Iya ukai mina ngemai pemansang tang nyungkak pemanah pengidup

BINTULU: Perintah kunsi Barisan Nasional udah ngayanka diri endang sikar sereta siru dalam pengawa ngemata sereta ngintu pengelantang pendiau bala rayat Malaysia lalu endang sigi patut merintah menua tu.

Nya munyi jaku ke dipansutka Tuai Rumah Egar Andil, 58, lebuh ke bejaku ngagai Utusan Borneo ba rumah panjai 20 pintu ke dipegai iya urung bisi empat kilometer penyauh ari pasar Sebauh, lalu bisi pejalai 40 minit ngena kerita ari ditu.

“Perintah pegai BN diatu ukai mina ngenataika pemansang tang mega meri awak ngagai bala rayat kena sida ngidup diri enggau jalai ti manah agi, tauka ngena nyungkak pendiau sida, idup ensepi penyamai status ekonomi ti tinggi agi,” ku iya.

Tuai Rumah nya mega madah, dalam tanggung pengawa ngenataika pelajar sekula ngagai rayat, mayuh bala nembiak ari rumah panjai sida udah bulih pemandai akademik ti manah.

“Kami bisi abis mimit tujuh iku bala nembiak ari rumah panjai ditu ke diatu benung belajar ngambi degree ba sekeda universiti di menua Malaysia ditu, lalu sekeda bisi udah abis pelajar lalu udah bulih pengawa ti manah,” ku iya.

Ambika banding, ku iya, nembiak sida baka Jennifer Igal, Diana Lusan enggau Shelly James Ugai nya sekeda ari bala nembiak sida ari rumah nya ke diatu benung belajar ngambi mayuh bengkah degree ba universiti menua ditu empu, kelebih agi di Unimas.

“Nadai kebuah kitai patut berubah ati enggai nyukung perintah ke diatu. BN tu endang perintah ti pemadu ngena ba kitai, lalu kitai pan nemu, kitai rumah panjai sigi udah diberi mayuh bantu enggau projek pemansang baka sekeda skim enggau mega projek mit menua pesisir (MPR),” ku iya nambah.

Endang sama baka bala rayat Malaysia bukai, Egar mega sama ampit ninga tauka macha berita ba radio, TV enggau surat berita pasal perambu parti penyakal ti deka nukar perintah BN, lalu ngempu kuasa merintah kena 16 September taun tu.

“Nya perambu ti enda manah. Kami nyakal penuh perambu nya, laban kami nemu rumah panjai kami endang dintu manah ulih pengari rayat ke dipilih kami, iya nya Dr Stephen Rundi Utom,” ku Egar keran madah.

“Ngarika bala nembiak redak ba rumah panjai kami, aku deka ngenataika pesan besai terima kasih ngagai Dr Rundi tegal pemanah budi enggau bantu iya ke ngelamatu, lalu enggau tu aku madah, kami endang bediri enda nginsit ngembar perintah BN enda ngira utai nyadi ila,” ku iya nambah jaku.

Serimbai enggau nya, Egar ngasaika agi mayuh utai ti patut dikereja perintah kena mantu rayat, kelebih agi baka ngenataika sekeda pemansang pelajar sekula ngagai rayat ba entigis menua ulu, kelebih agi sida ke nadai datai jalai alun tauka tusah digagai ngena jalai ai.

“Pelajar sekula tu besai bendar guna ka semua orang, laban mina ngena pelajar sekula ti menyana enggau meruan bala nembiak menua ulu ulih ngemansutka sida sebilik enggau raban bansa sida ari penyeranta, sereta idup nyamai dudi hari ila,” ku tuai rumah nya.

Ngenang pasal MRP ke udah dikenataika Dr Rundi, Egar madah sida bisi udah nerima agih RM5,000 kena sida meli chat kena ngechat rumah panjai sida.

“Agih nya udah dikena kami enggau manah, laban baka ke dipeda sida, bala nembiak redak ba rumah panjai tu udah ngechat penaik enggau bilik sida empu ngena jalai gawa beduruk tauka gotong-royong pagi tadi (kemari).

“Taja pan agih nya enda tentu chukup, tang kami meri besai terima kasih enggau pengaga ati ngagai YB nya,” ku bekau orang kereja perintah bisi anak tiga iku nya. Iya berupai idup senang makai pinchin.

Lebuh ditanya, Egar madah, “Bala kami 20 pintu bilik ditu urung bisi 200 iku orang ke nguan ba rumah panjai tu ke digaga lebih 20

taun semak Sg Kebetau, Sebangat (Sebauh). Rumah nya digaga ba tanah besai tiga ekar.”

Iya madah bala sida ba rumah panjai nya agi bumai betupi baka nanam padi, buah, sayur enggau getah sereta mega sekeda pun kayu sawit ke menggal mit ba tanah puang sida empu.

Egar, lebuh ditanya, madah atur enda ibuh mayar bil karan RM20 kebaruh nya enda chukup tang patut ditikika ngagai RM50 ngambika mayuh rayat beruntung ari nya. Kebuah pia, ku iya, jarang endar rayat rumah panjai ke ngena kuasa karan baruh ari RM20 sebulan.

“Enti perintah ulih niki ka penyampau bil ti enda ibuh dibayar ngagai RM50 sebulan nya baru bisi asil enti kitai ngira rega barang ke niki magang diatu,” ku iya.