KUCHING: Penyampau kes kemplin ti diterima Biro Nerima Kemplin Rayat Mayuh tauka Biro Pengaduan Awam (BPA) ukai reti sistem atur pengawa ajensi perintah enda manah, tang iya ngayanka rayat betatika pekara tu.

Sapit Ketuai Pengarah (Kemplin) BPA Md. Zin Musa madah, mayuh macham chara alai madah enggau peluang udah disedia perintah kena orang mayuh ngenatika kemplin, meri penemu enggau mantaika penanggul sida iya chara tebuka sereta terang.

Iya madah, pemayuh kemplin ngayanka rayat bepenemu lalu tu ngayanka sida iya nemu atur pengawa BPA.

“Ngagai bulan Oktober taun tu, BPA bisi nerima lebih kurang 6,600 iti kemplin ari rayat ari serata menua tu kelebih agi ngemantaika kemplin sida iya betangkup enggau opis sereta agensi perintah. Ari nya, 79.4 peratus mujur diputarka.

“Taja pia, agi bisi 42 peratus iti kes kemplin agi bedau diputarka…pemayuh kemplin tu bekait enggau kemplin kes laun mutarka penanggul kelebih agi ba opis sereta agensi ti besangkut paut enggau orang mayuh,” ku iya madah maya betemu enggau pengarang berita udah tembu pengawa bejadika Kaunter Kemplin Segempung Mindah tauka Aduan Bergerak Bersepadu (KABB) ba Tebing Kuching ditu, kemari.

Sama bisi datai ba pengawa nya, Pengarah BPA Menua Phillip Stephen Shim enggau Mandal Pengarah Ramlan Hussein.

Ba jaku iya dulu agi ari tu, Zin madahka sepemanjai timpuh taun 2007, BPA nerima kemplin ari mayuh bengkah chara baka ngena laman web (42 peratus), KABB (14 peratus), surat (12 peratus), kaunter pemadah (sembilan peratus), datai betunga tauka betemu mua ba opis perintah empu (lima peratus), program mesra rakyat (lima peratus), talipaun (empat peratus), emel (tiga peratus) enggau pekara bukai (satu peratus).

Kelimpah ari nya, Zin madahka sebarang kemplin ukai pekara ke muntang diputarka, tang taja pia chara ngadu kemplin ti manah tau nyadi siti ari faktor atur pengawa opis perintah ti tinggi kualiti.

“Enti deka ngaga manah agi program enggau atur pengawa, opis enggau ajensi perintah patut nemu nama utai kedeka orang mayuh ti datai ngagai opis perintah sereta bakani enggau ni penyauh opis sereta ajensi perintah ulih ngemenuhka peminta orang mayuh. “Pengelandik ngemutarka pemun kemplin ulih ngurangka kemplin sereta enda lantang ati orang mayuh bekait enggau atur pengawa ti dikereja sida iya,” ku iya nambah baru.

Kelimpah ari nya, Zin madahka sida ti bepengelandik enggau bepenemu patut nyadi orang tengah ngulih enggau meri pemadah ke ngena sereta betul besangkut paut enggau ajensi perintah.

“Aku ngasaika tu pekara berat laban runding ke salah enggau negatif ke nadai pemendar ba ajensi perintah patut diseliahka,” ku iya.

Lebuh ditanya pasal penyanggup BPA ti besedia ‘turun padang’ kena ngemutarka sebarang penanggul ti dibantai rayat nyengkaum nyadi ‘orang tengah’ ba kes minta bayar entara kontraktor enggau perintah, iya madah pekara tu ba luar tanggung pengawa iya.

Hari Empat tu tadi (20 Nov), Sapit Menteri ba Opis Perdana Menteri (JPM) T. Murugiah madah BPA sedia nyadi ‘orang tengah’ kena ngemutarka penanggul kontraktor ti lalu bedau dibayar perintah, ngasuh sida tu datai betemu enggau opis ti bempu tanggung pengawa nya.

Murugiah nambah, pemayuh kemplin ti diterima BPA menua tu dikira enda mayuh nyangka orang mayuh bedau entu nemu pasal atur pengawa opis enggau ajensi tu ti baru ditumbuhka ba taun 2007 di Kuching.

“Bisi 243 iti kes kemplin diterima BPA Sarawak bisi dirikot belabuh ari bulan Januari ngagai 20 November 2008 bebanding enggau 231 iti kes sepemanjai taun 2007,” ku iya lalu nambah, 96 peratus kes taun tu mujur diputarka, lalu semua kes ti dikemplin ba taun 2007 mega udah diputarka.

Sekeda kes ti bisi dikemplin bekait enggau opis perintah ba menua tu baka opis menteri nyengkaum ari Opis Menteri Pengangkut, Pelajar sereta Pengelikun Dalam Menua (KDN), ku iya.