KUCHING: Ketuai patut nemu nama pekara ti ulih ngasuh nembiak rebak kemaya hari tu gagit ati ngansah peneleba ke bisi ba sida iya tauka sida tu deka gawa ke menua bukai ti gagit ati deka ngambi sida iya gawa, ku Kepala Menteri Pehin Sri Abdul Taib Mahmud.

Iya madah tu berat laban rebak kemaya hari tu nyadi mudal mensia menua tu.

“Kitai patut bekereja enggau bebendar agi, lalu gawa enggau pengelandik bepekit menua bukai kemaya hari tu. Kitai begunaka pengelandik tiap iku orang kena ngemansangka penemu kitai ba pengawa ngaga kapasiti menua tu,” ku iya madah ba puin jaku iya, ti dibacha ulih Menteri Pemansang Tanah Dato Sri James Masing ba pengawa muka seminar “Can We Really Manage The Future” ba Hotel Crowne Plaza Riverside Kuching ti diatur Perbadanan Pembangunan Ekonomi Sarawak (PPES) ditu, kemari.

Iya madah rebak kemaya tu orang ti bisi pelajar, udah chukup nyendiaka diri ba pengawa ti beguna ka teknologi ke tinggi, enda ibuh ke orang bukai asal bisi penguntung ke mayuh, nadai entu bisi ati ba peminta orang ke ngaji sida, lalu deka ngereja pengawa nitihka chara sida iya.

Sida mega bisi minat ke besai ba politik lalu begunaka tanggungjawab enggau pekara ti ngemeratka nadai utai dipelalai ba pengawa dagang enggau ba perintah, kelimpah ari nadai entu milih bansa, ku iya.

“Aspek tu ulih dipeda kitai maya Bepilih Besai bulan Mac 2008 tu tadi. Sida iya ngayanka ulah enda entu bebasa ke menua tu lalu nadai ati ke bebagi enti deka mindah ngagai menua bukai,” ku iya.

Nya alai, iya madah rebak ke baru menua Malaysia diatu deka ketuai sida iya orang ke “versatile”.

Ulah baka tu, landik bejaku pasal visi global, bisi penemu ba teknologi, runding ke tebuka, ‘diversity champion, fleksibel, bebasa ngagai orang ke bekereja, ngangkatka penyerakup enggau ketuai ti manah pendiau, ku iya.

Sebedau nya, Taib madah pengawa ketuai patut ngena ‘appreciative inquiry’ ngaga siti proses ngasuh orang deka meri penemu sida iya pasal pengawa ti udah dipadu ngagai sida.

Iya madah atur tu manah laban tu tau ngasuh ketuai ba organisasi nya ngangkatka sida ti gawa madahka pemanah pengawa sida iya enggau tiap iti sukung ti udah diberi ngagai organisasi nya.

Iya mega madah jaku ke terang ukai semina pasal pendiau ti tebuka tang mega pasal pengelandik bejaku lebuh bejuraika sebarang pekara awakka ulih nentuka pengarap, penegap enggau pengering.

Iya madah ketuai anang berunding ke sida iya udah mujur laban sida iya patut selalu ngiga perspektif baru, mansik nama kebuah orang bukai ulih mujur lalu manding chara sida iya nyadi ketuai.

“Tu pasal ketuai ti betunga enggau sebarang chabar lalu ngajar organisasi betunga enggau sebarang chabar nyeremin diri, belajar enggau mansang,” ku iya. Ku Taib, pendiau jemah ila deka kurang reti taja pan pemansang mayuh udah diatur dalam semua pengawa enggau pemansang penemu.

Ku iya, nyadi ketuai mesti berani, belajar pekara ke enda disagi lalu deka nyendiaka diri betunga enggau pekara ke enda disagi.

“Kebendar, chara ngurus jemah ila patut nyadi pengawa kedua semua orang. Enda patut orang ke belajar tauka landik nguna penemu chara ngurus enda bulih penguntung ari penemu nya.

“Pekara ti patut ditanya ba kitai empu, enti kitai ngurus jemah ila tauka jemah ila ngurus kitai,” ku iya.

Kelimpah ari nya, Chermin Perbadanan Pembangunan Ekonomi Sarawak (SEDC) Datuk Talib Zulpilip madah, seminar tu manah laban iya ngajar kitai nemu pasal utai ti nyadi jemah ila.

“Kitai nadai nemu nama penyadi jemah ila tang kitai mesti nyadi proaktif ngelala gaya, utai ti deka nyadi, peluang ngambika ulih ngaduka strategi ti tegap kena nangkup jemah ila,” ku iya.

Iya madah, menijer jemah ila orang ti deka ngemansangka pekara ti dipilih, strategi lalu nemu baka ni ngereja pengawa nya.

Seminar nya ke ngena rambai jaku “Can We Really Manage The Future?” tauka “Ulih ke enda Kitai Ngintu Jemah Ila?” diberi siku pakar ngintu penemu jemah ila enggau Chermin Future Management Group AG, Dr Pedro Micic.

Iya nyadi Konsultan ngagai gerempung ti ngurus kompeni tu, lalu mega siku orang ke landik ti udah bejaku ba mayuh kompeni besai renggat dunya tu. Iya nulung nerang enggau sistematik pasal utai ti deka nyadi jemah ila ngambika ulih ngena peluang jemah ila enggau naka pengelengkas, lalu ngena penemu tu ngulihka pemujur ba strategi enggau wang.

Ba jaku iya, Micic meri kelala Future Management ngena model Eltville ti ngungkup lima bengkah penemu jemah ila.

Penemu tu iya nya, ‘future glasses’ (the probable future), ‘green future glasses’ (the possible future), ‘yellow future glasses’ (the desired future), ‘red future glasses’ (the unexpected future) enggau ‘violet future glasses’ (the planned future).

Seminar setengah hari nya diatur SEDC enggau Perintah Menua Sarawak.