KUCHING: Hari Betanam, Betupi, enggau Berikan (HPPN) 2008 ti dibuka hari Empat tu tadi ngagai saritu (hari Satu) disambut rami enggau mayuh orang ke ngagai palan nya bebelika barang tauka deka nemu enggau silik agi chara ngereja pengawa betanam, betupi enggau berikan.

Kelimpah ari nya, sida ti sama sereta muka kedai sida iya dia, bisi dalam 172 iti kedai ngayanka bemacham bansa produk betanam betupi enggau berikan nengah jalai teknologi ke baru.

Ngubah chara betanam betupi enggau berikan kena diri empu aja ngagai pengawa betanam betupi enggau berikan chara muden siti chara diasuh perintah ukai semina kena diri empu aja, tang tau mega diekspot ngagai menua bukai.

Asil iya jauh lebih mayuh enti sida ti ngereja pengawa betanam betupi deka ngereja pengawa tu enggau bebendar agi kelebih ba penatai pemisi menua tu.

Leo Mamba, berumur dalam urung 40 taun ari Gerempung Orang Bekebun Pampang Kuching – Kebun Kacangma tauka nama saintifik iya Leonurus Sibiricus L. siti bansa daun herba tradisional ti lama udah dikena orang mayuh ari suba kelebih agi ba sida ke indu ti baru udah beranak.

Pemanah daun kacangma tu manah kena pejalai darah dalam tubuh, ngemanahka agi sistem kardiovaskular lalu muai toksin ke mayuh dalam tubuh. Daun Kacangma tau dikena ngulai lauk tauka diatu mayuh digaga nyadi ai teh bekualiti tinggi lalu nadai bechampur enggau sebarang ubat bukai.

Ku Leo, kebun Kacangma dibuka ba Jalai Batu Kawa, proses iya belabuh ari ngambi daun enggau batang ke mit ari kebun nya, lalu iya deka dipilih pemanah bansa iya dulu sebedau iya dikerat lalu diinjin.

Udah nya, baru daun kacangma nya di bungkus sebedau iya dianjung ngagai pasar laban deka dijual.

Teknologi ti dikena tu semina begunaka injin kena ngaluska agi daun nya enggau siti injin agi kena mungkus. Daun kacangma di injin ba Chemson Health Product ba Jalai Kuching-Serian.

Semina belanja meli injin nya aja ke bisi mar mimit, tang enti betanam daun kacangma tu semina begunaka belanja ke mimit laban enti ngira nanam daun kacangma tu ba tanah diri empu.

Ari daun kacangma tu mega ulih dikena ngaga teh uncang (dalam beg mit), Kacangma Herbal Tea.

Chara ngaga proses teknologi teh tu diambi ari MARDI, laban teh patut bisi sukat iya empu ti nyamai diirup nitihka asai teh ke patut. Proses teh tu digulai mimit enggau Sarawak Black tea enggau lia mimit.

Leo nambah, chara proses iya sebaka enggau daun kacangma ti udah dirangkai tadi, lalu digulai enggau Sarawak Black tea enggau lia mimit, baru iya dibungkus nitihka cuan MARDI enggau Opis Betanam Betupi (JPS), disimpan dalam plastik, enggau dalam kutak.

Udah abis proses tu ila siti-siti kutak nya lalu dipasuk dalam “shribk Wrap” sebedau iya dianjung ke pasar, ku iya.

“Mayuh produk ti udah tembu dibungkus tu dijual ngagai kedai makai, farmasi enggau supermarket, lalu sekeda iya diekspot ngagai menua China.

Taun 2007 tu tadi, pemayuh kutak udah dijual kami bisi dalam 10,000 iti.

“Siti beg teh nya pemerat iya 2 gram aja,” ku iya.

Siku da agi, Lynne Lucy Merudi, berumur dalam urung 20 taun siku orang gawa ke Assar Aquaquest Sdn Bhd – belandik betupi ikan bansa Australian Barramundi enggau Australian Jade Perch. Ikan tu kaya enggau Omega-3, nadai asai pantai, nadai bepenyakit, nadai ngena sebarang ubat lalu di gred ikan tu gred ikan sashimi.

