BINTULU: Bisi 75 iku bala staf kompeni enggau nyali darah ke diatur Grand Perfect Sdn Bhd (GP) enggau Sarawak Planted Forest Training Centre lalu disaup bank darah Opis Pengerai ditu.

Semua bala staf kompeni nya ba kem alai nerenak paung kayu di Sungai Mas, nyengkaum 31 iku pelatih dia sama datai nyali darah sepain siku kemari.

Dipejalaika ba siti ari dua iti kelas palan latih nya dalam kandang alai Projek Nanam Kayu Perintah Sarawak, di Samarakan kira pejalai sejam ngena kerita ari tu, pengawa belabuh ari pukul 9.30 pagi lalu tembu urung pukul 1 ngalih hari seharinya.

Sama bisi enggau datai ba program nya pengarah Sarawak Planted Forest Sdn Bhd, Dr Joseph Jawa ke ngetu enda lama sebedau mansang nemuai gawa ke Kakus, menijer latih palan nya Riwhi Diamond, pemesai kanan latih Dominic Retan, pengatur pengawa palan nya Toulsimani Lachiminen sereta enggau pemesai ngemata Program Pemansang Komuniti Grand Perfect Sdn Bhd Lapok Tepong.

Lebuh ditanya pasal program nya Diamond, ke datai ari New Zealand madah projek pungkal nya ke bejalai ari bulan Jun meri latih dalam pengelandik kereja ba industri ladang nanam kayu kampung, lalu meri kemeran ngambi sida ke badu sekula.

“Ditumbuh baruh kemata enggau lalau ari Grand Perfect Sdn Bhd, palan nya ulih alai 120 iku pelatih penuh jam,” ku iya sereta madah sida nya ke bendar ngambi kus pelasar tiga bulan dalam sekeda projek besangkut paut enggau industri nya.

Iya madah, program sida diatu nyengkaum Program Pemansang Nembiak ke ngiching deka ngambi sida ke badu sekula sereta ke nadai pengawa ari menua pesisir.

Ku iya, program ngena meri awak ngagai bala nembiak belajar sekeda pengelandik sebedau sida ulih diambi kereja tetap penuh jam.

Skim apperentis dagang meri awak ngagai bala nembiak ngulihka pemandai dalam dagang baka penemu ngatur sereta nyaga kampung ke ditaga kena sida meresa sekeda pengawa ba kampung, pengawa nebang ngena tinso enggau jalai nebang kayu.

Raban keterubah bala sida 31 pelatih ke benung ngambi latih diatu deka nembuka latih sida ngagai 16 Sept tu, lalu enda lama udah nya, palan nya deka nerima 30 tauka lebih bala pelatih, ke tebal agi bala sida ari menua ulu, iya nya baka ari Tatau enggau Sebauh.

“Taja pia, enti mayuh agi patut diambi, kami nyangka deka rekrut bala nembiak ari alai bukai dalam sitak tu, sereta enggau ari sitak menua bukai mega baka ari Kanowit, lalu sekeda bala sida ari entigis menua Miri,laban ba sekeda menua nya meh pekara ti besangkut paut enggau industri tu dipejalaika,” ku iya.