KUCHING: Polis nangkan orang mayuh awakka sida iya enda kena tipu enggau siku lelaki ngaga diri nyadi ejen ngambi orang gawa driba bilun ke siti kelab bilun.

Opis Tasat Pengawa Salah Komersil (JSJK) madah munyi tu nengah surat ngagai media kemari, madah saspek ke dikelala enggau nama Hamizan Mohd Syafiq umur urung 20 taun bekulit burak lalu mua iya nyauka baka gamal Cina.

Lelaki urung 5 kaki 6 inci nya dipadah beoperasi kediri lalu deka meri kelala pasal iya empu ke nyadi kapten ari kelab bilun ke bepalan di Selangor.

Polis ngeluarka surat nya udah siku lelaki, 4 November tu tadi, rugi mata duit RM5,000 kena tipu saspek nya.

Maya nya, lelaki nya ngelala saspek ari siku pangan iya.

Saspek nya lalu madah diri nyadi kapten siti kompeni bilun di Malaysia lalu madah ngagai lelaki nya ngasuh iya belajar ba siti kelab alai orang belajar mai bilun, ngerijista lalu mayar semina RM5,000.

kena iya ngasuh lelaki nya arapka iya, saspek nya madahka iya ulih ngena duit saspek dulu lalu dudi hari lelaki nya tau mupuk-mupuk mayar iya.

Udah ningaka pemadah saspek nya ke ngasaka ati iya, lelaki nya lalu besetuju.

Kena 20 November tu tadi, lelaki nya bisi talipaun kelab nya deka ngechek pasal rejista nama iya tang orang ari kelab nya madah nama iya nadai dalam lis sida iya.

Nitih ku kelab nya, saspek kala nyadi pelatih ngajar orang mai bilun tang iya udah setaun tu nadai ngajar agi lalu udah dibuai kereja kelab nya.

Lelaki nya nyau tekenyit ninga saut orang nya lalu iya terus ngaga ripot polis.

Nitihka pemadah ke diterima, saspek mega dipelaba nipu bala indu laban ngumbai diri bisi gamal enggau status iya ke nyadi kapten kena iya nipu bala indu lalu terus ngikis reta enggau duit sida iya.

Kes nya benung ditasat polis ba baruh Genteran Tusun Ukum 420 Kanun Keseksaan (Nipu enggau pemula ke ngejungka orang nya nyerahka reta sida iya) lalu ke iya ditemu besalah iya tau diukum jil enda kurang ari setaun lalu enda lebih ari 10 taun besereta, kena sipat enggau kena denda.

Polis agi bejalaika tasat bekait enggau kes tu lalu benung ngiga saspek.

Barang sapa ke bisi pemadah pasal tu tau nalipaun ngagai Pegawai Tasat ari Opis Tasat Pengawa Salah Komersil Ibu Pejabat Polis Daerah (IPD) Kuching Inspektor Khalid Yahya ba lumur 082-241167 sambung 106.

Opis JSJK madah nengah surat kemari, madah saspek ke dikelala enggau nama Hamizan Mohd Syafiq umur urung 20 taun bekulit burak lalu mua iya nyauka baka gamal Cina.