KUCHING: Siku orang kereja getah enggau dua iku anak lelaki iya mujur nagang siku ukui sida ari parai kena belit ular sawa ba siti insiden di kebun getah ba Batu 8, Jalai Matang ditu kemari.

Sebedau pekara nya nyadi, Aleson Mangga umur 44 taun, sama enggau dua iku anak lelaki iya sereta enggau ukui inang sida sama mansang nurun ke kebun getah laban deka ngerejang getah urung pukul 6.30 pagi nya.

Udah bekau sida muat ai getah, Aleson enggau dua iku anak iya sereta ukui nya lalu nyendia diri deka pulai ke rumah urung pukul 11.30 pagi.

Dalam pejalai sida pulai, Aleson tu nejuka ukui sida bejalai dulu ari mua sida.

Sida udah nya lalu ninga ukui sida ngenyit engkaik.

Ninga ukui engkaik sida lalu berumban meda nama utai nganu iya.

Lebuh datai ba alai ukui nya ke engkaik dia sida meda ukui sida nya benung dibelit siku ular sawa panjai bisi 19 kaki. Meda bakanya, sida tiga lalu ngambi sebatang kayu pemanah iya pemanjai enggau pemesai enda jauh ari nya lalu nedat pala ular sawa nya enggau naka penguat ulih.

Udah sida mujur munuh ular nya, sida tiga lalu nanchang ular nya sereta ngemai bangkai iya ngagai pendiau sida ke numbas penyauh ari alai insiden nya.