Bala rayat pupu bansa begempung baru ekonomi menua kita tu tau mansang

MIRI: Kepala Menteri Sarawak, Pehin Sri Abdul Taib Mahmud madah penyerakup nya batang sereta kah pengering rayat pupu bansa di menua tu.

Laban bisi penyerakup menua tu terus mansang dalam ekonomi enggau pemansang bukai ti ngujungka pengelikun enggau pengentap politik kitai ditu.

Lebuh bejaku bejadi pengerami ‘Ramah Tamah Hari Raya Aidilfitri’ ke diatur Lembaga Amanah Kebajikan Melayu Miri (LAKMM) ditu malam kemari, Taib madah, penyerakup sereta gempung ati entara raban bansa mesti terus dikuatka agi lalu dijaga enggau dikemeranka agi laban diatu bisi orang deka ngachau sereta nganchurka pemanah kaul baka ke diatu.

“Kitai mesti terus enggau naka ulih nyaga sereta ngemeranka pemanah kaul sereta penyerakup ati entara raban bansa kitai ditu. Tang kenyau ari apin lama pemanah kaul enggau penyerakup raban bansa kitai ditu bisi kena kachau mimit, laban bisi sekeda orang ngapi sereta ngerachun runding enggau penemu sida. Perintah besai balat endar nangi laban bisi orang ke bebendar bemain enggau isu bansa (kena mechah belah raban bansa),” ku iya nerang.

Ku Taib, pemansang menua kitai Malaysia tu bepanggai ba tabur belanja beranakka puko tauka pelabur ari menua tasik ke bisi pengarap ka menua kitai tu laban kitai ditu bisi ekonomi enggau politik ke entap, likun sereta entap.

Tabur belanja beranakka puko ari menua tasik tu muka sereta ngemansangka tanah puang ke nadai ngenataika asil di menua tu, kelebih ari tanah ke enda ulih dikemansangka penuh perintah menua.

“Kebuah pia, laban kitai enda chukup duit kena ngaga jalai sereta nadai chukup kuasa gawa kena ngatur sereta ngereja pengawa ti betusun sereta diatur manah sereta ulih nguntungka kita,” ku iya nerang.

Ku iya nambah, enti rayat bisi mayuh agi awak diberi alai sida gawa, sida tetap bulih belanja ti mayuh agi lalu tu ngujungka sida ulih nyungkakka agi pemanah pengidup sida.

“Tang enti nadai pengelikun, nadai penyerakup sereta nadai tuai ti landik matak jalai ka bala rayat, menua kitai tetap enda ulih maju. Anang enda ingat, kitai anang sekali-kali ngachau sereta ngerusak pun enggau batang pemansang, penyerakup sereta kerejasama,” ku iya keran madah.

Taib madah, Parti Pesaka Bumiputera Bersatu (PBB) enggau Barisan Nasional (BN) deka naka ulih nentuka Sarawak enggau menua Malaysia tu terus mansang sereta maju lalu enda taku berambunka nyawa nyaga pengelikun, pengelantang enggau pemanah pendiau sereta pengidup rayat.

Ngenang pasal isu ekonomi global, Taib madah genap menua nadai ulih nyeliah diri ari pusin rantai dagang global baka ti udah nyadi ba ekonomi enggau institusi wang di Amerika Sarikat baka kemaya haritu.

“Nya alai beduduk ari tu, kitai enda tau enda nentuka ekonomi kitai kukuh sereta ulih besemekih enggau bala menua kaya ngulihka pan belanja injau. Kitai nadai agi besemekih enggau menua China, India, Indonesia enggau menua benung mansang ke bukai,” ku iya nerang.