Sekula enggau rumah panjai di Sepupok, Niah lama udah minta tang nadai pengujung

MIRI: Bala sida tu sama bela aus pemansang. Nya meh kebuah sekula primari SK Rancangan Sepupok enggau rumah panjai di Skim Begempuru Sepupok, kira bisi 100 KM ari Miri minta kasih ari perintah ngambika mekal sida enggau ai beresi sereta udah diubat.

Chermin Gerempung Apai Indai-Pengajar (PIBG) Napi Madang, 48, madah, menua tu udah merdeka 45 taun dalam Malaysia, tang bala nembiak enggau pengajar sekula tu agi mengkang apin ensepi penyamai buah merdeka nya.

“Sida agi bepanggai pengarap ngena ai pegung tauka ai letung bechura gadung sereta enggau ai ujan kena mandi, merus ngeli, masu gari enggau masu chapak mangkuk. Pekara tu amat ngenyinuka ati laban genap hari sida enda ulih enda bepanggai pengidup ba ai ti kamah,” ku iya lebuh bejaku ngagai Utusan Borneo.

Ku iya rumput alga (gadung) ke tumbuh dalam pegung nya tusah deka dipunaska lalu beduduk ari nya mayuh bala nembiak kena gatal kulit laban rumput enggau ai pegung nya kamah.

Napi madah, sida bisi udah ngenataika peminta bekal ai paip bisi ubat ngagai Opis Menteri Rengka Guna Mensia Mayuh enggau Bekal Ai kena 16 Oktober 2007.

Sekiteri Mendam Opis Menteri Rengka Guna Mensia Mayuh malas surat sida kena 28 Dis 2007 lalu madah sekula nya udah dipasuk sama enggau rumah panjai sereta skim begempuru ke bukai ba serantu Jalai Sebato Niah di baruh agih bekal ai bisi ubat ungkup projek ai menua pesisir.

Nitih padah surat nya, projek nya patut dipejalaika dalam Atur Pemansang Malaysia Lumpar 9 (RMK-9) sereta dianggar berega RM5 juta, tang projek nya agi nganti kemendar ari Opis Menteri Pemansang Pesisir enggau Kandang Menua (perintah besai).

Opis Rengka Guna Mensia Mayuh dalam surat nya meri pilih bukai, enti sema Opis Menteri Pelajar ulih nyendiaka agih ke patut kena nyambung paip besai ngagai sekula aja.

Dalam pekara tu, bungkur pengawa nya nyengkaum atur masang paip pemanjai 2.3 KM ke sekula enggau enggau ungkus penyampau RM1,010,000.

“Naka ke ditemu aku, surat nya dianjung ngagai Opis Menteri Bekal Ai, tang ngagai diatu, kami lalu nadai nerima balas pasal pekara tu. Kelimpah ari nya, aku mega bisi nganjung surat tu ngagai pengari rayat ba sitak menua tu, ba pun taun tu tadi, tang angka ke diatu ‘agi nadai temu yu’.

“Kami endang amat bebendar ngarapka peminta kami pasal bekal ai bisi ubat tu ulih dikemendarka. Lalu enti enda ulih mekal ngagai semua, abis jai iya, sekula tu meh dibekal enggau ai paip beresi nya,” ku iya.

Narang Imang, 80, ari Rumah Ngindang Entili madah, iya udah bisi 36 taun diau mendam ba Skim Rancangan Sepupok sereta ngarapka perintah ulih nyendiaka bekal ai bisi diberi ubat.

“Penanggul nadai ai paip ngujungka kami bepanggai penuh ba ai ujan enggau ai sungai. Penusah nya majak agi enti mayuh musin kemarau,” ku iya.

“Uji kitao merati, enti maya musin kemarau, ai sungai kena mandi sereta kena masu gari nya kelalu mabu sereta balat ambuh, enda salah baka alai kerebau melangkan. Kami balat auska pemansang lalu minta perintah enggau naka ulih meri perati ti patut,” ku iya.

Nyadi Skim Begempuru Sepupok ngempuru 12 buah rumah panjai ke bisi urung 15 KM ari Batu Niah.

Kelimpah ari nadai bekal, ai bala mensia mayuh ba kandang menua nya mega agi mengkang nengah jalai batu enggau jalai tanah mirah, ku iya lebuh bejaku ngagai Utusan Borneo kemari.