Penanggul tu nyadi tegal anak mit diatu kelalu gemu sereta nyamai bulih utai dempa

KUCHING: Penyakit diabetis tauka kemi manis siti penyakit raya ke tau nyerang enda ngira renggat umur nyengkaum anak mit baru ada, anak mit benung mansang tauka nembiak.

Ba sekeda anak mit, enti penyakit tu laun temu, iya tau ngasuh penusah ke balat agi nyengkaum ngerusak untak.

Bisi maya nyakit tu enda dikemeratka lalu semina dipadah renga tauka diteju baka nya aja,” ku Sapit Pengarah Opis Pengerai Menua, Dr Faizul Mansoor madah maya bejaku ba pengawa Nyambut Hari Diabetis Dunya Renggat Menua 2008 ditu, kemari.

Beserimbai enggau pengawa tu ke ngena jaku rambai, ‘Diabetis ba Nembiak Mit (Diabetis di Kalangan Kanak-kanak)’, iya ngemeratka tanggungjawab renggat mensia baka apai indai, chigu sekula, orang gawa ba Opis Pengerai tauka barang orang bekait enggau pengawa ngintu anak mit patut nemu enggau ngelala tanda penyakit diabetes tu baka selalu kemi malam hari, selalu aus, turun berat tubuh, selalu lelak, enda entu meda, mutah tauka pedis perut.

Faizul madah pengerai mensia mayuh siti pekara ke berat kelebih agi bekait enggau penyakit diabetis enggau chara nagang kena tinggang penyakit tu.

“Seagi-agi berat tubuh nambah lalu nadai eksais sereta rindu makai, tau ngasuh orang kena diabetis kelebih agi enti diri sebilik sigi peturun orang ke kena penyakit kemi manis.

“Kemaya hari tu nadai ngira umur orang kena diabetis…orang umur 30 taun tau meh kena penyakit diabetis.

“Kelebih agi diatu pendiau kitai enda sebaka baka suba, utai pakai kitai mayuh macham bansa, nyamai dempa lalu orang pan jarang ka eksais. Enti orang mayuh bisi tabiat pendiau baka tu, manah kita bejaga, ngintu pengerai kitai empu, nurun ke klinik betemu enggau lutor ngechik pengerai kitai, lalu anag neju nyau laun,” ku iya.

Taja pan Faizul nadai statistik pasal bansa ni ke mayuh agi kena penyakit diabetis, iya madah penyakit tu enda ngira renggat umur tauka bansa.

“Diabetis enda ngelala renggat umur tauka bansa…asal aja nuan kuat makai, enda eksais tetap tau kena penyakit tu,” ku iya lalu nambah diabetis ukai semina naka nya aja, penyakit tu mega tau ngejungka orang kena tinggang penyakit stroke, darah tinggi, sakit ulu sengayuh (buah pinggang), buta enggau mayuh penyakit bekait agi.

Ba diabetis ke ninggang nembiak mit diatu, Faizul madahka enti nadai kuntrul ba penyakit tu, iya tau ninggang nembiak mit datai ke sida besai deka ngidap penyakit tu tauka nanggung komplikasi ketegal diabetis.

“Tu tau ngerugi produktiviti menua,” ku iya.

Berindik enggau tu, Opis Pengerai Menua enggau kerejasama Gerempung Diabetis Malaysia (Pampang Sarawak) deka ngatur sekeda aktiviti kena orang mayuh baka ngechek pengerai enggau pechuma, forum kena orang mayuh, pameran pengerai enggau nyadungka risalah pengerai belabuh ari kemari ngagai saritu ba Dewan Komuniti Kenyalang Park.

Sama bisi datai ba pengawa nya, ke diatur ulih Opis pengerai Menua Sarawak enggau Gerempung Diabetes Malaysia (Pampang Sarawak), Dr Kok Juan Loong ari Opis Paediatrik, Spital besai Kuching (Hospital Umum Sarawak tauka HUS) enggau Ketuai Misi Opis Berubat, HUS Dayang Diun ba Dewan Komuniti, Kenyalang Park ditu, kemari.