Presiden PRS nyaut tanya pasal penemu Pakatan Rakyat ke deka ngaga perintah 16 September tu ila

KUCHING: “Menua Sarawak menua burung kenyalang, ukai engkatak,” pia ku jaku dipadah Presiden Parti Rakyat Sarawak (PRS) Dato Sri Dr James Masing pasal jaku Penyanding Penemu Parti Keadilan Rakyat Datuk Seri Anwar Ibrahim ke madah deka ngaga perintah Pakatan Rakyat (PR) 16 September tu ila.

Iya madah Anwar bisi runding iya empu taja pan ba runding iya (Masing), jaku Anwar tu deka narit Kaban Parlimen ari Sabah enggau Sarawak beserakup enggau PR semina mimpi ngapa.

“Pelaba aku mimpi tu ukai penguntung ngagai orang ke tinduk. Bemimpi tau mega kena sida ti udah dani,” ku iya madah ngagai udah muka seminar “Can we really Manage the Future?” ba siti hotel ditu, kemari.

Iya madah, bepilih mit Permatang Pauh tu tadi ti udah ngayanka pemenang ba sepiak Penyanding Penemu PKR, Anwar Ibrahim patut dibasa, laban nya pilih rayat menua nya, lalu kelimpah ari nya, iya madah Anwar pan patut bebasaka Barisan National ti nyadi perintah menua udah bepilih besai 8 Mac tu tadi.

Iya mega madah, proses bepilih pan mandangka Suruhanjaya Pilihanraya (EC) ngereja pengawa sida iya enggau manah taja pan penyukung PKR madah proses bepilih nya milih bulu.

Taja pia, iya madah kaban Parti Rakyat Sarawak (PRS) nadai merejuk parti enti sema beserakup enggau Sarawak Progressive Democratic Party (SPDP) nya enda nyadi.

Ku iya, pekara deka merejuk ngagai Pakatan Rakyat nadai kebuah nyadi ketegal penyerakup entara dua parti nya bedau diputarka agi.

“Nadai entu kebuah ga merejuk. Agi mega kami (PRS enggau SPDP) benung kiruh pasal penyerakup,” ku Masing.

Iya madah, diatu PRS bedau mutuska penyerakup laban komiti nya agi bejuraika proses penyerakup nya.

Taja penyerakup nya nyadi ke enda, nadai kebuah kaban parti nya merejuk ngagai parti bukai, ku iya.

Ba ripot 27 Ogos tu tadi, Sapit Presiden SPDP Datuk Peter Nyarok madah nyangka bisi penyerakup entara dua parti tu sebedau bepilih menua tu ila.

Nyarok ke mega ketuai komiti penyerakup, madah jaku tu udah tegap naka ke diatu, lalu udah bisi sekeda nama kena entiti baru tu ku iya, taja bedau diputuska.

Bersatu Rakyat Sarawak (Beras), Demokratik Rakyat Sarawak (Deras) tauka Bersatu Progresif Rakyat Sarawak (BPRS) entara tiga iti nama ti bisi disebut ba aum penyerakup parti tu kena 18 Jun tu tadi.

PRS udah madu mandal presiden, Datuk Billy Abit Joo nyadi Chermin Gerempung Komiti nganti mandal siku agi, Datuk Dublin Unting Ingkot, ti benung ba sepital diatu udah iya sakit “stroke” 21 May tu tadi.