SIBU: Dua beranak dipasukka ngagai Unit Siru Berubat (ICU) sepital Sibu, pengudah seduai tinggang penanggul eksiden ba simpang empat Lorong Emplam.

Tudah seduai dua iku sama penama Kong, umur 57 enggau 14 taun ditaban berubat ngagai sepital nya ngena sebuah ambulans udah bekau bisi orang mayuh talipaun minta bantu beguai.

Berita pengabis dudi diterima ari Sibu kemari, netapka apai tuai nya (Kong,57) parai ba ICU urung pukul 1.45 ngalih hari laban kelalu balat bakal ba pala. Tudah anak indu iya munyi ke nadai tentu ngawa, lalu udah diasuh pansut ari sepital laban ke rabatka niang apai iya.

Dalam insiden ke nyadi urung pukul 7.30 pagi kemari, tudah seduai dua iku nya ngena mutosikal datai ari tunga Lorong Emplam lalu benung mansang ngagai tunga puak pasar ditu.

Tang lebuh seduai nya datai ba simpang empat nya, sebauh luri ke datai ari tunga Jalai Hua Kiew mansang ngagai Jalai Tiong Hua lalu ngelanggar mutosikal ke ditepan seduai menyanak nya.

Tegal kena tempuh luri, tudah seduai dua iku ke benung masang ngagai alai gawa, lalu labuh ari mutosikal sereta semedup terengkah ba atas tengah jalai alun

Mensia mayuh ke meda penanggul nya nyadi lalu talipaun ngangau ambulans minta bantu.

Nyadi driba luri nya ke tengan umur penuai, nadai bakal tauka pedis tang dibai ngagai palan polis dulu laban dipinta meri penyata dulu.

Ba siti kes bukai, siku nembiak lelakui umur 17 taun balat bakal ba pala udah bekau mutosikal ke dibai iya enggau siku pangan indu belantak enggau sebuah kerita bansa Perodua Kancil.

Pekara nya dipelaba nyadi urung pukul 10 pagi kemari ba simpang lampy trafik berapa meter ari Jembatan Igan.

Lebuh nya, Mohd Sulaiman ke driba mutosikal benung dalam pejalai ke puak nengeri ari Sungai Bidut.

Taja pia, ngagai maya berita tu ditulis lemai kemari, pun kebendar pekara tu nyadi agi mengkang apin temu, lalu tasat mengkang dipejalaika.

Tudah tuai ke bakal nya lalu beguai ditaban berubat ke sepital Sibu ngena ambulans ke beguai dianjung datai kia , udah bekau bisi dipansa bala mensia mayuh.

Nyadi pangan indu tudah tuai ke apin ditemu nama mina bakal mimit aja.