KUCHING: Isu Pakatan Rakyat (PR) deka numbuhka perintah baru sigi deka ngerusak pengawa Barisan Nasional (BN) ngemansangka menua enggau rayat, ku Ketuai Pemuda BN Sarawak Fadillah Yusof.

Iya madah, penyakal ti betuaika Datuk Seri Anwar Ibrahim tentu gaga ati lebuh BN udah nyau fokus ba pengawa nya udah sida empu ngasaika diri tesepit main politik.

“Taun 2020 enda lama ga agi, enti kitai tembu bepolitik aja, kitai deka tinggal dalam pemansang ti kedeka kitai nempa menua tu nyadi menua ke mansang. Perintah BN selalu deka ngemataka kitai bulih juluk nya lalu ba maya ke sebaka ngemeratka rayat — udah terang dipandang ba Bajet 2009.

“Tang penyakal nguji ngerabur mata rayat enggau majak main politik taja pan bepilih besai udah dipejalaika lalu perintah udah ditumbuhka bejalaika menua tu,” ku iya.

Iya madah baka nya ba program Bersemuka Dengan Media ti ditabur terus nengah RTM1, malam kemari.

Program ke dikumbai ‘Apa Dah Jadi?’ bejuraika gaya politik menua, kelebih agi PR ke enda mujur numbuhka perintah baru kena 16 September.

Fadillah ti mega Sapit Menteri Sains, Teknologi enggau Inovasi madah, siku pangan iya ari menua Australia madah diri alit ati meda gaya politik menua Malaysia.

Pangan iya nya madah, menua bukai ke ngena sistem demokrasi nguji enda bejuraika pengawa politik enti perintah udah ditumbuhka udah abis bepilih besai.

“Lain ba menua kitai, taja pan udah abis bepilih besai agi bisi ninga cherita politik. Ukai nya aja, penyakal agi mega deka nukar perintah ti udah ditumbuhka ngena chara demokrasi,” ku iya.

Enti nitihka pekara ke betul, penyakal enggau semua orang bukai ba menua tu nulung perintah ngemansangka menua ngambi semua pekara ulih dipejalaika.

Iya madah, aum Dewan Rakyat tau dikena penyakal enti bisi pekara asai ba ati sida iya patut diaduka manah agi nitihka atur tauka program perintah.

“Tu (pengawa Anwar deka numbuhka perintah baru) ngerugi menua kitai. Enti nitih, udah abis bepilih kitai nganti lalu meri peluang ngagai perintah ti udah dipilih rayat bejalaika menua tu,” ku iya.

Fadillah madah baru, Anwar semina deka mantupka peneka ati iya empu tang perintah BN sigi bebendar deka ngemansangka menua.

“Nama pemanah ngagai menua enti siku orang (Anwar) madah nengah siaran televisyen Al-Jazeera penyakal deka ngambi perintah menua 16 September?

“Tu tau ngenusah pelabur ari menua luar ti deka melabur ba menua tu lalu ngumbai politik menua tu enda entap, lalu tu tau ngerusak nama menua tu, lalu nagang orang ari melabur ba menua tu,” ku iya.