Orang bumai betupi patut muai ketisi runding ke semina deka ngulihka untung ngena jalai muntang

KUCHING: Orang betanam betupi enggau pengeluar pemakai ti enda ngemeratka pengelikun orang mayuh ba pemansut produk sida lalu semina deka ngulihka penguntung ke mayuh aja patut enda ibuh enggau orang ngereja pengawa nya.

Menteri Pemansang Betanam Betupi Datuk Patinggi Tan Sri Dr George Chan madahka atur nya patut diputarka pengguna awakka gerempung nya ngemeratka pengelikun enggau pemeresi ngeluarka produk sida iya.

“Ba pekara tu, pengguna nya ti patut bejalaika pengawa sida iya ngemata lalu nyadung pemadah nya entara sida iya empu. Kita patut nyadung pemadah nya enti kita nemu bisi sida ke bekebun tauka sida ke ngeluarka produk pemakai ngelanggar tauka enda nitihka atur pengelikun ke patut dititih sida iya.

“Sida ke ngereja pengawa betanam betupi tauka ngeluarka produk pemakai nya patut enda ibuh enggau pengawa tu awakka orang mayuh nemu lalu iya dipeda lebih agi ngemeratka sepiak aja tauka iya empu, lalu ukai sida pengguna,” ku iya lebuh bejadi seminar enggau bengkel Institut Teknologi Makanan Malaysia (MIFT): Semua Perkara Yang Anda Perlu Tahu Tentang GMP lalu ditangkan enggau bengkel Sains enggau Amalan GMP ba ditu, kemari.

Dr Chan ti mega Sapit Kepala Menteri madah, sida ke ngereja pengawa betanam betupi enda ulih nyeliahka pengelikun pengguna menua tu lalu ngemeratka pengguna entarabansa aja ketegal deka nyual produk nya ngagai pasar menua tu enggau global.

“Anang bisi ulah ba sekeda pengguna menua tu ke madah enda ibuh ke nya, nya ulah ke enda manah laban utai ke bendar orang menua tu patut dikemeratka agi diberi pemakai ke manah enggau bisi kualiti, enti deka nanding orang ari luar,” ku iya.

Bekait enggau pekara tu, iya ngasuh genteran tusun ukum ke bisi ba menua tu, ti ngasuh tiap produk pemakai diuji dulu sebedau iya dijual ba pasar diteritka agi tauka ngaga undang-undang baru ti patut diberi kelala.

Dr Chan madah kemaya hari tu mayuh pengeluar pemakai agi nadai entu ke ibuh pasal Pengelikun Pemakai enggau Kualiti ba Amalan Pengeluaran Barangan (GMP).

“Pengawa kita deka neritka agi pengelikun pemakai enggau kualiti industri pemakai belandikka GMP enggau chara ke sistematik. Pengeluar pemakai ti enda nitihka stindit tu tau mai penusah ngagai pengguna,” ku iya.

Dr Chan madah, enda mujur nitihka atur tauka piawaian ti udah ditetap entarabansa ba pengeluar produk pemakai tau ngerugika menua lalu tu tau dipeda lebuh Negara Kesatuan Eropah (EU) nagang produk berikan Malaysia belabuh ari 1 Julai taun tu.

“Atur EU tu ngerugi menua tu dalam urung RM600 juta. Nya alai, GMP besereta pengelikun enggau kualiti produk patut dikemeratka.

“Pengawa nagang EU tu udah tentu ngenusahka pengeluar produk pemakai ari ikan taja pan sida tu nitihka atur tauka piawaian EU ketegal siku, dua pengeluar ti enda ngemeratka aspek nya nyau ngerusak nama pengeluar bukai,” ku iya.

“Dalih pengeluar produk pemakai ari ikan menua tu enda nitihka atur GMP enggau Analisis Bahaya enggau Mata Kawalan Kritikan (HACCP) sida tu ari menua EU,” ku Dr Chan.

Bejaku pasal seminar dua hari tu Dr Chan ngarapka profesional enggau pengelur produk pemakai ti bisi ba seminar nya ulih nmutarka pelin atur nya ngagai penanggul ke biasa lebuh bejadika atur GMP ba sektor industri pemakai ba menua Sarawak.

“Aku ngarap sebarang pengawa ti ulih diputarka kita enggau atur pelin ti ulih kita ba seminar sereta enggau bengkel tu deka dikunsi kita enggau Opis Menteri Betanam Betupi (KPP) awakka sama ulih ngelantangka pengawa tu enggau penguntung semua orang,” ku Dr Chan.

Sama bisi muka seminar ti diatur ulih MIFT enggau kerejasama KPP, Opis Betanam Betupi Sarawak (JPS) enggau Opis Menteri Pengerai Malaysia, Menteri Muda Industri Pemakai, Datuk David Teng, Presiden Mandal MIFT, Zahara Merican enggau Pemangku Pengarah JPS, Paul Vincent Ritom.