awang Tengah madahka kos ke tinggi diguna kena ngubat penatai ai ke nadai kualiti dataika iya ngenusah rayat.