SARIKEI: Bisi 100 iku bala nembiak umur 15 ngagai 25 taun ari pelilih Meradong enggau Sarikei enggau ‘Program Rakan Muda Wawasan Desa’ ba Rumah Agan Luat di Ulu Sungai Mador, Meradong enda jauh ari tu minggu dulu.

Program renggat parlimen Sarikai nya diatur Opis Nembiak enggau Lumba Sitak Sarikei.

Ketuai Opis Nembiak enggau Lumba sitak Sarikei Noim Lanjis ke bejadi program nya lalu nyerakah bala nembiak nya nyadi bala anak iru sida Rumah Agan.

Ku Noim, batang tuju program kena ngansah tanggung pengawa enggau komitmen sosial bala nembiak ke enggau dia, tambah mega kena nempa penemu ke manah enggi bala nembiak dia enggau chara sama mai sida regas ngereja sereta ngatur pengawa raban bansa diri.

Iching program tebal agi nembiak menua pesisir laban siti ati batang tuju program nya endang deka nyendiaka sida nyadi ajen mai ubah sereta nyungkak tikas pengidup raban bansa sida.

Siti agi tuju program nya endang kena ngiri penemu nyadi tuai sereta ngangkatka semengat sukarela ba bala nembiak rebak baru.

Sekeda ari pengawa ke diatur dalam program nya nyengkaum ngaga padang main sepaktakraw, ngechat rumah panjai lalu ngupas ngelingi rumah panjai.

Pengawa bukai ke bisi diatur nyengkaum pekit lagu karaoke, sukaneka, chabut tikit benasit enggau serumpu berami bala mayuh.

Ba pengerami penutup program tiga hari dua malam nya, DO Meradong Mohammad Junaidi Mohiddin datai bejadi program nya ngarika Kaban Parlimen Sarikei Ding Kuong Hiing.

Sama bisi datai ba pengerami penutup nya Ketuai Opis Pemadah Pelilih Meradong Michael Sabek, ketuai opis perintah bukai sereta mega sekeda tuai raban bansa.