MARUDI: Kitai sama nemu pengeran perintah deka meda rayat di menua tu maju, lantang senang sereta diau beserakup enggau pangan diri.

Nya alai beduduk ari nya, semua bala kitai patut ngintu enggau manah penyerakup entara raban bansa ngambika iya ulih nyadi reta tengkira rebak baru dudi ila.

Genap raban bansa di menua Sarawak tu bisi ngembuan pemanah kediri empu, ukai mina jaku tang mega adat enggau main asal bansa mega. Nya meh nyadi aris ke diturun ngagai nembiak rebak baru ila. Nya alai besai bendar guna enggau reti semua kitai bejalaika tanggungjawab ngemeran sereta nyaga enggau manah semua adat sereta main asal siti-siti bansa ngambika dikerembai nyadi lanting sereta nyadi reta tengkira bala nembiak rebak baru jemah ila.

“Adat enggau main asal bansa kitai empu mesti terus dikemeranka bala kita, lalu semampai dikerembaika enggaika iya tengelam enda temu tunga dalam dunya baru enggau dunya global kitai tu dudi hari ila,” ku Sapit Menteri Dagang Entarabansa enggau Industri Malaysia Dato Jacob Dungau Sagan.

Iya mansutka jaku nya ba siti pengerami makai selamat ka iya nya dichiri nyadi Sapit Menteri Kabinet Perintah Besai apin lama sereta pemenang iya ba Bepilih Besai Parlimen apin lama. Pengerami tu diatur sida ba asal penatai iya, Long Anap, Ulu Baram malam hari Lima tu tadi.

Ba pagi nya, siti pengawa nirika Tiang Medeng Belawing, iya nya kena nanda meri terima kasih enggau pengaga ati ngagai semua mensia mayuh di Baram Ulu atas pemanah pengawa enggau sukung sida dalam bepilih tu tadi.

Jacob ke mega Kaban Parlimen Baram, ngarapka pengerami ke bakanya ulih ngelantangka ati sereta ngempung mensia mayuh ba kandang menua nya, baka di Ulu Baram sereta ba semua raban Orang Ulu enggau semua raban bansa bukai mega.

Enggau nya, Jacob mega ngansak bala apai indai anang mantul nyengula anak sida sampai ngagai universiti.

Ka tambah nya, iya mega ngelalau bala Orang Ulu ngambika semampai bediri negi ngembar perintah Barisan Nasional (BN) lalu sama berakup ngereja pengawa enggau pangan diri.

Pengerami nya mega sama digulu Kaban KN Telang Usan Lihan Jok, sekiteri politik ka Kepala Menteri Robert Laing Anyie, Ketuai Raban Bansa Orang Uluh

Temenggong Pahang Deng, Pemancha Laing Jok enggau Pemancha Joseph Ngau, TK Tony Balare Sagan ke mega nyadi chermin pengatur.

Dalam pengerami nya, Jacob mega bisi ngenataika gran perintah ngagai tujuh bengkah JKKK genturung menua sereta mega ngagai PIBG sekula ke bisi penyampau dipegulai semua RM128,000.

Bala sida ke nerima gran nya nyengkaum JKKK Long Palai (RM25,000), JKKK Long San (RM30,000), JKKK Long Bedian (RM30,000), PIBG SK Long Bedian (RM5,000), Gerempung Perambu Raban Bansa Ulu Baram (RM30,000), Serakup Lepo’ Gak Dekan (RM4,000) enggau PIBG SK.Long Anap (RM4,000).