‘Betanam Betupi Pengawa Dagang’ ti diatur beserimbai enggau 45 Taun Sarawak Maju Dalam Malaysia

KUCHING: Hari Betanam Betupi enggau Berikan (HPPN) 2008 diatur 30 Oktober ngagai 3 November ba Stadium Perpaduan Negeri deka dibuka Kepala Menteri Pehin Sri Abdul Taib Mahmud 1 November 2008.

HPPN tu diatur ngena jaku rambai ‘Betanam Betupi Pengawa Dagang’ (Agriculture is Business), ti diatur beserimbai enggau 45 Taun Sarawak Maju Dalam Malaysia.

“Kami melaba bisi 800 iku pengari sida ti ngereja pengawa betanam betupi, enggau orang berikan ari serata menua tu enggau lebih 200 iku pemesai enggau sida ari agensi perintah sama bisi datai maya bejadi pengawa tu.

“Pameran tu ila deka ngayanka pemansang pengawa betanam betupi enggau berikan 45 taun tu ke udah, baik iya chara mit tauka besai ba mayuh macham sektor pengawa kitai ngemodenka agi betanam betupi enggau berikan,” ku Sapit Kepala Menteri Datuk Patinggi Tan Sri Datuk George Chan, ke mega Menteri Ngemuden Betanam Betupi enggau Menteri Pemansang Industri Sarawak madah maya bejadi Logo HPPN Sarawak 2008, ditu, kemari.

Datai kediatu bisi 237 buah kedai mit udah disediaka, lalu ari penyampau nya 134 gerempung udah madah deka ngenataika diri lalu lebih 103 buah kedai mit nya agi mengkang bisi, lalu Chan ngarapka mayuh agi sektor swasta deka ngambi ulih ba awak tu nyukung pengawa HPPN.

“Pengawa tu manah kelebih agi sekeda kompeni bisi ngayanka produk sida, iya chara produk sida iya dikeluarka nengah chara betanam betupi moden. Mayuh macham pekara ulih dipelajar ari pameran tu,” ku iya lalu nambah bisi sekeda ti bisi sama enggau pengawa tu ila datai ari Semenanjung Malaysia ngayanka produk sida iya mega.

“Bisi sekeda sida ti enggau pameran tu ila datai ari Semenajung Malaysia, ngayanka produk sida enggau chara sida din lama udah maju ari kitai menua tu laban sida din pan belajar teknologi betanam betupi enggau berikan ari menua Australia, China enggau Taiwan. Orang menua tu pan tau belajar nengah sida iya maya sida ditu ila,” ku iya.

Pameran HPPN tu diatur tiap dua taun sekali nitihka bajet ke udah diungkupka, enti deka ngereja pengawa tu tiap taun, timpuh iya kelalu pandak lalu enda ulih meri awak ngagai orang betanam betupi ngayanka produk sida ba timpuh pandak, ku Chan lalu iya ngarapka pameran sekali tu deka ngayanka pekara ke lain agi ari dua taun ke udah.

“Pengawa tu sigi manah diatur tiap dua taun sekali, awakka ulih meri awak ngagai orang betanam betupi enggau orang berikan ngayanka produk sida. Aku ngarap taun tu manah agi ari taun ke udah, nambah enggau nya laban kitai ngintu 45 Taun Sarawak Maju Dalam Malaysia.

“Kelimpah ari nya mega, maya tu ila musin buah baka buah rambutan, mango enggau buah bukai, nyadi manah dijual tauka dipandang maya tu,” ku iya.

Chan nambah, maya pameran tu ila pan mayuh chara ngajar orang mayuh betanam betupi enggau berikan chara moden, baka hidrofonik enggau aerofonik ti manah mega kena nembiak baru lepas sekula belajar ngena awak betanam betupi enggau berikan chara muden.

Kelimpah ari nya, Chan mega madahka entara program ti bisi dipandangka ila baka demonstrasi berapi, ngaga pemakai Jipun ngena pemakai menua tu, ngaga rias bungai, ngaga umai, ngaga chura ari buah enggau mayuh macham agi.

Nupi empurau nyangka pekara ti deka narit ati orang mayuh ila. Penemu tu deka dibantaika siku orang ari Asajaya ti udah nupi beribu iku ikan empurau, ku Chan lalu nambah ngereja pengawa betanam betupi enggau berikan tu sigi pengawa dagang ke mayuh penguntung.

“Ngereja pengawa betanam betupi enggau berikan tu siti pengawa dagang ke besai. Ba sekeda menua luar udah lama iya nyadi pengawa untung besai, menua kitai baru berengkah,” ku iya.