Perintah deka bejuraika mayuh agi tanah baka tu dikena ngaga pemansang

KUCHING: Perintah deka bejuraika mayuh agi tanah status Seksyen 47 kena ngaga pemansang di menua tu, ku Menteri Atur Kedua Penemu enggau Pengintu Pemisi Datuk Amar Awang Tengah Ali Hasan.

Iya madah, Seksyen 47 diguna kena projek ti begunaka timpuh panjai sebedau iya ulih dikemansangka baka kena ngaga infrstruktur ti begunaka pansik enggau silik.

“Mayuh agi tanah ba menua tu ke selama tu disimpan kena tuju pemansang ba baruh Seksyen Tusun Ukum Seksyen 47 deka dikeluarka ari status nya.

“Datai kediatu, bisi 76 bidang tanah agi baruh Seksyen 47 bebanding enggau 4,000 bidang sebedau tu,” ku iya lalu nambah pemayuh tanah ti udah dikeluarka ari seksyen tu enggau perintah deka terus ngaga pekara ke sama ba tanah ti enda dikena ngagapemansang.

Iya ti ditemu sida pengarang berita udah iya bejadika pengawa muka Hari Kualiti enggau Integriti 2008, Opis Tanah enggau Survei ke semua staff Opis Tanah enggau Survei serata menua tu ti diatur ulih opis nya ba Hotel Holiday Inn, ditu kemari, madah Opis Tanah enggau Survei (JTS) Sarawak mega diasuh mansik status tanah ti agi disimpan nitihka Seksyen 47, dua taun sekali.

Tengah nambah, atur ke enda terit ngeluarka status tanah deka diberi ngagai sida empu tanah Seksyen 47 ti deka ngemansangka tanah nitihka baka ti diatur perintah.

“Seksyen 48 diatu mayuh dikena projek ti enda begunaka pansik timpuh panjai laban udah dikelala endur enggau projek ngaga sekula enggau pekara bukai,” ku iya.

Bejaku pasal mayar pulai baru tanah, iya madah sistem mayar pulai baru Tanah Adat Bumiputeta (NCR) ba menua tu chukup adil laban mayar pulai baru digaga nitihka rega tanah kediatu.

Nya alai, JTS diasuh awakka sida besedia meri pemadah kediatu ngagai orang mayuh pasal atur perintah bekait enggau mayar pulai baru tanah rayat kena nyeliahka isu ti charut ti dikemantaika orang ke enda betanggungjawab.

“Mayuh pemansang ti diatur perintah udah mujur ngangkatka rega tanah ba menua tu semekih agi bebanding enggau sekeda menua luar…rega tanah diatu datai ba RM5 juta seikar bebanding enggau RM400 urung 1970 suba,” ku iya.

Sebedau nya, ba jaku iya muka pengawa nya, iya madahka kualiti enggau integriti dua pekara ke berat ba pengawa ngangkatka sistem bejalaika pengawa ke manah kena sida ba opis perintah ba menua tu.

Iya madah, diatu mayuh jaku ke enda badas ti deka ngachau integriti pengawa perintah lebuh bisi orang enggau muntang bekaitka pengelemi ba pengawa perintah bepun ari pengawa makai suap, nyalah guna kuasa enggau nipu.

“Kena nyeliahka sangka tu, integriti enggau kualiti ba pengawa perintah patut belabuh ari renggat pemun datai ngagai renggat atas.

“Enti kitai enda ngemeratka integriti, enda bejalaika pengawa enggau manah ti udah diberi ngagai kitai, makai suap, salah ngena kuasa enggau nipu, tau ngemediska orang bukai ti begunaka tulung kitai.

“Orang ke gawa ba perintah kebendar iya nadai kuasa, tang ke meri sida iya kuasa, iya nya pengawa ti dipegai sida iya,” ku iya.

Iya madah sida ke udah diasuh bejalaika pengawa enggau manah enggau betanggungjawab di kingatka awakka sida iya enda melakangka pengawa perintah kena pemaik sida iya empu.

“Kualiti enggau pengawa manah orang ti gawa ba opis perintah patut nyadi agenda ke batang tiap kali maya gawa dataika pengawa ti diayan lebih ari ‘service beyond ordinary’ kena ngulihka pemai pengawa perintah nitihka stindit dunya,” ku iya.

kelimpah ari nya, Tengah mega meri terima kasih ngagai JTS laban undah mujur dipadu nyadi pemenang Anugerah Kualiti Perkhidmatan Awam Negeri Sarawak 2007, Tengah mega madah ngagai sida ke gawa ba opis nya ngasuh sida iya terus ngangkatka kualiti enggau integriti kena nyamin pengawa sida manah ba orang mayuh.

Sama bisi datai Menteri Muda ba Opis Kepala Menteri Mohd Naroden Majais, Sapit Sekiteri Perintah Menua Datuk Mohamad Morshidi Abdul Ghani, Sapit Sekiteri Perintah Datu Abdul Ghafur Shariff enggau Pengarah JTS Sarawak Datu Sudarsono Osman.