Ku Lynne, Assar Aquaquest bisi lapan iti pegong ikan enggau pemesai siti pegong nya 10 kali x 6 kaki.

Anak ikan tu diimpot ari menua Australia lalu ditupi ba pegong tu ngena (freshwater). Pemakai iya ari formula “pallet” ti diimpot ari menua Taiwan ti nadai bechampur enggau Genetically Fortified Organism (GMO) lalu nadai ditupi enggau sebarang antibiotik.

Australian Barramundi lebuh ditupi datai ke iya besai begunaka timpuh 5 ngagai 6 bulan lalu Australian Jade Perch begunaka timpuh 6 ngagai 8 bulan.

“Kira ke besai ungkus nupi ikan tu enggau ngaga pegong iya sekali, enda ku entu nemu penyampau ungkus iya…tang ikan ti ditupi tu bisi pemakai iya empu.

Nyadi enti bisi orang ke deka belajar nupi ikan tu tau nalipaun ngagai kami laban kami mega bisi meri pengawa latih chara nupi ikan tu.

“Kelimpah ari nya, ikan ti udah besai tu diekspot kami ngagai menua Jepun, Amerika enggau Kanada kelimpah ari menua Eropah, laban kediatu menua Eropah nadai mesan meli ikan ari menua kitai ditu,” ku iya.

Pemerat siku ikan entara 500 ngagai 800 gram siku lalu iya dijual lebih ari RM10 sekilo nitihka pemerat iya.

Leslie Joe, berumur dalam urung 40 taun ari Srikaya Trading & Services – bejual Jatropha ba HPPN, siti bansa utai ditanam ti makin maju diatu.

Buah Jatropha ulih diproses kena ngaga bio-diesel. Igi iya muntang ditanam lalu enti nganti iya besai bisi dalam kandang enam bulan maya iya bebuah.

Jatropha tau ditanam ba sebarang bansa tanah tang sebedau iya ditanam tanah nya deka diperesa dulu ngena perengka, Moisture Meter. Projek Jatropha tu udah dikemendarka MARDI lalu opis sida iya nyadi wakil ke bisi nyual igi benih Jatropha.

Kediatu, Kompeni Srikaya Trading Services ngambi asil Jatropha ari kebun lima ikar ba Jalai Batu 12 Kuching-Serian.

Enti pun tu udah bebuah, igi Jatropha tu dikupak ari buah nya lalu iya deka dikerangkaika sebedau iya diinjin nyadi minyak bio-diesel.

Minyak bio-diesel tu bansa ke enda nganu rampa menua.

Sida iya melabaka deka muka siti kilang ba Batu 22 Jalai Kuching-Serian alai ngaga proses minyak Jatropha taun baru tu ila lalu deka muka lebih kurang empat iti kilang ba sitak Miri, Kuching, Kota Kinabalu enggau siti ba menua luar, Kalimantan.

Kelimpah ari nya, Leslie mega madah, “Enti orang mayuh deka meli igi buah Jatropha, meli ari orang ti udah dipadu perintah.

Anang meli ari orang sengapa taja pan iya murah agi ari engi kami. Kebuah aku madah baka tu, enti igi benih nya dibeli ari kami, enti kita nanam iya, lalu iya ngeluarka asil ke manah, kami meli ari kita pulai baru.

Tang enti kita meli ari orang bukai ke enda dipadu perintah, rugi kita….laban ba orang bukai nadai sida meli pulai baru ari kita,” ku iya nambah baru.

Buah Jatropha siti penatai kena bio-diesel, kulit iya tau diparut nyadi baja enggau abuk ti tau kena nungkun api, ku Leslie.

Ke diatu, daun Jatropha tau kena ngubat telih taja pan iya bedau ditemu amat bisa ke enda laban deka dipansik enggau silik agi.