KUCHING: Dewan Hotel Crowne Plaza Riverside chapuh laban orang mayuh ketawa meda ulah dua iku orang ke tebilang ba filem enggau sitcom, Harith Iskandar enggau Douglas Lim bejenaka merindang orang mayuh malam kemari.

Harith enggau Douglas ngaga pengerami merindang orang mayuh enggau mayuh macham jenaka lalu mayuh udah bejalai ngagai serata menua tu.

Pengerami malam nya belabuh enggau Douglas ke merindang lebih kurang 700 iku orang mayuh ti bisi datai ari serata Nengeri Kuching.

Douglas ti kala belakun dalam sitcom Kopitiam merindang orang enggau komedi nusui ulah rayat Malaysia lebuh meda wayang, betalipaun enggau chelak rumpak.

Dewan chapuh agi lebuh Harith enggau gaya baka iya empu merindang orang mayuh enggau jenaka iya.

Harith merindang orang mayuh enggau komedi bekait enggau ulah rayat Malaysia, isu kemaya hari tu enggau nunda orang ke berambai.

Douglas seduai Harith sama merindang orang mayuh enggau sekeda lagu komedi maya nyauka abis program nya.

Pejalai komedi serata menua nya diatur Tall Order Productions Sdn Bhd ke dispunsa Celcom.

Sebedau pengerami komedi datai di Kuching, Harith enggau Douglas ngaga merindang orang mayuh di Kota Kinabalu 3 November enggau Miri 8 November.

Udah abis pejalai ngagai tiga nengeri tu, program nya deka diatur di Pulau Pinang enggau Kuala Lumpur.

Penatai Harith enggau Douglas ngaga pengerami merindang orang mayuh ngena jenaka serata menua tu belabuh ari Sabah. Ari nya seduai iya ke Miri lalu ke kemari di Kuching, ditu.