KUCHING: Sapit Kepala Menteri Datuk Patinggi Tan Sri Alfred Jabu madah idea deka ngaga stisin televisyen kediri empu di Sarawak deka ngemenuhka peminta pupu bansa ba menua tu.

“Kitai ngelaluka atur tu lalu arap stisin TV tu ila deka nyadung berita enggau pemadah ulih dikerembaika ba menua tu nyengkaum di menua pesisir,” ku iya madah ngagai pengarang berita maya ngabang Hari Raya ngagai Ketua Menteri ba Stadium Tertutup, hari Tiga tu tadi.

Ku Jabu, tabur berita ti terang sigi beguna ba menua pesisir awakka nadai siku orang tinggal ari berita pemansang ba semua sektor.

“Berita tauka program TV ngena jaku bahasa tauka jaku orang menua tu deka mantu rayat macham suku bansa meretika agi berita dalam jaku nya enggau manah laban menua tu mayuh macham etnik enggau adat,” ku Jabu ti mega Menteri Pemansang Menua Pesisir.

Hari Enam tu tadi, Menteri Pemadah Datuk Ahmad Shabery Cheek madah perintah deka meri pemutus ngaga TV Sarawak nyadi siti ari stisin baru Radio Televisyen Malaysia (RTM) lebuh sistem digital dikena penuh dalam kandang tiga taun.

Bejaku pasal Anugerah Muzik Dayak (Dama) 2008, Jabu madah Dama bisi awak ngerembaika agi industri muzik Dayak kelimpah ari meri awak ngagai adat enggau main asal menua tu ulih dipeda lalu orang mayuh nemu agi pasal adat enggau main asal enti chukup mayuh orang meda pengawa tu.

“Aku nemu enggau TV Sarwak tu ila, isu ti deka nabur program bekait enggau musik enggau artis Dayak setengah jam tiap minggu nengah RTM nadai penusah agi.

“Aku mega arapka industri muzik Dayak ulih dikemansangka agi datai ngagai renggat nasional enggau entarabansa laban Sarawak bekunsi sempadan entarabansa enggau Kalimantan enggau Brunei. Lalu sida pan rindu mendingka Musik Dayak,” ku iya.

Bekait enggau pekara tu, Jabu ngarapka ulih meda artis enggau lirik lagu Dayak ti digaga komposer menua tu ngaga lagu patriotik ngayanka visi sereta aspirasi perintah.

“Tu tadi, kitai udah meri anugerah ngagai raban artis Dayak ba Kuching enggau Miri ketegal pengawa sida iya ti udah nyukung musik Dayak lalu tu tau mai mayuh agi bakat baru sama-sama enggau industri tu,” ku Jabu.