Penemu ke nadai meri penguntung ngagai bala gerempung patut dibuai ketisi

SRI AMAN: Buai magang ati kepapas kita laban penemu nya tau ngujungka laya enggau penyarut, piak ku Menteri Muda Pemansang Tanah Francis Harden Hollis mansutka jaku minta semua kaban gerempung di menua ngambika enda bepechah belah.

Ku iya, penemu enggau ati kepapaska pangan diri enda patut dikemeranka, laban nya ngasuh gerempung bepechah belah sereta lemi, kelimpah ari ngujungka penyarut sereta laya enggau pangan diri.

“Aku ngarapka bala kaban gerempung nadai ngembuan ati kepapaska pangan diri. Enti bisi, utai nya enda tau enda diputarka enggau lengkas orang ke megai gerempung ngena jalai ngena jalai alus ke penguntung, ukai penemu ke mecha belah,” ku Harden.

Jaku nya dipansutka iya lebuh bejadi pengerami makai lemai taun kedua penumbuh Sarakup Induk Dayak Sarawak (SIDS) Unit Rumah Batang, Entawa Undop ba siti resturan besai ditu malam kemari.

Ku iya, bekunchu-kunchu enggau kepapas ati ti bisi nyadi dalam siti-siti gerempung, semina ngerugi kaban iya.

“Berengkah ari seharitu, kitai patut sama enggau naka ulih berundingka jalai kena ngemansangka gerempung ngambika sebanding enggau gerempung ti udah lama ditumbuhka,” ku iya.

Harden ke mega Kaban KN Simanggang ngarapka bala kaban SIDS sama bekunsi penemu sereta peneleba enggau pangan diri kena ngemajuka gerempung nya, kelebih agi bala sida ke nguan menua pesisir.

“Bala kita endang sama bempu tanggung pengawa mantu perintah ngemansangka rayat menua pesisir sereta ngubah runding sida ngambika mudah agi nerima pemansang ke dikenataika perintah,” ku iya.

Sama bisi bejaku maya nya chermin SIDS pampang Sri Aman Roselyn Abunawas enggau Ketuai Unit SIDS Rumah Batang, Entawa, Sri Aman Icy Aning.

Orang ke sama bisi datai sekiteri pribit ka Menteri Muda Pemansang Tanah Jerome Runggol, chermin Serakup Bansa Dayak Sarawak (SDNU) pampang Simanggang Roland Demong Radin, sereta sekeda kunsilor ba Opis Kunsil Pelilih Sri Aman (MDSA) baka Kr Jimmy Chong, Kr Sawing Sumar enggau Kr Nalang Selinggau.

Dalam pengerami sama Harden mega ngerah madah agih RM2,000 diberi ngagai SIDS Unit Rumah Batang, RM3,000 ngagai JKKK Rumah Batang sereta enggau RM5,000 kena ngadu rumah panjai nya.

Pengerami dirichahka agi enggau sekeda atur baka lagu spunsa, chabut tikit benasit, nyangka penyampau gula batu sereta mega sada nyawa mas.