KUCHING: Menua ASEAN patut bekerejasama kena mai mayuh agi kompeni bilun tambang murah ngagai sitak tu, ku Menteri Muda Pengawa Dagang Temuai Hamden Ahmad.

Iya madah, komitmen menua ASEAN ngagai atur penuh polisi langit tebuka sebedau taun 2015 tetap deka mai mayuh agi kompeni bilun tambang murah nyendiaka servis baka tu ba sitak ASEAN.

Kelimpah ari atur perintah deka terus meri awak ngelunggarka agi penyekat sempadan baka atur bebas visa kena orang ari menua ASEAN ke nemuai ngagai 10 iti menua bukai ba ASEAN, atur langit tebuka deka mantu ngangkatka penumbuh pengawa dagang temuai ba sitak menua tu.

“Promosi enggau atur pengawa begulaika baka tu, deka ngangkatka pengawa dagang temuai ke deka meri penguntung ngagai menua ASEAN awakka kitai deka terus bekunsi pemisi enggau pengelandik ke di kemisi kitai,” ku iya madah maya bejaku ba pengawa makai lemai ke diatur Opis Menteri Pemansang Bandar enggau Pengawa Dagang Temuai ke raban delegasi aum Jawatankuasa Bertindak ditu, malam hari Lima tu tadi.

Iya madah, enti tiap iti menua ASEAN ulih ngatur promosi pakej begulai baka nyerakupka mayuh macham destinasi ba sitak menua tu, ASEAN deka terus ba penuduk iya ke kuat kena narit mayuh agi temuai.

Sebedau nya, Hamden madah industri pengawa dagang temuai nyadi penyukung ke besai ngagai pemansang ekunumi Malaysia.

Iya madah, pemayuh temuai entarabansa ngagai menua ASEAN udah ngerikod lebih 50.8 miliun temuai ba ujung taun 2005, ke ngayanka penambah tu lebih ari 4.8 peratus ari taun 2004.

“Malaysia ngerikod penatai temuai pengabis tinggi ba entara menua ASEAN ari 15,703,496 ba taun 2004 ngagai 16,431,055 ba taun 2005, lalu ngenyadika pasar tu balat mansang entara menua ASEAN,” ku iya.

Nya alai, iya madahka perintah menua Sarawak selalu deka bekerejasama enggau menua ASEAN bukai kena ngangkatka pengawa dagang temuai bai nengah SOSEK Malindo, BIMP-EAGA, ASEAN tauka EATOF.

“Nengah ASEAN, kitai patut bekerejasama lalu ukai besemekih enggau pangan diri , kena kitai ngangkatka pemansang industri pengawa dagang temuai,” ku iya.

Kelimpah ari nya, Hamden ngarapka delegasi ngagai aum jawatankuasa bertindak nya deka ngasaika mayuh macham peneleba ba Sarawak baka etnik, flora enggau fauna, adat sereta musik ke bisi ba menua tu.

Aum Jawatankuasa Bertindak ASEAN tu diatur tiga hari belabuh ari 21 November ba Kuching kena nyendiaka Aum ASEAN Ke-29 ke deka diatur ba Vietnam bulan Januari taun baru tu ila.

Bisi enam iti jawatankuasa bertindak ke deka bejuraika pemansang pengerembai mensia, nyual produk pengawa dagang temuai kelebih agi stindit ASEAN, gerempung kereja ASEAN, krisis komunikasi ASEAN, pelabur ASEAN, gerempung kereja bajet ASEAN enggau Integrasi Pengawa Dagang temuai ASEAN.