SIBU: Menteri Rampa Menua enggau Pengerai Rayat Dato Sri Wong Soon Koh panjai endar bejaku ngenang pasal pemesai reti pelajar sekula sereta pemanah iya dalam ngangkatka tikas kualiti pengidup orang siku ka tambah pemesai reti iya dalam mantu pemansang menua.

Beduduk ari pemesai reti nya, Wong minta semua bala raban bansa Dayak di sekayu menua tu anang enda bebendar nyengula anak sida.

“Manah agi enti genap pintu bilik ulih ngemansutka abis mimit siku graduat enda lama agi. Aku nemu kita ulih nyapai tuju tu enti diberi chukup peransang,” ku Wong madah ngagai bala mayuh lebuh bejaku ba siti pengerami makai lemai kena ngumpul belanja ti diatur Sarakup Indu Dayak Sarawak (SIDS), pampang Sibu ba Dewan Suarah ditu hari Enam.

Serimbai enggau nya, Wong mega madah iya ngagih gran ninting taun RM10,000 ngagai SIDS ungkup tuju pelajar sekula nya.

Agi nampung jaku kenang iya pasal pelajar sekula, Wong ke mega Menteri Wang II sereta mega siku bekau pengetua, madah enti orang nya bisi pelajar ke tinggi agi, iya tetap deka ulih nyungkak tinggi agi tikas pengidup diri.

Lalu pia mega, iya disadang deka ngangkat tinggi agi kualiti pengidup bala anak diri dudi ila. Nya alai tegal nya, pelajar sekula endang naka iya pemesai guna, ku Wong.

Enti bala indai nembiak bisi pelajar sekula ti tinggi, nya manah agi ku Wong, laban enti pia, sida deka landik agi ngintu sereta meransang bala anak sida.

Sida deka beperening jauh agi dalam pelajar sekula anak sida. Nya alai kedua-dua apai enggau indai endang sama bisi tanggung pengawa ti besai guna dalam pelajar sekula anak seduai.

Nya alai, iya minta bala indu Dayak nyadi ajen ti ulih ngenataika ubah ti manah sereta positif ngagai raban bansa Dayak. Dunya sida deka terang sereta mansang agi ka tambah dunya tinggi kualiti enti sida bisi pelajar ti tinggi. Kebuah pia, laban pelajar sekula tu kunchi pemujur, kunchi bulih pengidup kualiti tinggi.

Serimbai enggau pengerami nya, Wong minta bala indu ngena awak nya nyungkakka pemanah kaul sereta gempung ati enggau pangan diri.

“Tu meh awak ti manah kena kitai betukar penemu, runding sereta peneleba enggau pangan diri. Anang muai awak tu, laban awak tu jarang endang mansa ba mua kitai,” ku Wong.

Iya muji pemujur serakup nya ke ngatur pengerami nya lalu ngarapka belanja gumpul sida nya dikena enggau manah.

Dulu ari nya, chermin SIDS Sibu Alice Jawan madah batang tuju ngatur makai lemai kena ngumpul belanja nya endang kena ngiga duit kena meri peransang pelajar ngagai bala anak kaban SIDS. Iya madah dalam tiga taun ke udah SIDS Sibu bisi udah melanja RM6,000 ungkup insentif pelajar sekula bala anak sida. Ku iya, udah tu ila penyampau nya disadang lebih mayuh agi.

Nyadi lebih ari 800 bala pengabang mayuh enggau ba pengerami makai lemai kena ngumpul belanja SIDS Sibu nya.

Sama bisi datai enggau ba pengerami nya Kaban KN Tamin Joseph Mauh.