RM128,000 duit kena tipu orang nyaru nyadi pemesai Bukit Aman

MIRI: Kira bisi penyampau RM128,000 duit kena tipu ari sekeda orang ke nadai nyangka diri kena ayah orang ke nipu ngena ‘Court Scam’ tauka ‘Tipu Court’ — kereja bala saspek bedau ditemu sapa dalam enam kes ti udah diripot ngagai polis, ditu.

Dalam siti aum berita ditu, Kepala Polis Pelilih (KPD) Miri ACP Jamaludin Ibrahim madah polis endang agi benung nasat kes nya enggau naka ulih.

Iya nerang chara sida ngereja penyalah dalam kes tipu nya ngagai bala pemberita ke datai ngulu aum nya.

Dalam siti kes, saspek bisi talipaun ngagai lumur talipaun mendam enggi tudah kena tipu nya, madah diri siku pemesai polis ari Bukit Aman sereta madah tudah nya dipinta datai ba siti pechara ba siti court di Kuala Lumpur.

Saspek nya madah ngagai tudah tuai nya akaun bank iya bisi dikena bala raban Along enggau nerima duit datai belalai.

Ku saspek nya, akaun bank iya diatu benung ditasat polis lalu tudah nya dipinta ngemansutka semua duit iya sereta mindah duit nya ngagai akaun ti udah disediaka saspek nya.

Iya nya dipadah, duit nya deka disimpan dalam akaun nya sekumbang akaun iya empu nya dalam tasat polis, lalu duit nya deka dipulaika ngagai iya enti kes nya udah tembu diputarka ila.

Ngambika tipu nya gaya ke bona fide sereta tau dikarapka ulih tudah nya, saspek keterubah lalu ngemai siku kaban, sekali tu siku indu ke madah diri penawa besai ari court di Kuala Lumpur.

Orang nya (saspek kedua) lalu talipaun ngagai tudah ke deka ditipu sida nya, minta iya mindah duit iya ngagai akaun ti udah disediaka saspek keterubah, laban enti enda pia, tudah nya enda ulih enda datai ba pechara di Kuala Lumpur.

Saspek nya besemaya deka talipaun ngagai tudah nya enti duit nya udah dipasuk dalam bank (dalam akaun saspek). Tudah nya semina nemu diri kena tipu lebuh saspek nya nadai agi talipaun udah bekau duit nya dipasuk dalam akaun ke diberi saspek nya.

“Laban meda mayuh bendar kes bakatu udah diripot sereta chara nipu bakatu balat ngasuh nangi, aku enggai enda ngelalau mensia mayuh minta sida anang enda bejaga, lalu anang sekali-kali meri duit sida ngagai orang enda kelala.

Enti kita bisi nerima talipaun nya, anang ibuh kiruhka orang nya, lalu anang enda terus madah ngagai polis, court tauka bank kena nyeliah diri ari kena tipu orang nya,” ku Jamaludin.

Ku iya, “Bala orang ke mudah kena tipu nya bala sida ke amu, deka kaya jampat.” Iya madah sida ke ditipu nya endang kena tipu ari ‘online’, talipaun tauka SMS.

Dalam siti kes bukai, KPD nya madah polis bisi udah nangkap empat iku rayat asal ditu empu, iya nya tiga iku indu enggau siku lelaki, ke dipelaba bisi ngereja penyalah nyual tikit 4D nadai belisin.

Seraban polis betuaika ASP Anthony Abell nangkap sida nya dalam atur ngebu ulih polis kena 8 Okt tu tadi. Sida mega nangkap 12 iti mesin faks, sekeda rengka pengira enggau sekeda utai betulis.

Nitihka tasat polis, penyampau entaruh ke digumpul ulih bala saspek nya ninting minggu dalam operasi enda beradat sida nya dianggar urung RM300,000.

Sida saspek nya deka didawa baruh Genteran 4A (a) Akta Rumah Judi Tebuka 1953 ke ngungkupka ukum jil dua taun enggau tauka ukum tunggu maksima RM200,000 enti ditemu salah.

Tu kes ketiga bakany, ku Jamaludin. Kes keterubah nya dalam bulan Januari lalu kes kedua dalam bulan Ogos. Iya madah kes keterubah enggau kes ketiga nya besangkut paut enggau pangan diri.

Polis melaba sekeda kes rumah dichuri tama ke balat nyadi ba kandang menua Lutong enggau Desa Senadin apin lama udah teputar udah bekau dua iku saspek lelaki umur 27 enggau 42 taun ditangkap kena 16 Okt tu tadi ba sebuah rumah di Kg Pengkalan Lutong.

Siti komputer rumpas (laptop), siti jam tangan enggau gegudi remote kontrol mega sama ditangkap.

Saspek dua iku nya nyangka dibai ngagai court seharitu (hari Lima).