MIRI: Siku orang bumai diletak ukum jil tiga hari sereta ditunggu RM1,500 court mejistret ditu kemari laban ditemu salah ngembuan senapang patah nadai lisin.

Ukum bejalai ari 18 Oktober, iya nya haribulan siku nya direman. Saspek madah, iya siku orang bumai nadai pelajar sekula lalu madah diri enda nemu ngembuan senapang patah mesti belisin.

Eric Asrada Untan, 28, ari Rumah Jimbai, Sungai Bekelit, Bekenu, Sibuti madah, permit senapang nya ke belumur Sibuti/0530 Steven – ti dipansutka Perintah Sarawak kena 8 Julai 2002 nya agi ulih kena, tang dalam nama apai iya, Untan Ayiok.

Iya ngakun amat selalu mai senapang lebuh iya kumai tauka nurun ngasu. Apai iya endang ngarapka iya nyaga senapang nya.

Ku Eric, iya kala nguji deka mindahka senapang nya ngagai nama iya, tang enda mujur lalu nadai diberi nama kebuah utai nya enda ulih pindah ngagai nama iya.

Iya ngaku amat bisi mai senapang nya enggau sigi seterum urung pukul 3 ngalih hari kena 11 Oktober ba Rumah Jambai, Sungai Bekelit, Bekenu, Sibuti. Kedua-dua barang nya sama dibai ngagai court nyadi tanda kes.

Mejistret Nasrul Hadi Abdul Ghani ngukum Eric, atas akun salah iya empu dalam dawa baruh Seksyen

8(a) Akta Senjata Api 1960 (Akta 206), ke ngungkupka jil tujuh taun tauka tunggu enda ngeluie RM10,000 tauka kedua-dua ukum nya sekali.

Court mega netapka 26 Nov alai kes tu disebut baru kena opis penawa mantaika ripot ari, lalu udah nya baru court nentu sekalika senapang patah nya dipulai ngagai orang patut empu iya tauka enda.

Dalam siti bilik pechara bukai, siku orang bumai Charles Chit, 34, ke datai ari rumah panjai sama enggau saspek kes keterubah, mega sama didawa ngereja penyalah sama. Tang iya nadai akun diambi.

Saspek didawa salah ngembuan siti senapang patah SBBL 12 bore Steven 37WV ba Rumah Jambai, Sungai Bekelit, Bekenu, Sibuti. Penyalah nya didawa dikereja iya kena pukul 3 lemai 11 Oktober.

Mejistret Fazira Azlina Mohd Rofli netapka 20 Nov haribulan bechara baru kes tu laban meri awak ngagai opis penawa ngaga ripot kimia enggau ripot ari opis kebal.

Saspek dilepas ngena ikat jamin mata duit RM1,500.

Ba mua Mejistret Amir Shah Amir Hassan, siku orang bumai penama Kingkong Sintan, 39, ari Tudan Fasa 5, Lutong, dilepas ngena jamin mata duit RM1,500 enggau siku penyamin nganti ke bechara baru.

Saspek ngadap dawa ti sama baruh Seksyen 8 Akta Senjata Api 1960 (Akta 206). Taja pia, court nadai minta saspek ngaku salah tauka enda.

Kingkong didawa ngembuan siti senapang patah enggau kerubung seterum FIOCCHI 12 ITALY 12, kena pukul 9.30 malam 11 Oktober ba rumah panjai ti sama, iya nya Rumah Jambai, Sungai Bekelit, Bekenu, Sibuti.

Kes tu bechara baru kena 20 November tu ila. Kepala Inspektor Austin Patrick Angkon nyadi penawa kes.