KUCHING: Menteri Pemansang Bandar enggau Pengawa Dagang Temuai, Datuk Micheal Manyin madah iya deka ngapil ngagai kompeni bilun tambang murah AirAsia awakka sida iya meri kelala baru penerebai Kuching-Macau-Kuching enggau Kuching-Bali-Kuching.

“Aku deka ngapil baru lebuh aku betemu enggau Pegawai Ketua Eksekutif (CEO) AirAsia Datuk Tony Fernandez kena 8 Oktober, iya nya hari Tiga tu ila,” ku iya madah ngagai pengarang berita maya ngabang ngagai rumah tebuka Hari Raya Aidilfitri Menteri Kedua Atur Penemu enggau Pengintu Pemisi Dato Sri Awang Tengah Ali Hassan, kemari.

Manyin madah AirAsia udah ngemaduka penerebai terus ngagai dua iti destinasi tu berindik ari pengurang pesinjir kelebih agi kena penerebail pulai baru ke Kuching.

AirAsia meri kelala penerebai terus ke Macau ari Kuching November 2007 tu suba lalu penerebai ke Bali, Indonesia Mai taun tu enggau penerebai Kuching-Bali diketuka udah dua bulan tu.

“Maya tu betemu enggau iya tu ila, kami mega deka bejuraika mayuh pekara bekait enggau industri pengawa dagang temuai kelimpah ari penerebai ke Macau enggau Bali,” ku iya.

Ku Manyin AirAsia deka meri kelala baru penerebai ngagai dua iti destinasi tu enti pemayuh pasinjir ulih diletak entara 60 ngagai 70 peratus laban kompeni bilun nya enggai nanggung sebarang pengerugi.

“Pemayuh pasinjir ti deka ke Macau tauka Bali ari Kuching chukup tang ukai maya terebai pulai baru ke Kuching.

“Opis Menteri enda ulih mantu ngangkatka penerebai ngagai Bali kelebih agi iya semina tan dua bulan,” ku iya.

Bekait enggau tu, Manyin madah iya deka madah ngagai AirAsia awakka mansik dulu jam bilun nya terebai lalu engka ngena bilun ti mit agi bebanding enggau penerebai kediatu.

“Tauka AirAsia tau ngubahka penerebai ke Kuching-Hong Kong-Kuching,” ku iya nambah baru.

Kelimpah ari nya, Manyin madahka anak kompeni opis menteri nya, Lembaga Pelancongan Sarawak (STB) selalu mantu ngangkatka produk pengawa dagang temuai ba menua tu enggau bebendar ba renggat dunya.

“Aku nemu semua sida ti besangkut paut enggau industri tu kelebih agi STB enggau sistem komunikasi ti manah, pemayuh temuai deka nambah kelebih agi enggau penambah dua tauka tiga iti penerebai ke Singapura ari Kuching.

Ba pemayuh temuai ke datai ngagai menua tu, Manyin madah, enda berapa mayuh ba statistik penatai temuai nya kelebih agi ba gaya ekonomi global ti enda berapa manah sereta sistem kena ngira penatai temuai Jabatan Imigresen ke udah berubah.

Ba pengawa tiap taun besemekih chara ke mit ngira bansa burung ba Borneo Highlands Resort ti deka diatur kena 19 Oktober tu, Manyin madahka pengawa tu bisi potensi dipasuk dalam kalender pengawa dagang temuai menua Sarawak.

Pengawa nya diatur Kumpulan Burung dan Pusat Peranginan Persatuan Alam Sekitar Malaysia (MNS) pampang Kuching.