Kereban baru enggau penemu baru tau nambahka agi pemansut minyak sawit

KUCHING: Ngena teknologi ke baru ba pengawa mansutka minyak sawit ukai semina ngurangka kos tang mega iya pengawa ke nyamai agi laban ulih ngurangka rampang sawit.

Taja pan Malaysian Palm Oil Board (MPOB) enda ulih nyadi kompeni komersil, tang sida iya bejalaika pengawa pansik enggau pemansang (R&D), lalu udah tu tembu, pengawa nya deka diberi ngagai kompeni bukai kena ngemansangka pemansut minyak sawit menua tu, ku Menteri Industri Kebun enggau Komoditi Datuk Peter Chin Fah Kui.

“MPOB semina bejalaika pengawa R&D, udah nya deka diberi ngagai kompeni alai sida iya bejalaika pengawa ngena teknologi ke manah agi. Teknologi baru tu jauh manah agi ari ke dikemisi kitai diatu laban perengka dikena kitai diatu lama memagang, lebih kurang 50 ngagai 60 taun di belakang.

“Tu siti pemansang laban enti nitihka chara lama buah sawit diproses nengah sekeda renggat ke lama. Kemaya hari tu kitai semina nyimpan buah sawit ba truli sampai iya minyak sawit nyadi baka ke diproses kitai ba kilang.

Buah ke udah mansau terus diinjin. Tu ngurangka orang gawa ba kilang sawit datai ngagai 50 peratus. Reti iya kos ulih dikelimat agi, ngasi agi lalu ulih ngurangka rampang sawit,” ku Chin lalu setuju industri minyak sawit patut dikemansangka ba tiap renggat belabuh ari betanam ngagai mansutka minyak.

Sebedau nya, Chin bejadi forum ‘Modipalm Continuous Sterilization Forum’ diatur CB Industrial Product Holding Berhad (CBIP) lalu disukung MPOB enggau Opis Menteri Industri Kebun enggau Komoditi Malaysia ba Hotel Crowne Plaza Riverside Majestic ditu, kemari.

Forum tu mega ngasuh orang ti bisi bekait enggau industri minyak sawit tu ngena teknologi moden digaga MPOB tang projek komersil tu diatur nengah CBIP.

“Kena kita ngemanahka agi tiap renggat pengawa mansutka minyak sawit, pengawa pansik enggau pemansang MPOB patut diteruska ba renggat estet, kilang enggau produk. Eksport minyak sawit diatur Malaysian Palm Oil Council (MPOC). Pemansang proses mujur enti industri tu ulih nerima ubah tu.

“Nerima ubah nengah teknologi ke baru tu beguna amat, sida ke ngereja proses minyak sawit tu patut mansutka belanja ngena injin baru enggau moden agi kena ngeluarka minyak mayuh agi, enti agi ngena chara ke lama bakani kitai deka nambahka pemansut kitai. Ngena chara ke moden ngaga proses minyak sawit tu ulih ngelimat jam, ngasi agi enggau mayuh agi penguntung ngagai menua tu,” ku Chin.

Iya nambah, setan minyak sawit ngena proses ke baru, enda mayuh rampang dibuai laban iya deka ditukar nyadi minyak tauka produk bukai.

Pemujur ngena teknologi ke moden agi deka ngemujurka agi industri minyak sawit Malaysia lalu iya deka mujur agi besemekih enggau produk bukai baka minyak Soya laban iya ngeluarka 10 kali lipat mayuh agi ari minyak soya.

Taja pia, Chin mega madah sekeda opis menteri ti bisi bekait enggau pengawa betanam betupi enggau sains deka bejuraika aum pasal isu tu enggau PM, pekara ti ditunga menua tu kelebih agi lebuh mutarka menua tu mansutka minyak sawit nyadi industri besai ti ulih nyukung ekonomi menua enggau produk ti ulih besemekih enggau produk bukai, baka isu rega minyak sawit ke nyau jauh udah nurun enggau sekeda pemutus bukai.

“Aum ti deka dicherminka PM empu deka bejuraika penyadi industri minyak sawit, sekeda isu ti ditunga enggau pemutus ti deka digaga kami ngaga industri sawit tu pengawa ke besai lalu ulih besemekih enggau produk bukai…enda semua utai ulih dipadah aku ditu laban PM empu enggau sekeda opis menteri bukai ti bekait enggau pengawa betanam betupi enggau Sains mega bisi penemu ke ulih dipadahka sida iya empu. Siti ari isu baka rega minyak sawit ke jauh udah nurun enggau atur bukai ti ulih diputarka kami nyukung industri tu,” ku iya lalu nambah aum tiga kali setaun tu ke penudi iya taun tu.

Malaysia enggau Indonesia ngeluarka 80 peratus minyak sawit dunya.

“Besai amai guna menua tu begulai enggau Indonesia nambahka agi minyak sawit laban kelimpah arti menua kitai, Indonesia mega siti menua mayuh minyak sawit…kitai patut kerejasama enggau sida iya. Tu tadi, PM bisi madah ngagai aku ngasuh aku bejuraika pengawa tu enggau Menteri Betanam Betupi menua Indonesia,” ku iya.

Ba chukai untung lebih (EPT) ti benung diputarka perintah, rega setan kediatu RM1650 baruh ari RM2000 alai EPT tu ulih kena laban nadai untung ari tu.

“Perintah deka berunding dulu enti EPT tau enda ibuh dikena, laban ke diatu rega minyak sawit setan baru RM1650 baruh agi ari rega tetap RM2000, reti nya kitai ndai untung ari tu, sesen pan nadai. Pelaba aku enggau pemadah ari sida industri minyak sawit tau enda ibu ngeletak chukai EPT tu…aku deka mai pekara tu ngagai aum pagila (hari Dua).

“EPT semina berasai ba sida betanam sawit ari menua tu aja. Chukai EPT tu semina dikena enti pengeleuar minyak sawit lebih ari RM2000 setan, nambah nya rega minyak sawit pasar dunya udah jauh nurun,” ku iya.

Lebuh ditanya pasal rega baja, Chin madah rega baja diatu udah niki, lalu ngirauka mayuh orang kelebih agi sida industri betanam betupi laban iya enda ngipak ba penguntung pengawa tu.

“Pekara baja mar tu pan deka dibai ngagai aum mega enggau sida ti nyual baja enggau ngaga baja. Sapit Perdana Menteri (TPM) ti mega Menteri wang pan deka sama enggau aum tu, bedau temu ni maya agi, ngarapka ulih baum minggu tu. Enda patut rega minya udah nurun, tang rega baja agi bedau mar…,” ku Chin.

Sama bisi datai ba forum kemari Chermin MPOB Dato Sabri Ahmad, Ketuai pengarah Dato Dr Mohd Basri Wahid enggau Pengarah Urusan CBIP Holding Berhad Lim Chai Beng.