KUCHING: Dewan Undangan Negeri (DUN) kemari enda nerima penemu Chiew Chiu Sing (DAP Kidurong) dalam Dewan udah iya enda ngemenuhka tiga bengkah pekara ditetapka baruh Perintah Tepat 52 ordinan DUN.

Chiew mantaika penemu pasal isu pengawa salah ba Sarawak kelebih agi di Bintulu dibantaika iya ba aum dewan sekali tu, tang Dewan nulak penemu nya laban iya enda ngemenuhka pekara ti udah ditetapka baka penyilik, penyampat enggau pemerat orang mayuh.

Speaker DUN, Dato Sri Mohd Asfia Awang Nasar madah, tiga bengkah pekara nya patut dikena mantaika penemu dalam dewan.

“Penemu nya enda nitihka atur keterubah (penyilik) laban iya ngasuh Perintah Menua enggau Polis ngambi semua atur ba semua penanggul pengawa salah menua tu kena nyeliahka pekara nya majak nyadi.

“Taja pan pemantai penemu nya nyebut pasal pengawa salah di Bintulu, tang iya nadai entu nyemetak madah bansa pangawa ke nyadi enggau atur ke nyemetak tau diambi Perintah Menua enggau Polis di Sarawak.

“Nya alai penemu tu enda ngemenuhka atur keterubah iya nya penyilik penemu nya,” ku iya madah ngagai Dewan ba aum hari Keterubah Aum Kedua Kena Penggal Ketiga DUN Sarawak ke-16 kemari.

Asfia ke mega Kaban Kunsil Nengeri (ADUN) Semop madah sigi enda ulih dikerarika kitai pengawa salah tu ngenusah orang mayuh lalu patut diputarka enggau jampat tang enti deka meda penanggul tu patut diperumban enggaika iya tau ngachau aum Dewan.

“Pekara baka tu selalu deka dibantai ke aku ngambi iya selalu disebut ba tiap aum.

“Ba aum Dewan 14-23 Mei 2007, 15 iku Kaban Kunsil Nengeri bejaku pasal isu tu nyengkaum ADUN Kidurong ti mantaika pekara tu 16 Mei 2007 suba.

“Ba aum Dewan ke-19 dataika 28 Nov 2007 12 iku kaban dewan mantaika pekara ke sebaka lalu ba aum pun taun tu (5-14 Mei 2008), 14 iku kaban dewan bisi nyebut pekara ke sama,” ku iya.

Asfia mega madah penemu nya enda mujur nitihka atur kedua, penyampat atur nya diambi sereta pemujur polis ari taun 2006 enggau September 2008 nitihka ripot polis bulan Oktober 2008.

Iya nambah ketegal penemu nya enda nitihka dua ari tiga atur ti udah ditetapka, dewan nulak penemu nya ari terus dipejuraika.

Kelimpah ari nya, Asfia madah mayuh macham atur udah diambi kena mudas pengawa salah menua tu, baka operasi entara baka mansik chara intensif, mansik ngena Kerita Nginau Polis, nemuai ngagai sektor nitihka sitak balai polis, operasi nagang pengawa salah enggau operasi nutup kelaie.

“Ba pelilih Bintulu, raban polis mega ngambi atur baka bejalaika pengawa Pasukan Gerak Am (PGA) lebuh mansik nagang pengawa salah.

“Kena mutarka kes rumah kena rumpak, raban polis ari Ibu Pejabat Polis Kontinjen (IPK) Sarawak mega diberi pengawa bejalaika operasi nagang pengawa ngerumpak.

“Unit ukui ngesah siti-siti kes baruh Ibu Pejabat Polis Daerah (IPD) kena pengawa mantu ngesah penusah ba alai pengawa nyadi.

Iya madah sekeda pemujur polis kandang nya, udah mantaika 12 gerempung wang menua bukai ti udah nangkap 41 iku raban orang salah, 37 iku dibai ngagai court, empat iku diambi adat baruh genteran tusun ukum Ordinan Sigau lalu ditan ba Simpang Renggam.

“Tujuh iku orang ari menua bukai ditimbak ba alai pengawa salah laban nguji nyerang polis maya sida kena tangkap. Kelimpah ari nya, 12 iti pistol, 46 igi strum enggau sekeda senjata tajam ulih rampas ari saspek,” ku iya.

Kelimpah ari nya, iya madah Jabatan Siasatan Jenayah Kontingen Sarawak mega ngambi atur ari pekara nasat pengawa salah.

“Atur nagang tu nyengkaum operasi nyemetak nitihka kategori penyalah baka munuh, ngerumpak, pechah tama rumah, enchuri, ngeruntun enggau enchuri kerita, ngulihka pemadah pengawa salah, ngambi atur ba sida ti ngereja pengawa salah tu enggau pengawa salah besindiket lalu kena nyeliahka sida tu ari ngaga penyalah baru,” ku iya.

“Polis mega numbuhka raban polis nyemetak kena betangkup enggau pengawa salah ke berat, nambahka agi pengawa nangkap orang ke salah enggau atur dawa.

“Ukai semina nya aja, polis ngambi atur ukai operasi baka program polis kena orang mayuh, skim orang diau sepiak enggau pangan diri, pegawai ke nyadi orang tengah sekula enggau kadet polis, rakan kop enggau mayuh agi,” ku Asfia.