KUCHING: Jangkang Kepala Staf (Tadbir) Markas Tentera Udara Mindef Kuala Lumpur Brigadier Jeneral Dato Abdul Noh Mohd Said madah Tentera Udara Diraja Malaysia (TUDM) enda kala ngenusah raban baik sida ke agi gawa tauka udah pinchin.

Lebuh iya meri komen pasal jaku siku orang ke kala gawa ba TUDM dia tang udah pinchin, Faizzal Jinong Abdullah ke madah iya diperinsa sida ari opis pengurus TUDM, Noh madah pengawa pengasih raban sedadu selalu diintu enggau manah.

Faizzal, 43, apai ngagai enam iku anak, siku orang bekau raban TUDM ke udah gawa 23 taun enggau kontrak abis timpuh gawa dia 10 Oktober tu tadi.

Iya dipadah enggai bekerejasama udah iya diberi nutis ke chukup maya angkat ari alai iya diau ba Blok F 4-0-2 ba kompleks rumah TUDM ba Batu 10 1/2 Jalai Kuching-Serian, belabuh ari sehari udah abis timpuh iya gawa ba TUDM.

Noh madah, Faizzal enda bekerejasama lebuh iya diasuh angkat ari alai iya diau nya lalu madahka TUDM patut meri timpuh tiga bulan ari haribulan maya iya pinchin kena iya pindah ari nya.

Iya madahka, Faizzal mega enggai mayar bil karan ke lalu bedau dibayar berapa bulan nya udah ke bisi dalam penyampau RM1,671 ngagai Syarikat Sesco Berhad (Sesco), tang lalu ngarapka TUDM mayar bil nya.

“Faizzal enda patut ngaga ulah baka nya ke nyau ngirit TUDM ba pekara diri empu (personal) enggau Sesco ke dipadah iya ngena bil nya peneka ati iya berindik ari dawa iya ke madah penyalah teknikal masang meter enggau alai address bill iya.

“TUDM agi bebaik enggau Faizzal lalu nadai ngambi sebarang atur ke ngenusahka iya. nadai mimpi kami ka jai enggau iya. Kami nemu mega nimbang, tang kati ko gaya deh udah undang-undang,” ku iya madah ngagai pengarang berita maya aum media ba Opis TUDM ditu kemari.

Sama bisi datain dia, Pengarah Sumber Manusia Markas Tentera Udara Mindef Kolonel Wan Mazlan Jaafar enggau Komander Pangkalan TUDM Kuching Lt Kolonel Shuhaimi Abd Kadir.

Berindik ari nya, Noh ngasuh Faizzal mulaika kad sedadu iya ke agi tau dikena tauka enda ulih dikena laban nyimpan kad sedadu siti penyalah ke sapa-sapa ke ukai sedadu agi.

“TUDM besedia berandau enggau manah enggau iya kelimpah ari ngasuh iya sama sereta enggau kus kena sida ke udah pinchin lalu nyain sekeda dokumen bekait enggau pinchin awakka iya ulih bejalaika pengidup iya baka orang bukai nya mega.

“Kami (TUDM) enda ulih ngeluarka semua (faedah) pinchin iya nya nyengkaum duit pinchin enti sekeda dokumen ke berat nya bedau dikemutarka iya,” ku iya.

Noh madah Faizzal patut ngambi inisiatif diri empu datai ngagai Pangkalan Tentera Udara ngemutarka semua penanggul ke ditunga iya.

“Bakani ku iya madah kami tu ngenusah tauka merinsa ke iya enti TUDM besedia mayar semua kos pengangkut tauka bepindah pulai ngagai kampung iya ba Negeri Sembilan.

“Kami udah nyendiaka semua pekara kena iya bepinchin, tang iya madahka kami enda adil enggau iya,” ku iya nambah baru.

Faizzal di padah minta bantu ari Kaban Parlimen Bandar Kuching Chong Chieng Jen ke nitih ku Noh udah nulis surat ngagai Opis Perdana Menteri enggau Opis Menteri Pertahanan bekait enggau kemplin nya.

Maya aum media nya kemari, Chong seduai Faizzal sama enda datai taja pan udah dipadah.