KUCHING: Sekiteri Kereja Parti Rakyat Bersatu Sarawak (SUPP) Datuk Peter Chin madah pemutus raban parti patut diambi kira sebedau sebarang ketuai parti ditukar.

“Ba penemu aku, betukar ketuai pekara biasa ti selalu nyadi ni-ni maya. Kitai patut betukar ketuai tang enti ngereja nya, kitai mesti nitihka penemu raban bukai parti.

“Iya patut diatur bansa nya ukai ketegal aku tauka orang bukai ngasuh iya nyadi baka nya tang diatur nitihka peneka raban parti bukai laban raban parti ti netapka tunga enggau ketuai dalam parti,” ku iya madah maya aum media udah bejadi forum Modipalm Continuous Sterilization, kemari.

Chin madah baka nya lebuh iya ditanya enti trend bepilih baka ba MCA netapka ketuai baru parti nya deka nyadi baka nya ba SUPP lebuh Persidangan Delegasi Tiga Tahun (TDC) SUPP ti deka diatur bulan Disember tu ila.

“Ukai reti jaku aku ngasuh sebarang orang ba parti SUPP nya angkat ari penuduk iya ke enda. Reti ku aku proses nukar ketuai pekara biasa lalu iya ulih nyadi.

“Siku-siku orang pan enda ulih megai penuduk nya enggau lama. Utai ke berat diatu, raban parti ti deka nentu sapa orang nya,” ku iya nambah baru.

Chin ke mega Menteri Industri Kebun enggau Komoditi madah iya sedia nerima pemutus enti bisi ketuai ba parti SUPP nya betukar maya TDC SUPP tu ila.

“Meda baka ni maya TDC tu. Manah kitai anang besangka ke utai tumu endar.

“Aku siku ari ketuai ba SUPP nerima sebarang pemutus enti bisi betukar ketuai lebuh dipilih raban parti.

“Baka MCA, Datuk Ong Tee Keat dipilih presiden lalu Dr Chua Soi Lek nyadi sapit iya ba pemutus enggau kuasa raban kena sida iya nukar ketuai parti,” ku iya.

Kelimpah ari nya, Presiden SUPP Datuk Patinggi Tan Sri Dr George Chan maya pun bulan Ogos tu tadi madahka parti tu nguji nyeliahka sebarang semekih ngulihka pengawa pengabis tinggi ba TDC ila.

“Pekara baka tu patut diseliahka enggai ka bisi penyarut dalam parti. Asai aku enti bisi besemekih ba penuduk ke pengabis tinggi ba parti nya nyadi, parti deka betunga enggau penyarut ukai ngasuh iya kering agi.

“Parti deka charut kelebih agi enti bisi mayuh semekih.

“Nyadi kitai nguji nyeliahka semekih tauka berebutka kuasa nyadi,” ku iya.

Dr Chan madah, dua pekara ke berat ti patut dikemeratka SUPP iya nya ngiga ke manah agi kena ngemutarka parti lalu ngeringka agi penuduk parti tu lebuh betunga enggau bepilih besai menua tu ila.

“Kedua iya bakani deka ngeluarka tusun ketuai baru lebuh ngambi alai orang ke lama ba parti.

“Nya alai penegawa besemekih berebut ke penuduk ke tinggi parti patut diseliahka laban atur baka nya semina ngelemika parti,” ku Chan.

Hari Enam tu tadi, Ong sebedau tu ti nyadi presiden mandal MCA ti mega Menteri Pengangkut menang presiden parti nya udah ngalahka bekau mandal presiden parti Datuk Seri Chua Jui Ming.

Ong bulih pemutus undi 1,429, Chua ti mega bekau Menteri Pengerai semina bulih 917 undi lalu bekau Menteri Pengerai Datuk Seri Chua Choi Lek mujur ngalahka sekiteri besai Datuk Seri Ong Ka Chuan.

Bekenangka pasal pemansang industri sawit kemari, Chin madah ngena teknologi ke baru ba pengawa mansutka minyak sawit ukai semina ngurangka kos tang mega iya pengawa ke nyamai agi laban ulih ngurangka rampang sawit.

Taja pan Malaysian Palm Oil Board (MPOB) enda ulih nyadi kompeni komersil, tang sida iya bejalaika pengawa pansik enggau pemansang (R&D), lalu udah tu tembu, pengawa nya deka diberi ngagai kompeni bukai kena ngemansangka pemansut minyak sawit menua tu, ku Menteri Industri Kebun enggau Komoditi Datuk Peter Chin Fah Kui.

“MPOB semina bejalaika pengawa R&D, udah nya deka diberi ngagai kompeni alai sida iya bejalaika pengawa ngena teknologi ke manah agi. Teknologi baru tu jauh manah agi ari ke dikemisi kitai diatu laban perengka dikena kitai diatu lama memagang, lebih kurang 50 ngagai 60 taun di belakang.

“Tu siti pemansang laban enti nitihka chara lama buah sawit diproses nengah sekeda renggat ke lama. Kemaya hari tu kitai semina nyimpan buah sawit ba truli sampai iya minyak sawit nyadi baka ke diproses kitai ba kilang.