Kepala polis enda setuju enggau petenah orang ke madah sida enda bejalaika pengawa

KUCHING: Kepala Polis Sarawak Datuk Mohmad Salleh enda setuju enggau dawa orang mayuh ke madah polis enda bejalaika pengawa sida iya nagang pengawa salah lebuh nadai ngaga sebarang tangkap.

Iya madah kebuah siti-siti kes nya lubah diputarka bepun ari polis ngemeratka kes ke besai agi lalu patut dikira enggau serius.

“Kami pan bisi maya betunga enggau pengurang raban ke ngujungka kami mutarka kes nitihka pemerat siti-siti sitak,” ku iya madah maya betemu enggau iya udah abis atur pengawa nyerah-nerima pengawa Kepala Opis Tasat Pengawa Salah Komersil (JSJK), ditu kemari.

Iya madah polis deka terus bejalaika pengawa nagang pengawa salah kena ngelala gerempung ke bisi ngereja pengawa salah ba menua tu.

“Pengawa baka tu deka terus diungkupka enda ngira bisi pengawa salah tauka nadai,” ku iya.

Kelimpah ari nya, Mohmad madah, atur ke trit deka diatur ke raban polis ke enda bejalaika pengawa sida iya enggau manah lalu tu mega ngungkupka sida ke laun datai ba endur ke bisi penusah.

“Enti pekara baka tu amat nyadi ketegal salah raban polis empu, kami deka meri atur ke trit ngagai raban polis tu.

“Sebedau ngambi sebarang atur ke trit, kami deka mansik dulu lalu meda bakani pekara baka tu tau nyadi,” ku iya.

Kelimpah ari nya, pengawa Kepala JSJK Kontinjen Sarawak diatu dipegai Superintenden Mohd Firdaus Abdullah @ Vincent ke nganti alai Superintenden Willey Richard. Enggau tu, Willey deka bepindah ngagai Bukit Aman nyadi Ketuai Unit Tasat Pengawa Salah Koperasi lalu Firdaus deka gawa ba Kolej Polis di Cheras.