KUCHING: Menteri Pemansang Sosial enggau Kandang Nengeri Dato Sri William Mawan Ikom madah bala nembiak anang ngaga Tebingan Kuching (Kuching Waterfront) nyadi alai begempuru ngujungka sida iya ngagai pengawa salah.

Iya madah, enti bisi gempung nembiak besai nyangka gempung nya bisi mayuh program ti tau ngejungka sida iya ngaga ulah ke enda manah.

Iya madah baka nya maya betemu enggau sida pengarang berita ba Aum Kunsil Nengeri Nengeri (DUN) ditu kemari lebuh iya ditanya pasal nembiak berumur 17 taun ti kena bunuh ba Tebingan Kuching, hari Lima tu tadi.

“Tebingan Kuching ukai alai nembiak begempuru laban iya ulih nambahka kes pengawa salah bak ngerumpak, ngerugul enggau munuh.

“Opis menteri kami mayuh ngatur program pemansang ke nembiak lalu manah sida tu sama enggau program pemansang tu ari sida iya ngagai pengawa ke nadai menyana,” ku iya.

Mawan madah, nembiak ke selalu segau-segau sebelah nya dalam gempung ke besai ulih ngaga buli ti lalu ngujungka nyadi laya.

Nya alai, iya madah, manah agi maya sida iy bejalai, bejalai dalam gempung ke mit kena nyeliahka sida iya ari pengawa pengawa salah.

Kelimpah ari nya, Chermin Perbadanan Pembangunan Ekonomi Sarawak (SEDC) Datuk Talib Zulpilip madah, penanggul sosial ba Tebingan Kuching ulih diseliahka enti sida tu dikemeratka enggau serius sida sebilik.

Iya madah, apai indai bala nembiak tu patut nemu lalu nguntrul pengawa anak sida iya ti selalu bejalai ngagai Tebingan Kuching alai sida iya betemu.

“Kami (SEDC) udah masang masang kamera litar tertutup (CCTV) ba sekeda alai strategik Tebingan Kuching, tang ukai pekara ke mudah ngemataka ulah sida nembiak tu kelebih agi maya sida iya kia dalam gempung ke rami,” ku iya.

Bekait enggau pekara tu, Talib madah opis sida iya udah ngatur aum enggau polis, opis bekuasa menua tu, Majlis Islam Sarawak enggau sekeda agensi kena mansik Tebingan Kuching nyadi palan temuai bisi pengelikun.