MIRI: Bala Penan sepintu bilik anak 10 iku ari Long Beku, Ulu Baram ke datai ngubat siku anak ke Miri ditemu sepital ditu nadai siku ari bala anak nya bisi dokumen pengelala baka surat pengada enggau tingki.

Dr Philip Raja, lutur ke terubah nemu penanggul sida nya beguai ngiga ketuai nembiak PBB Telang Usan Kr Dennis Ngau Jok.

Dennis lalu terus madah ngagai bala kaban komiti sayap nembiak iya baka Gary Hashim Wan seduai Alexander Laing awakka berumban mantu sida sebilik nya minta surat pengada enggau tingki ungkup empat iku bala anak nya ke datai sama ke Miri enggau indai sida Ping Jagai, 36 taun.

Gary seduai Alex lalu mai sida sebilik ke Opis Pengerejista Bansa (JPN), sereta mansutka duit seduai iya empu kena bebayar ba opis nya lalu melanja sida menyanak merarau di pasar ditu.

“Kami bisi dua hari nulung sida sebilik tu. Kemari kami mai sida ngagai JPN tang proses ngaga dokumen nya deka nganti mimit laban mesti bisi sain ketuai raban bansa,” ku Gary nerang.

“Tu siti ari sekeda pengawa kami ba sayap nembiak, maya bisi orang begunaka bantu kami. Aku berasai temegah ati meda Gary seduai Alex sama kiruh magi jam mantu sida tu,” ku Dennis.

Tudah Ping tu madah, ngelamatu seduai laki iya lama udah deka minta ngaga surat pengada enggau tingki ke bala anak seduai tang enda nemu jalai.

“Kami enda nemu alai betanya ngelamatu. Ditu aku meri besai terima kasih ngagai sayap nembiak PBB Telang Usan tegal penyiru enggau pengiruh sida, kelebih agi Gary seduai Alex lalu pia mega ketuai sida Dennis,” ku Ping.

Lebuh ditanya sekalika bala anak iya nya agi sekula, Ping madah semua bala anak seduai badu sekula udah tembu pelajar ba sekula primari.

Iya madah anak tuai seduai, iya nya anak indu diatu umur 21 taun lalu anak pengkuan seduai setaun empat bulan.